فوتو: Depositphotos.com
ۇيىمداستىرۋشىلار ازاماتتارعا «HALYK QUATY» تۇتىنۋ كووپەراتيۆىنە كىرۋدى ۇسىنىپ, تۇرعىن ءۇي مەن اۆتوكولىكتى پايىزسىز ءبولىپ تولەۋگە الۋ ءۇشىن پاي جارنالارىن سالۋعا يلاندىرعان. ءوز قىزمەتىن سايت پەن الەۋمەتتىك جەلىلەر ارقىلى جارنامالاپ, ء«ار وتباسىنا باقىت!» دەگەن ۇرانمەن «حالىقتىق كووپەراتيۆ» بەينەسىن جاساعان.
اتالعان تۇتىنۋ كووپەراتيۆى زاڭسىز پايدالانعانى ءۇشىن اكىمشىلىك جاۋاپكەرشىلىككە تارتىلعاننان كەيىن كووپەراتيۆتىڭ اتاۋى «ELL QUATY» بولىپ وزگەرتىلگەن.
جاڭا سالىمشىلاردى تارتۋ ءۇشىن باسشىلىق ءتۇرلى ماركەتينگتىك اكتسيالار ۇيىمداستىرعان, ونىڭ ىشىندە «كۇنشۋاقتى تۇركيا» تۋريستىك جولدامالارىن ۇتىسقا تىگۋمەن دە اينالىسقان.
قىلمىستىق كىرىستەردى زاڭداستىرۋ ماقساتىندا ۇيىمداستىرۋشى ءوز اتىنا «QAZ INFO MARKET» جشس-ءىن تىركەپ, شوتىنا سالىمشىلاردىڭ قاراجاتىن (كورسەتىلمەگەن كاسىبي, عىلىمي جانە تەحنيكالىق قىزمەتتەر ءۇشىن) اۋدارىپ وتىرعان.
24.kz مالىمەتىنشە, پيراميداعا 1,5 مىڭنان استام سالىمشى تارتىلىپ, ولار 6,8 ملرد تەڭگە سالعان.
ۇيىمداستىرۋشى قاماۋعا الىندى, تەرگەۋ جالعاسىپ جاتىر, وزگە اقپارات جاريالاۋعا جاتپايدى.
