وبلىستىق دەنە شىنىقتىرۋ, سپورت جانە تۋريزم باسقارماسىنىڭ ءبولىم باسشىسى مىندەتىن اتقارۋشى جاننات سابىرعاليەۆانىڭ دەرەگىنە سۇيەنسەك, تۋريستەر اراسىندا وتانداستارىمىزدىڭ ۇلەسى باسىم. وزگە وڭىرلەردەن كەلۋشىلەر سانى 73 مىڭنان اسادى. شەتەلدەن كەلگەن تۋريستەر – 10 مىڭ ادام.
– قازىر وبلىستا 250-دەن استام تۋريستىك مەكەمە جۇمىس ىستەيدى. تۋريستەرگە 3 ملرد تەڭگەنىڭ قىزمەتى كورسەتىلدى. اتىراۋ وبلىسىنىڭ ينۆەستيتسيالىق تارتىمدىلىعى تۋريزم سالاسىنداعى وڭ ديناميكاعا سەرپىن بەردى. بيىل وڭىرلىك ءتۋريزمدى دامىتۋعا تارتىلعان ينۆەستيتسيالىق قارجىنىڭ كولەمى 32 ملرد تەڭگەنى قۇرادى. تۋريستەردىڭ قىزىعۋشىلىعىن ارتتىرۋ ماقساتىندا قولعا الىنعان جوبالاردىڭ ەسەبىنەن ينۆەستيتسيا كولەمى ارتىپ كەلەدى, – دەيدى ج.سابىرعاليەۆا.
ونىڭ ايتۋىنشا, تۋريستىك ينفراقۇرىلىمدى دامىتۋ باعىتىندا بىرنەشە جوبانى ىسكە اسىرۋ جالعاسىن تابادى. ايتالىق, ورتاعاسىرلىق سارايشىق قالاشىعى مەن جىلىوي اۋدانىنداعى اقمەشىت قورىمىنا جول سالۋ قولعا الىندى. قۇرمانعازى اۋدانىنداعى لوتوس القابىنىڭ ماڭىن اباتتاندىرۋ, سونداي-اق جول بويىنداعى سەرۆيستىك قىزمەت كورسەتەتىن نىسانداردى كوبەيتۋ جۇرگىزىلىپ جاتىر.
تۋريزم سالاسىن اقپاراتتىق, يميدجدىك تۇرعىدا ىلگەرىلەتۋدى كوزدەگەن «Visit Atyrau» تۋريستىك اقپاراتتىق ورتالىعى قۇرىلدى. ورتالىق ديرەكتورىنىڭ ورىنباسارى ءلاززات سۇلتانوۆانىڭ ايتۋىنا قاراعاندا, «Visit Atyrau» سايتى ءۇش تىلدە جۇمىس ىستەيدى. سايتتا وبلىستىڭ تابيعي, تاريحي, مادەني نىساندارى تۋرالى تولىق اقپارات بار.
– ءبىز ءوڭىردىڭ تۋريستىك الەۋەتىن كەڭىنەن ناسيحاتتاۋدى جالعاستىرا بەرەمىز. قازىردە تۋريستەرگە ارنالعان ءموبيلدى قوسىمشا دايىندالىپ جاتىر. بۇل قوسىمشا ارقىلى ساياحاتشىلار مارشرۋتىن الدىن الا جوسپارلاپ, قوناقۇي مەن گيد قىزمەتىن ونلاين برونداي الادى. ورتالىق قىزمەتكەرلەرى «Zhaiyk Brand Fest», «Atyrau Fish Day», «EthnoWeekend», «Lotus Fest», «Tour de Saraishyq» سەكىلدى وڭىرلىك, حالىقارالىق جوبالاردى ۇيىمداستىرۋعا ۇيىتقى بولدى, – دەدى ل.سۇلتانوۆا.
سالا ماماندارىنىڭ پىكىرىنشە, اتىراۋدان ىستانبۇل, دۋباي, امستەردام, تبيليسي, باكۋ باعىتىندا ۇشاتىن تۇراقتى اۋە رەيستەرى ءوڭىر ءتۋريزمىن دامىتۋعا سەپتىگىن تيگىزىپ وتىر. جاقىندا يتالياداعى ميلان قالاسىنا تىكەلەي اۋە رەيسى اشىلدى. بۇل ەۋروپادان كەلەتىن تۋريستەردىڭ كوبەيۋىنە ىقپال ەتەدى.
– اتىراۋ وبلىسىندا كونە داۋىردەن سىر شەرتەتىن تاريحي مەكەندەر مەن ورىندار كوپ. بۇل اسىرەسە شەتەلدىك تۋريستەردى قىزىقتىرادى. سول سەبەپتەن, تۋريستەردى قىزىقتىراتىن بىرنەشە ماسەلەگە باسىمدىق بەرىلىپ وتىر. بىرىنشىدەن, تۋريزم سالاسىن جاڭا دەڭگەيگە كوتەرۋگە دەن قويىلدى. ەكىنشىدەن, سەرۆيستىك قىزمەت كورسەتۋ ساپاسىن ارتتىرۋ قولعا الىندى. ءبىر سوزبەن, مۇنايلى ءوڭىردى جەتەكشى تۋريستىك ورتالىقتىڭ بىرىنە اينالدىرۋ باعىتىنداعى جۇمىس جالعاسادى, – دەدى ج.سابىرعاليەۆا.
اتىراۋ وبلىسى
