سۋرەتتى تۇسىرگەن – ەرلان ومار, «ەQ»
كوشەنىڭ اشىلۋ راسىمىنە قازاقستان رەسپۋبليكاسى پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, ارمەنيا رەسپۋبليكاسىنىڭ ۆيتسە-پرەمەرى مگەر گريگوريان, قر مادەنيەت جانە اقپارات ءمينيسترى ايدا بالاەۆا, ارمەنيا رەسپۋبليكاسىنىڭ ءبىلىم, عىلىم, مادەنيەت جانە سپورت ءمينيسترى جاننا اندرەاسيان, ارميان دياسپوراسىنىڭ وكىلدەرى, قوعام قايراتكەرلەرى قاتىستى.
ەسكە سالساق, استانادا مەسروپ ماشتوتس اتىنداعى كوشەنىڭ اشىلاتىنى تۋرالى العاش رەت مەملەكەت باسشىسى قاسىم-جومارت توقاەۆتىڭ 2024 جىلعى ساۋىردە ەرەۆانعا جاساعان رەسمي ساپارى بارىسىندا جاريالانعان ەدى.
سالتاناتتى جيىندا ايدا بالاەۆا كوشەنىڭ اشىلۋى ەكى حالىقتىڭ دوستىق, ءوزارا مادەني بىرلىكتى نىعايتۋعا دەگەن ۇمتىلىسىنىڭ جاڭا ءرامىزى ەكەنىن ايتتى.
– ءىس-شارا – ارميان حالقىنا دەگەن قۇرمەتىمىز بەن دوستىق پەيىلىمىزدىڭ بەلگىسى. وسى جىلدىڭ ءساۋىر ايىندا ەرەۆاندا قازاقتىڭ ۇلى اقىنى اباي قۇنانباي ۇلى اتىنداعى ساياباق اشىلدى. ەندى ول جەردە ويشىلدىڭ قۇندى مۇراسى ۇلىقتالادى. قازاقستاندا مەسروپ ماشتوتستىڭ ەسىمى بەرىلگەن كوشەنى اشۋ ارقىلى ءبىز وسى يگى قادامعا قۇرمەتپەن جاۋاپ بەرىپ, رۋحاني مۇرا – مادەنيەتتەرىمىز قوس وزەننىڭ ساعاسىنداي توعىساتىن, ءبىر-ءبىرىن بايىتا تۇسەتىن كەڭىستىك ەكەنىن تاعى ءبىر دالەلدەيمىز, – دەدى ا.بالاەۆا.
مەسروپ ماشتوتس – ارمەنيا بۇگىنگە دەيىن قولداناتىن 36 ارىپتەن تۇراتىن الىپپەنى جاساپ, سول ۇلتتىڭ ءتىلىن, مادەنيەتىن دامىتۋعا ەلەۋلى ۇلەس قوسقان تۇلعا. جاننا اندرەاسيان ارميان عالىمىنىڭ ەسىمىن ۇلىقتاۋ حالىقتاردىڭ ءوزارا قۇرمەتى مەن دوستىعى, مادەني ىنتىماقتاستىعى تاريحىنداعى جاڭا بەلەس ەكەنىن اتاپ ءوتتى.
– ەرەۆاندا اباي ساياباعىنىڭ, ەندى مىنە, استاناداعى ماشتوتس كوشەسىنىڭ اشىلۋى ەكى ەل مادەنيەتىن جالعاعان كوپىر ىسپەتتى. بۇل كوپىر ارقىلى تەك ۇلى تۇلعالاردىڭ ەسىمدەرى ەمەس, بەيبىتشىلىك پەن ءبىلىم, شىعارماشىلىق پەن دوستىق سياقتى ورتاق قۇندىلىقتار دا ۇرپاقتان-ۇرپاققا تارايدى. ارمەنيا مەن قازاقستان – تاريحى تەرەڭ, ۇلى ويشىلدارىنىڭ رۋحاني مۇراسىن ۇلىقتاپ, كەلەشەككە ۇمتىلعان مەملەكەتتەر. ەكى ەل اراسىنداعى ىنتىماقتاستىق قاشاندا ءبىر-ءبىرىن تولىقتىرىپ, بايىتىپ وتىراتىن سەرىكتەستىككە نەگىزدەلگەن. سوندىقتان ماشتوتس كوشەسىنىڭ اشىلۋى ءبىزدىڭ مادەني جانە ءبىلىم سالاسىنداعى بايلانىستارىمىزدى جاڭا دەڭگەيگە كوتەرەتىن ماڭىزدى قادام دەپ بىلەمىن, – دەدى ارمەنيا رەسپۋبليكاسىنىڭ ءبىلىم, عىلىم, مادەنيەت جانە سپورت ءمينيسترى.
ءىس-شارا ارمەنيا پرەمەر-ءمينيسترى نيكول پاشينياننىڭ رەسمي ساپارى اياسىندا ءوتتى.
