پارلامەنت 2026-2028 جىلدارعا ارنالعان رەسپۋبليكالىق بيۋدجەتتى بەكىتتى. قۇجاتتا ءتۇرلى ەسەپتەۋلەر مەن الەۋمەتتىك تولەمدەر ءۇشىن قاجەت نەگىزگى پارامەترلەر بەلگىلەنگەن.
2026 جىلعا ارنالعان باستى كورسەتكىشتەر:
- اەك – 4 325 تەڭگە (2025 جىلى – 3 932 تەڭگە).
- ەڭ تومەنگى جالاقى – 85 000 تەڭگە (وزگەرىسسىز).
- تومەنگى زەينەتاقى – 69 049 تەڭگە (2025 جىلى – 62 771 تەڭگە).
- مەملەكەتتىك بازالىق زەينەتاقى تولەمىنىڭ ەڭ تومەنگى مولشەرى – 35 596 تەڭگە (2025 جىلى – 32 360 تەڭگە).
- ەڭ تومەنگى كۇنكورىس دەڭگەيى – 50 851 تەڭگە (2025 جىلى – 46 228 تەڭگە).
اەك – مەملەكەت ايىپپۇلدار, الەۋمەتتىك تولەمدەر, جاردەماقىلار, سالىقتار مەن ءتۇرلى جەڭىلدىكتەردى ەسەپتەۋ ءۇشىن قولداناتىن بىرىڭعاي كورسەتكىش. بۇل جۇيە بارلىق تولەمدەر مەن سانكتسيالاردى ءار جولى قايتا ەسەپتەمەي, ءبىر بازاعا بايلاۋعا مۇمكىندىك بەرەدى.
باعا ءوسىمى مەن ءومىر ءسۇرۋ قۇنىنىڭ جوعارىلاۋىنا بايلانىستى اەك تە جىل سايىن يندەكساتسيالانادى. بۇل ايىپپۇلدار مەن تولەمدەردىڭ قۇنسىزدانباۋىنا, ينفلياتسياعا بەيىمدەلۋىنە كومەكتەسەدى.
