مودەل تسيفرلىق شتاب شەڭبەرىندە باسقارۋدىڭ ستراتەگيالىق جانە وپەراتسيالىق دەڭگەيىن قاراستىرادى. وپەراتسيالىق باسقارۋدى بولاشاق تسيفرلىق ترانسفورماتسيا جونىندەگى كوميسسيا, ياعني قازىرگى مەملەكەتتىك قىزمەتتەر كورسەتۋ ماسەلەلەرى جونىندەگى ۆەدومستۆوارالىق كوميسسيا جۇزەگە اسىرادى.
قۇجات پرەزيدەنتتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا بەلگىلەنگەن تاپسىرمالارى شەڭبەرىندە ازىرلەنىپ جاتىر.
شتاب ستراتەگيانى ازىرلەۋ نەگىزىندە تۇراقتى ەكونوميكالىق وسىمگە قول جەتكىزۋ, «ورتاشا تابىس تۇزاعىن» ەڭسەرۋ جانە تسيفرلىق مەملەكەت فورماتىنا كوشۋگە ءتيىس مىندەتتەردى جۇزەگە اسىرۋعا باعىتتالعان بىرقاتار شەشىم قابىلدادى.
جاساندى ينتەللەكت جانە تسيفرلىق دامۋ مينيسترلىگىنىڭ مالىمەتى بويىنشا جاڭا ستراتەگيا ۇلتتىق «مۇزجارعىش» جوبالار جۇيەسىندە قۇرىلماق. ولاردىڭ ارقايسىسىندا جەكە KPI-ى مەن ءتيىستى مەرزىمى كورسەتىلەدى. 10 نەگىزگى باعىتتى قامتيدى. ولار – تسيفرلىق مەملەكەتتىك قىزمەتتەر, دەنساۋلىق ساقتاۋ, ءبىلىم بەرۋ, ەڭبەك نارىعى, تسيفرلىق ەكونوميكا مەن دەرەكتەر, كيبەرقاۋىپسىزدىك, روبوتتەحنيكا, تسيفرلىق ينفراقۇرىلىم, رەتتەۋ جانە ستارتاپتار ەكوجۇيەسى.
مىسال رەتىندە ءبىلىم بەرۋ سالاسى تاڭدالدى. «جي نەگىزىندەگى ينتەراكتيۆتى ءبىلىم بەرۋ» جوباسىندا جي-ۋنيۆەرسيتەتىن قۇرۋ, Tomorrow-school-دى كەڭەيتۋ, GPT Education ەنگىزۋ جانە وقۋشىلارعا ارنالعان جي باعدارلاماسىن ىسكە قوسۋ كوزدەلەدى. بۇل جوبالار تسيفرلىق ساۋاتتىڭ ءوسۋىن جانە قازاقستاننىڭ PISA رەيتينگىندەگى پوزيتسياسىن جاقسارتۋعا مۇمكىندىك بەرۋگە ءتيىس.
ستراتەگيانى جۇزەگە اسىرۋ جي ەسەبىنەن ەكونوميكالىق ءوسۋدى جەدەلدەتۋگە, اۆتوماتتاندىرۋ جانە تسيفرلىق سەرۆيستەر ەسەبىنەن ەڭبەك ونىمدىلىگىن ارتتىرۋعا, مەملەكەتتىك قىزمەتتەر مەن شەشىمدەر قابىلداۋ مەرزىمدەرىن قىسقارتۋعا, جاڭا جوعارى تەحنولوگيالىق سالالار مەن جۇمىس ورىندارىن اشۋعا, STEM سالالارىندا جاڭا تسيفرلىق مامانداردى دايارلاۋعا اكەلەدى دەپ كۇتىلۋدە.
پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ الەمدە جي-گە سالىناتىن ينۆەستيتسيالار جوعارى قارقىنمەن ءوسىپ كەلە جاتقانىن ايتتى. 2028 جىلعا قاراي كوشباسشى ەلدەردە جي ينۆەستيتسيالارى ورتاشا ەسەپپەن جىلدىق ءىجو-ءنىڭ 4-6%-نا جەتەدى, بۇل جي-دى ەكونوميكالىق ءوسۋدىڭ نەگىزگى درايۆەرلەرىنىڭ ءبىرى رەتىندە ايقىندايدى. الەمدىك تاجىريبە كورسەتكەندەي, مۇنداي ينۆەستيتسيالاردىڭ نەگىزگى بولىگى (65%-عا دەيىن) سەرۆەرلەردى, دەرەكتەردى ساقتاۋ جۇيەلەرىن جانە ەسەپتەۋ كلاستەرلەرىمەن قاتار IT-جابدىققا باعىتتالادى, ال سەرۆيستەر مەن باعدارلامالىق قامتاماسىز ەتۋ سايكەسىنشە 15-20% جانە 20-25%-دى قۇرايدى.
