كارتينانىڭ اكتەرلىك قۇرامىندا تانىمال اكتەرلەر مەن قازاقستاندىق كينونىڭ جاڭا ەسىمدەرى بار: قوبىلاندى بولات, ءازيز بەيشەناليەۆ, نۇرجان سادىبەكوۆ, قايرات ادىلگەرەي, باحتيار قوجا, رامازان امىرعاليەۆ, نازار شارحان, اسان ءماجيت جانە باسقا دا اكتەرلەر.
پرەمەرا الدىندا رەجيسسەر نۇرجان ەركىن ۇلى استانانىڭ سەريالدىڭ نۋار ستيلىندەگى ۆيزۋالدى تىلىنە قالاي اسەر ەتكەنىن بايانداپ بەردى.
«كادرداعى سۋىق پاليترا كەيىپكەرلەردىڭ كۇيىنە, ءىس-ارەكەتىنە تىكەلەي ىقپال ەتەدى. بۇل جەردە قالا – جاي فون ەمەس, وقيعانىڭ تولىققاندى قاتىسۋشىسى», – دەدى ول.
رەجيسسەردىڭ ايتۋىنشا, ءتۇسىرىلىم تولىعىمەن استانادا وتكەن, سوندىقتان كورەرمەندەر قالانىڭ كوپتەگەن تانىمال لوكاتسيالارىن كورە الادى.
ۆيزۋالدى شەشىم مەن تۇستىك وڭدەۋگە گولليۆۋدتا 30 جىلدان استام تاجىريبەسى بار مامان دجەفف ولم جاۋاپتى بولعان. ول Disney, DreamWorks, Sony Pictures, Warner Bros. ستۋديالارىمەن جۇمىس ىستەگەن, ال ءوزىنىڭ پورتفوليوسىندا Titanic, The Fifth Element, Harry Potter سەكىلدى ايگىلى جوبالار بار.
پرەمەرا الدىندا اكتەرلەر دە ءتۇسىرىلىم بارىسىنداعى ساتتەردى ەسكە الدى.
«قاقتىعىس كورىنىسىن ءتۇسىرىپ جاتقانبىز. كەيىپكەردىڭ كۇيىنە سونشالىقتى كىرىپ كەتىپپىن, دۋبل بىتكەن سوڭ سويلەي الماي قالدىم. ەشكىممەن تىلدەسپەي, كولىككە وتىرىپ, بىردەن كەتىپ قالىپپىن», – دەپ ءبولىستى باستى رولدەردىڭ ءبىرىن سومداعان بازيل سۇلتانعازى.
ءتۇسىرىلىم الاڭىندا كۇتپەگەن يمپروۆيزاتسيالار دا ورىن العان. رەجيسسەردىڭ ايتۋىنشا, ءانشى ALEM تۇسىرىلىمگە جاي عانا «كورۋگە» كەلگەن, الايدا سول ساتتە وعان ارنايى ءرول ويلاپ تابىلىپ, ءانشى كادرعا كىرگەن.
«كوبا» كريمينالدىق دراماسى نيۋ-يورك, ستوكگولم جانە ريمدەگى حالىقارالىق كينوفەستيۆالدەرگە قاتىسقان جانە جوعارى باعاسىن العان.
سەريال اۆتورلارى كورەرمەنگە قىلمىس تۋرالى ەمەس, اقيقات پەن ادىلدىكتىڭ قۇنى تۋرالى وقيعانى ۇسىنادى.
