نەگىزگى باسقوسۋلار شونجى اۋىلىنىڭ مادەنيەت ۇيىندە, سونداي-اق اۋداننىڭ وزگە دە الاڭدارىندا ۇيىمداستىرىلدى. باعدارلامانىڭ باستى ماقساتى – ۇيعىر اۋدانىنىڭ رۋحاني الەۋەتىن ىلگەرىلەتۋ, ۇلتتىق قۇندىلىقتاردى دارىپتەۋ, عىلىم مەن شىعارماشىلىقتى قولداۋ جانە ءوسىپ كەلە جاتقان ۇرپاققا دۇرىس باعىت-باعدار بەرۋ بولدى.
فورۋمدار اياسىندا ءبىلىم بەرۋ جۇيەسىنىڭ جەتىستىكتەرى مەن عىلىمي زەرتتەۋلەرگە ارنالعان پىكىرتالاس الاڭدارى جۇمىس ىستەدى. قازاقستاندا جانە شەتەلدە ءبىلىم الىپ جۇرگەن جاس عالىمداردىڭ قاتىسۋىمەن پلەنارلىق وتىرىستار ءوتتى. قوناقتارعا ءبىلىم بەرۋ ۇيىمدارىنىڭ كورمەلەرى ۇسىنىلىپ, جەتەكشى پروفەسسورلار مەن عالىمدار مازمۇندى باياندامالار جاسادى. سونىمەن قاتار, 9–11 سىنىپ وقۋشىلارىنا ارنالعان تانىمدىق جانە كاسىبي باعىتتاعى سەكتسيالار ۇيىمداستىرىلدى.
ادەبيەت پەن مادەنيەت كۇنى اياسىندا اۋداننان شىققان اقىندار, جازۋشىلار, اكتەرلەر مەن ونەر قايراتكەرلەرىنىڭ قاتىسۋىمەن شىعارماشىلىق كەزدەسۋ ءوتتى. جيىندا ۇلتتىق رۋح, ونەردىڭ قوعامدىق دامۋداعى ءرولى جانە ۇرپاقتار ساباقتاستىعى ماسەلەلەرى ءسوز بولدى.
سپورت پەن دەنساۋلىق كۇنىنە ارنالعان ءىس-شارالاردا دزيۋدو, بوكس جانە قازاق كۇرەسى بويىنشا شەبەرلىك ساباقتارى مەن كورسەتىلىمدەر ۇيىمداستىرىلدى. جاس سپورتشىلار تالىمگەرلەرمەن جانە قوعام قايراتكەرلەرىمەن كەزدەسىپ, ولاردىڭ ومىرلىك تاجىريبەسى مەن موتيۆاتسيالىق كەڭەستەرىن تىڭدادى. اشىق سپورت الاڭدارىندا تۇرعىندارعا ارنالعان جاتتىعۋلار وتكىزىلدى, بۇل ءوز كەزەگىندە سالاۋاتتى ءومىر سالتىن ناسيحاتتاۋعا ىقپال ەتتى.
اۋىل شارۋاشىلىعى مەن كاسىپكەرلىك كۇنى ايەلدەردىڭ بيزنەس پەن اۋىلدىق باستامالاردى دامىتۋداعى رولىنە ارنالدى. فورۋمعا قاتىسۋشى ايەلدەر كاسىپكەرلىكتىڭ مۇمكىندىكتەرىن, ەكونوميكالىق بەلسەندىلىكتى ارتتىرۋ ماسەلەلەرىن جانە قوعامدىق ومىردەگى ايەلدەردىڭ الەۋمەتتىك ماڭىزىن تالقىلادى. وسى كۇنى ماراپاتتاۋ راسىمدەرى ءوتىپ, وتاندىق تاۋار وندىرۋشىلەردىڭ كورمەسى ۇيىمداستىرىلدى.
فورۋمداردىڭ قورىتىندى سەرياسىندا قوناقتارعا «مادەنيەت – ۇلت ايناسى» اتتى كورمە ۇسىنىلىپ, «تاريح پاراقتارىنداعى 90 جىل» اتتى دەرەكتى فيلم كورسەتىلدى. اۋداننىڭ بولاشاق دامۋ مودەلىنە ارنالعان جاساندى ينتەللەكت AiSharyn ازىرلەگەن تسيفرلىق جوبا كوپشىلىكتىڭ ەرەكشە قىزىعۋشىلىعىن تۋدىردى. مەرەكەلىك باعدارلاما «شارىن – شاتتىق مەكەنى» اتتى كونتسەرتپەن اياقتالدى.
بەس كۇنگە سوزىلعان اۋقىمدى باعدارلاما قارادالا ءوڭىرىنىڭ مادەني مۇراسىن, قازىرگى الەۋەتىن جانە بىرلىك, جاڭارۋ مەن جاسامپازدىققا نەگىزدەلگەن دامۋ ۇمتىلىسىن كەڭىنەن تانىتقان ماڭىزدى وقيعا بولدى.
الماتى وبلىسى.
