بيۋرودا اتاپ وتىلگەندەي, سەناتتىڭ ءىس-شارالار جوسپارىنا سايكەس دەپۋتاتتار وسى اپتادا يندۋستريالىق ايماقتاعى وڭدەۋشى ونەركاسىپ كاسىپورىندارىنىڭ قىزمەتى, ماشينا جاساۋدى دامىتۋ, اۋىل شارۋاشىلىعى سالاسىن ءارتاراپتاندىرۋ جانە اۋىل شارۋاشىلىعى ونىمدەرىن تەرەڭ وڭدەۋ جونىندەگى ءىرى جوبالاردى ۇلعايتۋ (شاردارا اۋدانىنداعى كراحمال مەلاسساسىن ءوندىرۋ جونىندەگى جاڭا يننوۆاتسيالىق كاسىپورىن بازاسىندا) ماسەلەلەرى بويىنشا مۇددەلى تاراپتارمەن بىرقاتار كەزدەسۋ وتكىزەدى. اتالعان ءىس-شارالاردىڭ قاتارىندا قازاقستانداعى تسيفرلىق اكتيۆتەر يندۋسترياسىنا جانە سوت-ساراپتاما قىزمەتىنە قاتىستى ماسەلەلەر تالقىلاناتىن كەزدەسۋلەر دە بار.
ماۋلەن اشىمباەۆ مەملەكەت باسشىسىنىڭ ەكونوميكانى ءارتاراپتاندىرۋ جونىندەگى تاپسىرماسىنا نازار اۋدارىپ, ونى ىسكە اسىرۋ ءۇشىن باسەكەگە قابىلەتتى, تەرەڭ وڭدەلگەن ءونىم شىعارۋعا باسىمدىق بەرۋ ايرىقشا مانگە يە ەكەنىن ايتتى. وسىعان بايلانىستى دەپۋتاتتار ماشينا جاساۋ ماسەلەلەرى بويىنشا ارنايى زاڭ جوباسىن ازىرلەدى. سالانى دامىتۋعا قاجەتتى زاڭنامالىق تۇزەتۋلەر جانە باسقا دا باستامالار سەناتتىڭ تۇراقتى كوميتەتتەرىنىڭ الداعى وتىرىستارىندا مۇددەلى تاراپتارمەن بىرگە جان-جاقتى تالقىلانادى.
سونداي-اق بيۋرو مۇشەلەرى سەنات وتىرىسىندا قارالاتىن ماسەلەلەردىڭ كۇن ءتارتىبىن ايقىندادى. سوعان سايكەس الداعى بەيسەنبىدە سەناتورلار «1992 جىلعى شەكاراارالىق سۋ ارنالارى مەن حالىقارالىق كولدەردى قورعاۋ جانە پايدالانۋ جونىندەگى كونۆەنتسياعا سۋ جانە دەنساۋلىق پروبلەمالارى تۋرالى حاتتامانى راتيفيكاتسيالاۋ تۋرالى» زاڭدى قارايدى. حاتتاما سۋ رەسۋرستارىن تۇراقتى باسقارۋ ەسەبىنەن, سونداي-اق سۋمەن بايلانىستى اۋرۋلاردىڭ تارالۋ دارەجەسىن بولدىرماۋ جانە شەكتەۋ ارقىلى حالىقتىڭ دەنساۋلىعى مەن ءال-اۋقاتىن قورعاۋدى قامتاماسىز ەتۋگە باعىتتالعان. اتالعان قۇجاتتىڭ نەگىزگى ماقساتتارى ورنىقتى دامۋ ماقساتتارىمەن ستراتەگيالىق تۇرعىدان كوررەلياتسيالانادى.
سونىمەن قاتار «قازاقستان رەسپۋبليكاسى ۇكىمەتى مەن رف ۇكىمەتى اراسىنداعى «چەليابى مەملەكەتتىك ۋنيۆەرسيتەتى» جوعارى ءبىلىم بەرۋدىڭ فەدەرالدىق مەملەكەتتىك بيۋدجەتتىك ءبىلىم بەرۋ مەكەمەسى قوستاناي فيليالىنىڭ جۇمىس ىستەۋى تۋرالى كەلىسىمدى راتيفيكاتسيالاۋ تۋرالى» زاڭ پالاتا وتىرىسىنىڭ كۇن تارتىبىنە شىعارىلدى. كەلىسىمدە جازىلعانداي, فيليالدا وقۋ ەكى مەملەكەتتىڭ مەملەكەتتىك جالپىعا مىندەتتى جوعارى ءبىلىم بەرۋ ستاندارتتارىنا سايكەس قازاق, ورىس جانە باسقا تىلدەردە جۇرگىزىلمەك.
ءىس-شارادا سەنات دەپۋتاتتارى ءماجىلىس قابىلداعان زاڭداردى جۇمىس ءۇشىن تۇراقتى كوميتەتتەرگە ءبولىپ بەردى.
