ىشكى ىستەر مينيسترلىگىنىڭ مالىمەتىنشە, ساياساتكەر تەمىرلان سۇلتانبەكوۆ قاماۋعا الىندى, ونىڭ ۇيىندە ءتىنتۋ جۇرگىزىلگەن. ول بيلىكتى وزگەرتۋگە شاقىردى دەگەن كۇدىككە ىلىنگەن. ۆەدومستۆو بۇل دەرەك بويىنشا «جاپپاي تارتىپسىزدىكتەر» بابىمەن قىلمىستىق ءىس قوزعالعانىن حابارلادى. سونداي-اق جەرگىلىكتى اقپارات قۇرالدارى بۇرىن ەكونوميكالىق قىلمىستارعا قارسى كۇرەس قىزمەتىن باسقارعان سىيمىك جاپىكەەۆتىڭ دە ۇستالعانىن جازدى.
ءتىنتۋ شارالارى بۇرىنعى دەپۋتاتتار كۋبانىچبەك قادىروۆ پەن شايلووبەك اتازوۆتىڭ ۇيلەرىندە دە وتكىزىلگەن. قادىروۆتىڭ ايتۋىنشا, تەرگەۋ ارەكەتتەرى ءدال وسى قىلمىستىق ىسقا بايلانىستى. تەرگەۋگە سۇراق الۋ ءۇشىن بۇرىنعى پرەزيدەنت المازبەك اتامباەۆتىڭ جۇبايى رايسا اتامباەۆا مەن ۇلى قادىربەك اتامباەۆ شاقىرىلعان. ال اتامباەۆتىڭ قىزى اليا شاگيەۆا ورىن الىپ جاتقان جاعدايدى «ساياسي قۋدالاۋ, ادام قۇقىقتارى مەن ءسوز بوستاندىعىن بۇزۋ» دەپ اتادى.
بۇعان دەيىن, قىركۇيەك ايىنىڭ ورتاسىندا بىشكەك سوتى تاۋەلسىز «كلووپ» پورتالىنىڭ بۇرىنعى ەكى قىزمەتكەرىن جاپپاي تارتىپسىزدىكتەرگە شاقىرۋ ايىبى بويىنشا 5 جىلعا باس بوستاندىعىنان ايىرۋعا ۇكىم ەتكەن ەدى. ەكى بۋحگالتەرگە 3 جىلدىق پروباتسيا تاعايىندالدى. ايىپتاۋ تاراپىنىڭ نۇسقاسى بويىنشا, ولار جۋرناليست بولوت تەميروۆپەن بىرگە ەل باسشىلىعىنا قاتىستى «نەگىزسىز سىن جانە جالعان اقپارات» جاريالاعان.
ەسكە سالا كەتەيىك, قىرعىزستاندا 30 قاراشادا كەزەكتەن تىس پارلامەنت سايلاۋى وتەدى. العاشىندا داۋىس بەرۋ 2026 جىلدىڭ قاراشاسىنا جوسپارلانعان, الايدا 25 قىركۇيەكتە دەپۋتاتتار ءوز وكىلەتتىگىن مەرزىمىنەن بۇرىن توقتاتقان.
