وتكەن جولى وتىرار كوشەسى 1/2 مەكەنجايىنداعى استانالىق مۋزەيلەر ديرەكتسياسىنا قاراستى ونەر مۇراجايىنا جولىمىز تۇسكەندە, وسى بورىك كوزىمىزگە وتتاي باسىلدى. ءبىر زالدى تۇتاسىمەن قامتىعان مۇنداعى ۇلتتىق باسكيىمدەر اۆتورى ەرنار ايتباەۆ «بولتىرىك بورىك» دەپ تانىستىردى. بولتىرىكتىڭ تەرىسىنەن تىگىلگەنى, جاس بالاعا ىقشامدالعانى بىردەن بايقالادى. سوندا اۆتوردىڭ مىنا ءبىر دەرەگىنە قايران قالدىق.
«بورىك ءسوزىنىڭ ءوزى ءبورى دەگەن سوزدەن شىققان. سوندىقتان ۇلتتىق باسكيىم اتاۋىنىڭ ءوزى ەڭ ەجەلگى تانىم-تۇسىنىكتەردەن باس تارتىپ, بۇگىنگە جالعاسىپ وتىر. ال جاس بالالارعا ارنايى تىككەن «بولتىرىك بورىكتىڭ» ءجونى بولەك. بالەن مىڭجىلدىق تاريحى بار حالقىمىز وسىنشاما كەڭىستىكتى اقىل-پاراساتى مەن قايسارلىعىنىڭ ارقاسىندا عانا ۇستاپ تۇرا العان. سوندىقتان بالالارى جاسىنان قايسار, قايتپاس مىنەزدى بولىپ ءوسسىن دەپ باسىنا بولتىرىك تەرىسىنەن بورىك تىگىپ كيگىزگەن», دەدى ەرنار ايتباەۆ.
ء«بورىنىڭ بولتىرىگى جاپ-جاس نويان» دەپ جىرلايتىن ەدى عوي «باتىر بايان» پوەماسىندا ماعجان جۇماباي ۇلى. باياعىدا نەبىر اڭشىلار ءبورىنىڭ قايسار مىنەزىنە قايران قالا اڭگىمەلەپ وتىرعانىنا قاراعاندا, اقىلعا قوناتىن ءسوز. قانشا قاقپانعا تۇسسە دە, قاسقىر قىڭسىلاپ جاتپايتىن كورىنەدى. تىلەرسەگىنەن قيىپ, سيراعىن قالدىرىپ كەتەتىنىن ايتاتىن قاقپانشىلار. باسقا اڭ اتاۋلى ءسىڭىرى مەن تەرىسىنە ءىلىنىپ جاتادى ەكەن. «ال بەلىنەن تۇسسە شە؟» دەيمىز عوي. «ونداي كەششەلىككە باراتىن قاسقىر اقىماق ەمەس» دەپ تىيىپ تاستاۋشى ەدى.
«بالانى جاستان» دەيتىن بابالار ۇرپاق تاربيەسىنە تەرەڭ ءمان بەرگەنى ءتانتى ەتپەي قويمايدى. قانشاما سىر بۇككەن «بولتىرىك بورىكتىڭ» ءبىر سيپاتى – وسى.
بەكجان باقىت
