سەمەيدە وتكەن «التىن كۇز» اتتى سالتاناتتى شارادا جىل قورىتىندىسى شىعارىلىپ, ءوڭىردىڭ ۇزدىك ەڭبەككەرلەرى ماراپاتتالدى. وبلىستىڭ اۋىل شارۋاشىلىعى جالپى ءونىمىنىڭ كولەمى 404 ملرد تەڭگەدەن استى. مال شارۋاشىلىعى مەن قايتا وڭدەۋ سالاسىندا ءوسىم بايقالادى, جاڭا كاسىپورىندار اشىلۋدا. بيىل اۋىل شارۋاشىلىعى قۇرىلىمدارى 446 جاڭا تەحنيكا ساتىپ العان.
اباي وبلىسىنىڭ اكىمى بەرىك ءۋالي ءوڭىر اگرارشىلارىنىڭ ەڭبەگىن جوعارى باعالادى.
«بۇل جىلى اۋقىمدى جۇمىس اتقارىلدى, اۋىل شارۋاشىلىعى مەن مال شارۋاشىلىعى سالاسىندا بولاشاققا جوسپارلار بەلگىلەندى. بارلىق جەتىستىكتەر – سىزدەردىڭ ەڭبەكتەرىڭىزدىڭ, تاباندىلىقتارىڭىز بەن جانكەشتىلىكتەرىڭىزدىڭ ناتيجەسى. ءوڭىردىڭ دامۋىنا قوسقان ۇلەستەرىڭىز وتە قىمبات», – دەدى ول.
بيىل وڭىردە العاش رەت اگروسفەرانىڭ ۇزدىك ماماندارىنا اۆتوكولىكتەر تابىستالدى. جەڭىمپازدار «ۇزدىك شوپان», «ۇزدىك مەحانيزاتور», «ۇزدىك تەحنولوگ», «ۇزدىك تراكتورشى» نوميناتسيالارى بويىنشا انىقتالدى.
سونىمەن قاتار «قۇرمەت» وردەنى, «داڭق» وردەنىنىڭ III دارەجەسى, «ەڭبەك ۇزدىگى», «ەڭبەك ارداگەرى» مەدالدارى تاپسىرىلدى.
«ۇزدىك شوپان» اتانعان ەرجان مەلسوۆ اۋىل شارۋاشىلىعىنا نازاردى كۇشەيتۋ قاجەت ەكەنىن ايتتى.
«قازىر اسىرەسە جاستار اراسىندا قوي باعۋمەن اينالىساتىندار از. اۋىل – ەلدىڭ ءتۇپ قازىعى دەيدى. اۋىلداردىڭ دامۋى – مەملەكەتتىڭ وركەندەۋى. سوندىقتان اۋىلعا جانە اۋىل شارۋاشىلىعىنا كوبىرەك كوڭىل ءبولۋ كەرەك», – دەدى ول.
فەرمەر مۇحامەتحان اسانبەكوۆ ەڭبەگىنىڭ جوعارى باعالانعانىنا ريزاشىلىعىن ءبىلدىردى.
«ەڭبەگىمنىڭ وسىلاي قۇرمەتتەلگەنىنە قۋانىشتىمىن. بۇل شابىت بەرەدى, العا جەتەلەيدى. بارشاڭىزعا راقمەت, ومىرىمىزدە مۇنداي قۋانىشتى ساتتەر كوپ بولسىن», – دەدى ول.
شارا بارىسىندا اۋىل ەڭبەككەرلەرىنىڭ كاسىبي جەتىستىكتەرى عانا ەمەس, وڭىردەگى اگرارلىق سالانىڭ دامۋ باعىتتارى دا اتاپ ءوتىلدى.
