فوتو: قورعانىس مينيسترلىگى
قورعانىس ءمينيسترى, اۆياتسيا گەنەرال-لەيتەنانتى داۋرەن قوسانوۆ ۆەدومستۆو جۇرگىزىپ جاتقان باسىم باعىتتار جونىندە بايانداپ, جاۋىنگەرلىك دايىندىقتى جەتىلدىرۋ, ينفراقۇرىلىمدى جاڭارتۋ, زاماناۋي قاۋىپسىزدىك ستاندارتتارىن ەنگىزۋ جانە تسيفرلاندىرۋ ۇدەرىستەرى جونىندە ەگجەي-تەگجەيلى توقتالدى. ونىڭ ايتۋىنشا, اسكەرگە شاقىرۋ ءراسىمىنىڭ اشىقتىعىن قامتاماسىز ەتۋ جانە اسكەري قىزمەتتىڭ قاۋىپسىز ورتاسىن قالىپتاستىرۋ ءۇشىن پارلامەنتپەن, قوعاممەن جانە اتا-انالار قوعامداستىعىمەن تۇراقتى ءارى ءتيىمدى بايلانىس قاجەت.
مينيستر مەرزىمدى قىزمەت اتقارىپ جۇرگەن ساربازدارمەن جۇمىستى كۇشەيتۋگە ەرەكشە ءمان بەرىلەتىنىن اتاپ ءوتتى. كومانديرلەردى دايارلاۋ تالاپتارى كۇشەيتىلىپ, نورماتيۆتىك-قۇقىقتىق بازا جەتىلدىرىلىپ, اسكەري قىزمەتشىلەردىڭ وتباسىلارىمەن بايلانىس ارتىپ كەلەدى.
جيىن بارىسىندا الەۋمەتتىك قولداۋ تەتىكتەرى دە ۇسىنىلدى. بيىل 2710 سارباز ءبىلىم گرانتتارىنا يە بولعان, ال 20 مىڭنان استام اسكەري قىزمەتشى جالپى سوماسى 8 ملرد تەڭگە بولاتىن كرەديتتىك دەمالىسقا قول جەتكىزگەن. سونىمەن قاتار «Smart ۆوەنكومات», Jauynger, Sarbaz 2.0, Askeri Ziyat سياقتى تسيفرلىق باستامالار مەن ارنايى وپەراتسيالار كۇشتەرىنە ارنالعان جاڭا كيىم ۇلگىلەرى تانىستىرىلدى.
سەنات دەپۋتاتى بيبىگۇل جەكسەنباي قورعانىس سالاسىندا اسكەري ومبۋدسمەن ينستيتۋتىن ەنگىزۋ ماسەلەسىن قاراستىرۋدى ۇسىندى. ونىڭ پىكىرىنشە, مۇنداي تەتىك اسكەري ورتا, قوعام جانە پارلامەنت اراسىنداعى بايلانىستى نىعايتىپ, ازاماتتاردىڭ جانە ساربازداردىڭ وتىنىشتەرىنە دەر كەزىندە جاۋاپ بەرۋگە مۇمكىندىك بەرەدى.
قوعامدىق ۇيىم وكىلدەرى رەسمي ءارى اشىق كوممۋنيكاتسيانىڭ ماڭىزىن اتاپ ءوتتى. «انالار جۇرەگى» سارباز انالارى كوميتەتىنىڭ جەتەكشىسى ليليا حايرۋللينا شىنايى اقپاراتتىڭ قوعامداعى سەنىمدى نىعايتىپ, جالعان اقپاراتتىڭ تارالۋىنا توسقاۋىل بولاتىنىن جەتكىزدى.
تالقىلاۋعا قازاقستان حالقى اسسامبلەياسىنىڭ مۇشەلەرى, اسكەري ساراپشىلار جانە باق وكىلدەرى دە اتسالىستى. «ايقىن» گازەتىنىڭ باس رەداكتورى امانگەلدى قۇرمەت اقپاراتتىق كەڭىستىكتە اسكەري سالاعا قاتىستى وڭ كوزقاراس قالىپتاستىرۋ ءۇشىن جۇيەلى جۇمىس قاجەت ەكەنىن ايتتى.
ءماجىلىس دەپۋتاتتارى بيىل قابىلدانعان اسكەري-پاتريوتتىق تاربيە, اۋماقتىق قورعانىس جانە رەزەرۆتىك قىزمەتكە قاتىستى ءۇش ماڭىزدى زاڭدى ەسكە سالا وتىرىپ, زاڭنامانى جەتىلدىرۋ كەرەك ەكەنىن اتاپ ءوتتى.
ارداگەرلەر – حالىق قاھارمانى گەنەرال-لەيتەنانت باقىتجان ەرتاەۆ پەن گەنەرال-مايور مارات ناعۇمانوۆ – جەكە قۇراممەن جۇمىس جۇرگىزۋ بويىنشا ءوز تاجىريبەلەرىن ءبولىسىپ, بىرقاتار ۇسىنىستارىن ورتاعا سالدى.
دوڭگەلەك ۇستەل فورماتى مەملەكەتتىك ورگاندار, كۇشتىك قۇرىلىمدار جانە قوعامدىق ۇيىم وكىلدەرىنىڭ ورتاق ۇستانىمدارىن بىرىكتىرۋگە مۇمكىندىك بەردى. جيىن قورىتىندىسى بويىنشا اسكەري قىزمەتشىلەر مەن ولاردىڭ وتباسىلارىن الەۋمەتتىك قورعاۋدى كۇشەيتۋ, قىزمەت جاعدايلارىن جاقسارتۋ جانە جاستاردى اسكەري-پاتريوتتىق تاربيەلەۋ سالاسىندا زاڭ شىعارۋشىلاردىڭ, مەملەكەتتىك ورگاندار مەن قوعامنىڭ بىرلەسكەن جۇمىسىنا باعىتتالعان بىرقاتار ۇسىنىستار ازىرلەندى
