سۋرەت: kursiv.media
وقۋ-اعارتۋ مينيسترلىگىنىڭ دەرەگىنە سۇيەنسەك, كەيىنگى جىلدارى ەلىمىزدە جەكەمەنشىك مەكتەپتەردىڭ سانى شامامەن مىڭعا جۋىقتاپ قالدى. ءبىلىم سالاسىنداعى جەكە بيزنەستىڭ ۇلعايۋى – جاقسى ءۇردىس. الايدا قازىر مەملەكەتتىك تاپسىرىستى الۋ تارتىبىندە شيكىلىك بار. وسىعان دەيىن جۇرگىزىلگەن تالداۋ جۇمىسىنىڭ ناتيجەسىندە جەكەمەنشىك مەكتەپتەردەگى وقۋشىلاردى ەسەپكە الۋ مەن قارجىلاندىرۋ بويىنشا سايكەسسىزدىك انىقتالدى. ۇلتتىق ءبىلىم دەرەكقورىندا مەملەكەت ەسەبىنەن قارجىلاندىرىلاتىن وقۋ ورنىندا تىركەلگەن بالالاردىڭ ءىس جۇزىندە مۇلدەم باسقا مەكتەپتە وقيتىنى بەلگىلى بولدى. ال جەكەلەگەن وڭىرلەردە كەيبىر مەكتەپتەر وقۋدان شىعىپ كەتكەن وقۋشىلار ءۇشىن دە اقشا الىپ وتىرعان. سونداي-اق ءبىلىم قىزمەتىنە قاتىسى جوق مەملەكەتتىك ساتىپ الۋ جۇيەسىندە تىركەلگەن ۇيىمدار انىقتالدى. مۇنىڭ بارلىعى جۇيەگە رەفورما قاجەت ەكەنىن بايقاتىپ وتىر.
تۇيتكىلدى ماسەلەلەردى شەشۋ ماقساتىندا قارجى مينيسترلىگىنە قاراستى «اقپاراتتىق-ەسەپتەۋ ورتالىعى» اق جاڭا اقپاراتتىق جۇيەنى ازىرلەدى. اتالعان تەحنولوگيا E-Qazyna.kz پلاتفورماسىنا ەنگىزىلگەن ءارى پايدالانۋشىلاردىڭ جۇمىسىن جەڭىلدەتۋمەن قاتار دەرەكتەردىڭ دۇرىستىعىن باقىلاۋدى كۇشەيتەدى. جۇيەدە وقۋشىلاردىڭ سانى مەن كونتينگەنتى, رۇقسات قۇجاتتارىنىڭ بار-جوعى اۆتوماتتى تۇردە تەكسەرىلىپ, ءبىلىم سالاسىنداعى اقپاراتتىق جۇيەلەرمەن ءبىرتۇتاس بولادى. ال قاناتقاقتى جوبانىڭ وپەراتورى بىرىڭعاي اكىمشىلىك باسقارۋدى قامتاماسىز ەتۋگە قارجى مينيسترلىگىنىڭ «قارجى ورتالىعى» اق بەكىتىلدى. ورتالىق ۇيىمداستىرۋ-ادىستەمەلىك قولداۋدى جۇزەگە اسىرىپ, قاتىسۋشىلارعا كەڭەس بەرۋ, مونيتورينگ جۇرگىزۋ, قابىلدانعان اكتىلەرگە سايكەس تولەم جۇرگىزۋ قىزمەتتەرىن اتقارادى.
وسى جوبانى ىسكە اسىرۋداعى نەگىزگى ءرول جەرگىلىكتى اتقارۋشى ورگاندارعا, سونىڭ ىشىندە ءبىلىم باسقارمالارىنا جۇكتەلىپ وتىر, ولار مەملەكەتتىك تاپسىرىستاردى ورنالاستىرىپ, قورىتىندى ەسەپتەردى بەكىتەدى. سونداي-اق كەلىسىمشارتتار جاساپ, «www.e-Qazyna.kz» ۆەب-پورتالى ارقىلى كورسەتىلگەن قىزمەت تۋرالى اكتىلەردى قابىلدايدى.
كەلەسى كەزەڭدە بۇل جۇيەگە ءبىلىم سالاسىنداعى باسقا دا مەملەكەتتىك قارجىلاندىرۋ قۇرالدارىن – گرانتتاردى, شاكىرتاقىلاردى, جاتاقحانادا ورىندارمەن قامتاماسىز ەتۋ جانە باسقا دا قولداۋ ءتۇرىن بىرىكتىرۋ كوزدەلگەن. جاڭا جۇيە 12 قاراشادان ىسكە قوسىلدى.
