قازاقستانداعى جەڭىل اۆتوكولىكتەر مەن جەڭىل كوممەرتسيالىق كولىكتەرگە ارنالعان ليزينگ قىزمەتتەرىنىڭ كولەمى سوڭعى جىلدارى اۋىتقىپ وتىر. Finprom.kz دەرەگىنشە 2018 جىلى نارىق كولەمى 4,5 ملرد تەڭگەدەن اسسا, 2019 جىلى ول 1,6 ملرد تەڭگەگە دەيىن ازايدى. 2020 جىلى كەرىسىنشە كۇرت ءوسىم بايقالىپ, كورسەتكىش 11,2 ملرد تەڭگەگە جەتتى. الايدا شارىقتاۋ كەزەڭىنەن كەيىن سەكتور قايتا قۇلدىراپ, 2024 جىلى جىلدىق كولەم 1,1 ملرد تەڭگەگە دەيىن تومەندەدى.
اۋىلدىق جەرلەردىڭ ۇلەسى دە ايتارلىقتاي قۇبىلىپ وتىردى. 2018 جىلى اۋىلعا تيەسىلى ۇلەس شامامەن 13% نەمەسە 592 ملن تەڭگەنى قۇراسا, 2020 جىلى بۇل كورسەتكىش نەبارى 0,1%-عا دەيىن تومەندەدى. كەيىن ءۇردىس بىرتىندەپ قالپىنا كەلىپ, 2023 جىلى اۋىلدىق اۋماقتاردىڭ ۇلەسى 3,7%-عا, ال 2024 جىلى 15,5%-عا دەيىن ءوستى.
2024 جىلدىڭ ءبىرىنشى جارتىجىلدىعىندا جەڭىل اۆتوكولىكتەردى ليزينگكە بەرۋ كولەمى 846,1 ملن تەڭگەنى قۇراعان, ال 2025 جىلدىڭ العاشقى التى ايىندا بۇل كورسەتكىش 11,6%-عاي ءوسىپ 944,4 ملن تەڭگەگە جەتتى. دەگەنمەن اۋىلدىق سەكتوردا جاعداي كەرىسىنشە: كورسەتكىش 153,3 ملن تەڭگەدەن 46,7 ملن تەڭگەگە دەيىن تومەندەپ, 3,3 ەسە قىسقاردى, ال اۋىل ۇلەسى 18,1%-دان 4,9%-عا دەيىن ازايدى.
جەكە تۇلعالار ەسەبىنەن كورسەتىلەتىن ليزينگ قىزمەتتەرى جىلدار بويى تومەن دەڭگەيدە قالىپ, نارىقتى نەگىزىنەن كورپوراتيۆتىك سەگمەنت قامتاماسىز ەتتى. 2018 جانە 2019 جىلدارى حالىق قاتىسقان ليزينگ كولەمى نەبارى 32 ملن جانە 28,4 ملن تەڭگەنى قۇرادى, اۋىلدىق ايماقتاردا مۇلدە قىزمەت كورسەتىلمەدى. 2020–2021 جىلدارى بۇل باعىتتا كۇتپەگەن ءوسىم تىركەلىپ, حالىق ۇلەسى تيىسىنشە 23% جانە 27,7%-عا دەيىن جەتتى, ال كولەم 2,6 ملرد جانە 2,2 ملرد تەڭگەنى قۇرادى. الايدا اۋىلداعى كورسەتكىش بىرنەشە ءجۇز مىڭ تەڭگەدەن اسپادى. 2022 جىلى حالىقتىڭ ۇلەسى قايتا 12,3%-عا دەيىن تومەندەپ, 2023–2024 جىلدارى 3%-عا دە جەتپەدى. 2023 جىلى حالىق ەسەبىنەن كورسەتىلەتىن بارلىق ليزينگتىك قىزمەت تەك اۋىلدىق جەرلەرگە تيەسىلى بولدى, ءدال وسىنداي جاعداي 2024 جىلى دا قايتالاندى.
2025 جىلدىڭ قاڭتار–ماۋسىم ايلارىندا جەكە تۇلعالار ەسەبىنەن ليزينگ كولەمى 3,8 ەسە ءوسىپ, 84,9 ملن تەڭگەگە جەتتى, ال نارىقتاعى ۇلەسى 2,1%-دان 9%-عا دەيىن ارتتى. دەگەنمەن بۇل كورسەتكىشتەر تۇراقتى ترەندتىڭ قالىپتاسقانىن بىلدىرمەيدى, سەبەبى اۋىلدىق ايماقتاردىڭ ۇلەسى قايتا نولگە جاقىندادى. بۇل نارىقتىڭ حاوتيكالىق سيپاتىن كورسەتەدى: كەي جىلدارى سۇرانىس تەك قالادا, كەلەسى جىلدارى تەك اۋىلدا قالىپتاسادى.
جالپى العاندا, جەكە تۇلعالارعا ارنالعان اۆتوليزينگ نارىعى ءالى دە تار جانە تۇراقسىز. نارىق كولەمى كەي جىلدارى ميللياردتاعان تەڭگەگە جەتسە, كەيدە ونداعان ميلليونعا دەيىن تومەندەيدى. سوندىقتان جەلتوقساندا ىسكە قوسىلاتىن جاڭا باعدارلاما دەر كەزىندە قابىلدانعان باستاما بولىپ وتىر. قولدانىستاعى دەرەكتەر كورسەتىپ وتىرعانداي, ارنايى قولجەتىمدى باعدارلاما بولماعان جاعدايدا تۇرمىستىق اۆتوليزينگ قالادا دا, اۋىلدا دا تۇراقتى دامۋعا قابىلەتتى ەمەس.
باعدارلاما اۋىلدىق جەرلەر ءۇشىن دە ماڭىزدى ءرول اتقارۋى مۇمكىن. ەگەر ليزينگتىك كومپانيالاردىڭ وڭىرلىك فيليالدارى بەلسەندى تۇردە قاتىسسا, توزىعى جەتكەن جەڭىل اۆتوپاركىنى جاڭارتۋ مۇمكىندىگى ارتادى. بىرقاتار وبلىستاردا 20 جىلدان اسقان كولىكتەردىڭ كوپتىگىن ەسكەرسەك, بۇل اۋىلدار ءۇشىن اسا وزەكتى ماسەلە بولىپ وتىر.
