فوتو: astana-akshamy.kz
كۇدىكتى سىلتەمەگە وتپەۋ كەرەك
كوپ تارالعان سحەمالاردىڭ ءبىرى – اقشا تۇسكەنى تۋرالى جالعان حابارلاما جىبەرۋ. ونداي كەزدە ازاماتتار بانك شوتىنا تۇسكەن اقشا سوماسى تۋرالى SMS-حابارلاما الادى. كەيىن ولارعا قاسكويلەر قوڭىراۋ شالىپ, ءوزىن اقشا اۋدارعان ادام رەتىندە تانىستىرادى دا, «قاتەلەسىپ اۋدارىپپىن» دەگەن سىلتاۋمەن تۇسكەن اقشانى كەرى قايتارۋدى سۇرايدى. بىراق, كوبىنە مۇنداي حابارلامالار جالعان بولىپ شىعادى.
وسىنداي حابارلاما نەمەسە قوڭىراۋ قابىلداعان كەزدە اقشانىڭ قايدان كەلگەنىن تەك بانكتىڭ رەسمي ءموبيلدى قوسىمشاسىندا نەمەسە ينتەرنەت-بانكينگ ارقىلى تەكسەرىپ العان ءلازىم. بەلگىسىز نومىردەن كەلگەن SMS-حابارلاماعا ساق بولىپ, كۇدىكتى سىلتەمەگە وتپەۋ كەرەك.
الاياقتىق سحەمانىڭ تاعى ءبىر ءتۇرى
قاسكويلەر بەلگىلى ءبىر ازاماتتىڭ شوتىنا شىنايى تۇردە اقشا اۋدارادى. كەيىن ولار اقشا اۋدارعان ادام بولىپ قوڭىراۋ شالىپ, «قاتەلەسىپ اۋدارعانىن» ايتادى دا, تۇسكەن اقشانى قايتارۋعا باسقا ءبىر ءۇشىنشى تاراپتىڭ شوتىن ۇسىنادى. اڭگىمە كەزىندە پسيحولوگيالىق قىسىم (مىسالى, اقشا بالانىڭ ەمىنە كەرەك ەكەنىن ايتىپ) كورسەتۋى نەمەسە قۇقىق قورعاۋ ورگاندارىنا, بولماسا, سوتقا شاعىمداناتىنىن ايتىپ, قورقىتۋى مۇمكىن. كوبىنە الاياقتار ءوزىن «كۇش قۇرىلىمدارىنىڭ» نەمەسە «ۇلتتىق بانكتىڭ قىزمەتكەرى» رەتىندە تانىستىرىپ, جەكە جانە بانك دەرەكتەرىن سۇراتادى.
ۇلتتىق بانك وسىنداي وقيعاعا تاپ بولعان جاعدايدا نەمەسە بەلگىسىز بىرەۋلەردەن اقشا تۇسكەندە ءۇشىنشى تاراپتىڭ شوتىنا اقشا اۋدارۋدان ساق بولۋعا شاقىرادى. وزگەدەن كەلگەن اقشانى قايتارۋ امالىن ناقتىلاۋ ءۇشىن دەرەۋ بانككە حابارلاسقان دۇرىس. قاجەت بولسا, ءتيىستى ءوتىنىشتى تاپسىرۋ ءۇشىن بانكتىڭ ەڭ جاقىن بولىمشەسىنە بارۋ كەرەك.
ەگەر الاياقتىق ارەكەتكە تاپ بولساڭىز, قۇقىق قورعاۋ ورگاندارىنا ارىز تۇسىرگەن دۇرىس. كەڭەس الۋ ءۇشىن 1477 قىسقا نومىرىنە قوڭىراۋ شالىپ, ۇلتتىق بانكتىڭ بايلانىس ورتالىعىنا حابارلاسۋعا بولادى.
