بيىلعى كەش وزگەشە سيپات الدى. كەشتىڭ قۇرىلىمىن بەلگىلى تەاتر اكتەرى ءارى رەجيسسەرى دۋناي ەسپاەۆ جاساپ, قويىلىمدىق تۇرعىدا جاڭا سەرپىن اكەلدى.
– ارقادا تالانتتى جاستار كوپ. ءبىرى – ولەڭ جازسا, ءبىرى – ءاندى جۇرەكپەن ورىندايدى. «قاراشادا ءومىر تۇر…» كەشى سول دارىن يەلەرىن تابىستىرىپ, جاڭا ىزدەنىستەرگە جول اشادى. ساحنادا بۋىن ساباقتاستىعى كورىنىس تابادى. ەرتەڭگى مادەنيەتتىڭ جۇگىن ارقالايتىن جاڭا تولقىن وسى ورتادا ءوسىپ كەلەدى, – دەيدى دۋناي ەسپاەۆ.
كەشتى «Tattimbend» ءانسامبلى جاندى مۋزىكامەن سۇيەمەلدەپ وتىردى. اۋەنمەن ورىلگەن ولەڭ – كورەرمەنىن ءوزىنىڭ ادەمى الەمىنە باۋراپ الدى.
پوەزيا كەشى اباي اتىنداعى مەملەكەتتىك سىيلىقتىڭ لاۋرەاتى, اقىن سەرىك اقسۇڭقار ۇلىنىڭ ء«ومىر دەگەن – كۇندى اينالۋ» اتتى ولەڭىمەن باستالدى. جاس اقىن ەرىك نارىن ەرەكشە سەزىممەن وقىعان بۇل ولەڭ كەشتىڭ رۋحاني باعىتىن ايقىنداپ, ويدىڭ بيىگىنە جەتەلەگەندەي ەدى.
ودان ءارى باعدات مۇباراك, رۋسلان نۇرباي, سەرىك ساعىنتاي سىندى اقىنداردىڭ جىرلارىن «دات» تەاترىنىڭ اكتەرلەرى وقىدى. ال ەرعانات كەڭەسبەك ۇلى, سالتانات سماعۇلتەگى, سۇلتان داۋلەتحان ولەڭدەرىمەن كەشتىڭ تاقىرىبىن اشا تۇسكەندەي.
كەشتە سونداي-اق, قۋانىش مەدەۋباەۆ, ايبەك بايتورە, جالەل شالقار, ەربولات قۋاتبەك سىندى جاس شايىرلاردىڭ جىرلارى دا وقىلدى. ءار جول, ءار ىرعاق – ءبىر تاعدىر, ءبىر تىنىس, ءبىر مۇڭ مەن ءبىر ءۇمىتتىڭ كورىنىسىندەي. كۇزدىڭ سارى بوياۋىنداي نازىك تە سىرلى ولەڭدەر مەن كلاسسيكالىق اندەر كورەرمەن جۇرەگىن تەربەدى.
ايتپاقشى, «دات» تەاترىنىڭ قۇرامىنداعى ەڭ جاس اكتەر توقتار كارىباي ادەبي سازدى كەشتەگى كورەرمەن كوزايىمى بولدى. ونەرگە دەگەن قۇشتارلىعى ەرتە ويانعان مەكتەپ وقۋشىسى ەربولات قۋاتبەكتىڭ ولەڭىن وقىدى.
كەش سوڭىن قازاقستاننىڭ ەڭبەك سىڭىرگەن ءارتىسى, بەلگىلى ءانشى-كومپوزيتور گۇلنار داۋكەنوۆا مۇقاعالي ماقاتاەۆتىڭ سوزىنە جازىلعان «كۇرەڭ كۇز» انىمەن تۇيىندەدى.
قاراعاندى وبلىسى
