شىمكەنت تۋماسى اسەل يبادۋللا وسىنداي بيىك بەلەستى باعىندىرىپ, ەل جاستارىنا جاڭا ءورىس اشتى. ول – اتى اڭىزعا اينالعان ستەنفورد ۋنيۆەرسيتەتىنىڭ دوكتورانتۋراسىنا قابىلدانعان تۇڭعىش قازاق قىزى.
اسەل شىمكەنت قالاسىندا قاراپايىم وتباسىندا دۇنيەگە كەلگەن. اكەسى – كران جۇرگىزۋشىسى, اناسى – مەكتەپ مۇعالىمى. 8-سىنىپتا نازارباەۆ زياتكەرلىك مەكتەبىنىڭ گرانتىن جەڭىپ العان ول بولاشاق ارمانىنا قول جەتكىزۋ ءۇشىن بارىن سالدى.
9-سىنىپتى اياقتاعاننان كەيىن اقش-قا بارىپ, بوستون قالاسىندا ەكى اپتالىق وقۋ باعدارلاماسىنا قاتىسادى. گارۆارد سەكىلدى ايگىلى ۋنيۆەرسيتەتتەردىڭ اتموسفەراسىن سەزىنگەن جاس تۇلەكتىڭ جۇرەگىندە ۇلكەن ارمان ويانادى. كۇندەردىڭ كۇنىندە مەن دە وسىندا وقيمىن دەگەن ماقسات تۋادى. الايدا اتا-اناسى 16 جاستاعى قىزدارىن جات ەلگە جالعىز جىبەرۋگە باتپايدى, رۇقسات بەرمەيدى. بىراق بۇل شەشىم تالاپكەردىڭ ارمان وتىن وشىرمەي, ءبىلىمىن ەلىمىزدە تەرەڭدەتۋگە يتەرمەلەدى.
ءسويتىپ, اسەل وقۋىن ەلورداداعى نازارباەۆ ۋنيۆەرسيتەتىندە جالعاستىرادى. «بيولوگيا عىلىمدارى» بويىنشا ۇزدىك ناتيجە كورسەتىپ, باكالاۆرياتتى قىزىل ديپلوممەن ءتامامدايدى. وسىلايشا عىلىمي الەۋەتىنىڭ جوعارى ەكەنىن اينالاسىنا دالەلدەيدى. بۇدان سوڭ وعان اقش-تىڭ التى ۋنيۆەرسيتەتى ماگيستراتۋراعا شاقىرتۋ جىبەرەدى. بىراق ول الەمگە ايگىلى ستەنفورد ۋنيۆەرسيتەتىن تاڭدايدى.
تاڭداعان ۋنيۆەرسيتەتى جاس عالىمنىڭ الەۋەتىن باعالاپ, ونىڭ وقۋىنا جانە عىلىمي زەرتتەۋلەرىنە جالپى 350 ميلليون تەڭگەگە جۋىق گرانت بولەدى. بۇل – تەك وقۋ اقىسى ەمەس, بولاشاق زەرتتەۋشىنىڭ مۇمكىندىكتەرىنە دەگەن ۇلكەن سەنىم.
اسەل يبادۋللانىڭ بۇل جەتىستىگى – تاباندىلىق پەن ەڭبەك ارقىلى كەز كەلگەن قيىندىقتى مۇمكىندىككە اينالدىرۋعا بولاتىنىن كورسەتەتىن مىسال. قاراپايىم وتباسىنان شىعىپ, الەمدىك دەڭگەيدەگى عىلىم ورداعا جولداما الۋ قازاق جاستارى الەۋەتىنىڭ قانشالىقتى جوعارى ەكەنىن بىلدىرەدى.
اسەلدىڭ جەتىستىگى – جاس بۋىن ءۇشىن ۇلكەن شابىت, قازاق قىزىنىڭ قايسارلىعى مەن بىلىمدىلىگىنىڭ كورىنىسى.
