بارلىق التى سوتتالۋشى «تاۋ-كەن نەمەسە قۇرىلىس جۇمىستارىن جۇرگiزۋ كەزiندە قاۋiپسiزدiك قاعيدالارىن بۇزۋ, ابايسىزدا ەكi نەمەسە ودان دا كوپ ادامنىڭ ولiمiنە اكەپ سوققان ءىس-ارەكەت» بابى بويىنشا ايىپتالعان ەدى.
سۋديا 5 ايىپتالۋشىعا باس بوستاندىعىنان ايىرۋ جازاسىن تاعايىنداسا, تاعى بىرەۋىنىڭ باس بوستاندىعىن شەكتەدى. اتاپ ايتقاندا, «مايقايىڭالتىن» اق-نىڭ بۇرىنعى باس ديرەكتورى 4 جىلعا باس بوستاندىعىنان ايرىلسا, باس ديرەكتوردىڭ بۇرىنعى ءبىرىنشى ورىنباسارى مەن كەنىشتىڭ ەكس-ديرەكتورى 3,5 جىلعا سوتتالدى.
مايقايىڭ جەراستى كەنىشى ديرەكتورىنىڭ بۇرىنعى ورىنباسارى مەن باس ينجەنەرى 3 جىلعا تۇرمەگە قامالاتىن بولدى.
سوت ايىپتالۋشىنىڭ ەڭ سوڭعىسى – مايقايىڭ جەراستى كەنىشىنىڭ بۇرىنعى ديرەكتورى 75 جاستا ەكەنىن ەسكەرە وتىرىپ, 3 جىلعا باس بوستاندىعىن شەكتەدى.
«سىزدەردىڭ كىنالارىڭىز سوت تەرگەۋىندە ۇزاق ۋاقىت بويى زەرتتەلگەن ءىس بويىنشا جينالعان دەرەكتەر جيىنتىعىمەن دالەلدەنگەن. تەرگەۋ بارىسىندا كۋاگەرلەر, جابىرلەنۋشىلەر, ماماندار تىڭدالىپ, جاۋاپ الىندى. اتالعان دالەلدەمەلەردىڭ, كۋاگەرلەردىڭ, جابىرلەنۋشىلەردىڭ جانە قايعىلى اپاتتىڭ سەبەپتەرىن انىقتاۋ دەرەگى بويىنشا قورىتىندى جۇرگىزگەن ماماننىڭ ايعاقتارىنىڭ جيىنتىعى سوتتالعانداردىڭ كىناسىن تولىق دالەلدەدى, راستادى, انىقتادى», دەپ اتاپ ءوتتى ەكىباستۇز قالالىق سوتىنىڭ سۋدياسى ايجان بايگونشەكوۆا.
بۇعان قوسا, سوت جابىرلەنۋشىلەردىڭ مورالدىق زياندى وتەۋ تۋرالى تالاپتارىن قاناعاتتاندىرمادى. تاراپتار ءاربىر ەرەسەك ادامعا 5 ميلليون تەڭگەدەن جانە بالالارعا 25 ميلليون تەڭگەدەن ءوندىرىپ الۋدى سۇراعان ەدى. مۇنى سوت سوتتالۋشىلار بۇرىن «جابىرلەنۋشىلەرگە ەرىكتى تۇردە وتەماقى» جاساعاندىعىمەن ءتۇسىندىردى.
ايتا كەتەيىك, 2024 جىلعى 4 قاڭتاردا التىن كەنىشىندە ىشىندە ادامدار بار اۆتوبۋس جەر استىنا ءتۇسىپ كەتتى. اپات سالدارىنان ءتورت قۇتقارۋشى ەرلىكپەن قازا تاپتى. ولار – ايدوس شايمەردەن, ولەگ تىشكەۆيچ, سارقىت بەردىحان جانە ايىپ تىلەۋبەرگەنوۆ.
كەيىن «مايقايىڭالتىن» اق-نىڭ التىن كەنىشىندە ءتورت قۇتقارۋشىنىڭ ءومىرىن قيعان اپاتقا كىنالى تۇلعالار رەتىندە 6 ادام ۇستالدى. ولار — «مايقايىڭالتىن» اق-نىڭ بۇرىنعى باس ديرەكتورى قۋانىش بوتين جانە وندىرىستىك ۋچاسكەلەردى باسقارۋ, ينجەنەرلىك قۇرامداعى بەس ادام.
پاۆلودار وبلىسى
