15 قاراشادا نيۋ-يوركتە وتكەن UFC 322 تۋرنيرىندە ماحاچەۆ اۆستراليالىق دجەك دەللا ماددالەنانى تورەشىلەردىڭ ءبىر اۋىزدان شىعارعان شەشىمىمەن جەڭىپ, جاڭا چەمپيون اتانعان ەدى. سونىمەن قاتار, ول ۇيىمنىڭ رەكوردىن قايتالاپ, جەڭىستەر سەرياسىن 16 جەكپە-جەككە جەتكىزدى.
شاۆكات راحمونوۆ The Ariel Helwani Show باعدارلاماسىندا الداعى جەكپە-جەككە قاتىستى ويىن ءبولىستى.
«ەگەر ءبارى مەنىڭ قولىمدا بولسا, تيتۋل ءۇشىن ايقاسۋدى تاڭدار ەدىم. بىراق يسلامنىڭ اقپاننىڭ سوڭى – ناۋرىزعا ۇلگەرۋى ەكىتالاي دەپ ويلايمىن. ول, شاماسى, ءساۋىردىڭ سوڭى – مامىردىڭ باسىندا دايىن بولادى. UFC-گە دە بايلانىستى. قالاي بولعاندا دا, مەن يسلاممەن شىعۋعا دايىنمىن, ەش قيىندىق جوق.
UFC ماعان تيتۋلدىق جەكپە-جەك ۋادە ەتكەن, بىراق جاراقات الىپ, رينگكە شىعا المادىم. بۇل – سالماقتى سەبەپ. ەگەر UFC مەنىڭ الدىمەن بىرەۋمەن ايقاسقانىمدى قالاسا, قارسىلىعىم جوق, كىم بولسا دا دايىنمىن. ەڭ باستىسى – مەرزىم. سول كۇنگە مەن تولىقتاي بابىمدا بولامىن», دەدى فايتەر.
ەسكە سالا كەتەيىك, راحمونوۆ وتكەن جىلدىڭ جەلتوقسانىندا چەمپيوندىق بەلبەۋ ءۇشىن بەلال مۇحاممەدپەن ايقاسۋى ءتيىس بولعان. بىراق بەلال جاراقات الىپ, جەكپە-جەك كەيىنگە قالدى. مامىر ايىنا جوسپارلانعان رەۆانشتا شاۆكاتتىڭ ءوزى جاراقاتىنا بايلانىستى قاتىسا المادى.
ال مامىردا راحمونوۆتىڭ ورنىن باسقان دجەك دەللا ماددالەنا ءوز مۇمكىندىگىن ءتيىمدى پايدالانعان ەدى, ول بەلالدى جەڭىپ, UFC چەمپيونى اتاندى.
