ساڭلاقتاردىڭ توكيو تورىنەن بۇگىنگە دەيىنگى ولجالاعان جۇلدەسى جايىندا كەڭىنەن قامتىپ جازدىق. ءتورت جىلدا ءبىر رەت ۇيىمداستىرىلاتىن ءدۇبىرلى الاماننىڭ اقىرعى كۇندەرىندە دە سپورتشىلارىمىز ەل مەرەيىن ۇستەم ەتتى. گرەك-ريم كۇرەسىنەن بەلدەسۋگە تۇسكەن اندرەي سامارين 67 كگ سالماق دارەجەسىندە ىرىكتەۋ كەزەڭىن ءساتتى وتكىزدى. ءبىرىنشى بەلدەسۋىندە قىرعىز دىنمۇحامەد بيگەلديەۆتى 5:2 ەسەبىمەن ەڭسەرىپ, شيرەك فينالدىق تارتىستا بولگار بالۋانى ديليان ديميتروۆتى 8:0 ەسەبىمەن ۇپاي ۇستاتپادى. جارتىلاي فينالداعى قارسىلاسى ارميان جورا گرەگورياندى دا ءدال سونداي باسىمدىقپەن ىعىستىردى. فينالدىق تارتىستا يراندىق مەحدي باكشىنى 11:1 ەسەبىمەن تۋلاقتاي يلەپ جەڭىسكە جەتتى.
– مەن العاش رەت سۋردليمپيادا ويىندارىنا قاتىسقانىما قاراماستان ەلىمىزدىڭ ءۇمىتىن اقتاپ, التىن مەدال يەلەندىم. بۇل ءوزىمنىڭ عانا ەمەس, باپكەرلەرىمنىڭ دە جەڭىسى. ءبىز بۇعان توقمەيىلسىپ توقتاپ قالمايمىز, الدا ءالى دە ءدۇبىرلى دودالار وتەدى. مەنىڭ ماقساتىم ايقىن, ءۇش دۇركىن سۋردليمپيادا چەمپيونى اتانۋ, – دەيدى 21 جاستاعى تالانتتى بالۋان. الماتى وبلىسى, جامبىل اۋدانى, قارعالى اۋىلىنىڭ تۋماسى 2023 جىلى جاستار اراسىنداعى الەم چەمپيوناتىندا توپ جارىپ, ءوزىنىڭ مىقتىلىعىن دالەلدەگەن ەدى. بىلتىر مالايزيادا وتكەن ح ازيا–تىنىق مۇحيت ويىندارىنىڭ چەمپيونى اتاندى. ءساماريننىڭ التىن مەدالى جالپى ەسەپتەگى ناتيجەمىزدى دە جاقسارتا ءتۇستى.
ەركىن كۇرەستەن بەلدەسۋگە تۇسكەن بالۋاندارىمىز دا ەل ءۇمىتىن اقتاي ءبىلدى. ولار 1 التىن, 1 كۇمىس, 3 قولا مەدال ەنشىلەدى. شاديار پەرنەش (65 كگ) سۋردليمپيادا چەمپيونى اتانسا, عابيت ەسجانوۆ (57 كگ) – كۇمىس, ال عاسىر تۇرعانباي (74 كگ), سابىرجان رسالى (86 كگ), حايراتحاان شونكۋ (125 كگ) قولا جۇلدەنى قاناعات تۇتتى. سۋردليمپيادانىڭ ەكى دۇركىن چەمپيونى ح.شونكۋعا جانكۇيەرلەر دە, باپكەرلەر دە زور سەنىم ارتقان ەدى. الايدا جارتىلاي فينالدا ءسۇرىنىپ, التىن مەدالدان باستى ۇمىتكەر بالۋان قولا جۇلدەگە ازەر قول جەتكىزدى.
ۇستەل تەننيسىنەن ەرلەر قۇراماسىنا دا سۋردليمپيادانىڭ قولا مەدالى بۇيىردى. قانات قوڭقىباەۆ, دانيار ەسكەندىروۆ, بيجان تولەباەۆ, بۇركىتباي ابىلاي باستاعان جىگىتتەر الدىمەن كولۋمبيا قۇراماسىن 3:0 ەسەبىمەن ۇتىپ, پولشانىڭ ۇستەل تەننيسشىلەرىن 3:1 ەسەبىمەن جەڭدى. شيرەك فينالدىق سايىستا ۇندىستاندىق قارسىلاستارىن دا ايقىن ۇتىپ (3:0) جارتىلاي فينالدا قىتاي قۇراماسىنا ەسە جىبەردى دە, قولا مەدالدى ەنشىلەدى.
تاەكۆوندو دوداسىندا ايدا ماقاتوۆاعا (67 كگ) قولا مەدال بۇيىردى. ۆيكتور فرۋندين (+80 كگ) 5-ورىندى مىسە تۇتسا, ءمولدىر مۇقاشەۆا (+67 كگ) مەن رۋسلان احمەتوۆ (80 كگ) ىرىكتەۋ كەزەڭىنەن اسا المادى.
جەڭىل اتلەتيكا تارتىسىندا ۇزىندىققا سەكىرۋدەن فينالدا باعىن سىناعان فاينا مەيىرمانوۆا 5 م 17 سم ناتيجەسىمەن 8-ورىنعا تۇراقتادى. 5000 مەترلىك فينالدىق جۇگىرۋدە سىنعا تۇسكەن قۋانىش تەمىرباەۆ تا جۇلدەسىز قالدى. 4ح400 مەتر قاشىقتىققا ەستافەتالىق سايىستىڭ فينالىندا ايەلدەر قۇراماسى 4:45.92 ۋاقىتپەن 7-ورىنعا تۇراقتادى. ال وسى قاشىقتىقتا ەرلەر قۇراماسى 3:27.95 ناتيجەسىمەن 6-ورىن الدى.
جۇزۋدەن بىرنەشە قاشىقتىقتا سىنعا تۇسكەن سپورتشىلارىمىز جۇلدەنىڭ جالىنان ۇستاۋ بىلاي تۇرسىن, ىرىكتەۋ كەزەڭىنەن اسا العان جوق. بادمينتوننان دا ۇلتتىق قۇراما ءۇندىستان كومانداسىنا 0:5 ەسەبىمەن ەسە جىبەرىپ, توپتىق كەزەڭنەن
قايتتى.
سپورتشىلارىمىزدىڭ جالپى ەسەپتە 8 التىن 4 كۇمىس, 13 قولا مەدال ولجالاۋى – رەكوردتىق كورسەتكىش. بۇعان دەيىن ءبىزدىڭ قىز-جىگىتتەر ءدال مۇنداي مەجەدەن كورىنە العان ەمەس. جاپونيا ەلى وتكىزگەن سۋردليمپيادا سايىسىنا 81 ەلدەن كەلگەن ەستۋ قابىلەتىنە زاقىم كەلگەن 3 مىڭعا جۋىق سپورتشى 21 سپورت تۇرىنەن تارتىسقا ءتۇستى. ەلىمىزدەن اتتانعان 78 ساڭلاق 8 سپورت تۇرىنەن وراسان ناتيجە كورسەتتى. ەلىمىزدىڭ سۋردليمپياداشىلارى بۇعان دەيىن قاتىسقان ءتورت جىلدىق دوداسىندا ۇزدىك وندىققا ىلىنگەن ەمەس. بۇل جولى بىزگە 8-ورىن بۇيىردى. كوش باسىندا – 32 التىن, 38 كۇمىس, 29 قولا مەدال ولجالاعان ۋكراينا سپورتشىلارى تۇر. ەكىنشى ساتىدا بەيتاراپ كوماندا رەتىندە قوسىلعان سپورتشىلار تۇر. ولار 31 التىن, 12 كۇمىس, 7 قولا السا, ۇزدىك ۇشتىكتى تۇيىندەگەن اقش سۋردو سپورتشىلارى 17 التىن, 8 كۇمىس, 13 قولا مەدال يەلەندى.
