باسەكەگە قابىلەتتى كاسىپورىن
قور قولداۋىن سەزىنگەن كاسىپورىننىڭ ءبىرى – «اگروحيمسەرۆيس-س» جشس. وسىدان 20 جىلدان استام ۋاقىت بۇرىن جۇمىسىن باستاعان سەرىكتەستىك قازىر ساعاتىنا 10 تونناعا دەيىن تۇيىرشىكتەلگەن تىڭايتقىش شىعارىپ, اگرارشىلاردى قاجەتتى ونىممەن قامتاماسىز ەتەتىن مۇمكىندىككە يە بولعان. بيىل كومپانيا «دامۋ» قورىنىڭ «ورلەۋ» جەڭىلدەتىلگەن نەسيە بەرۋ باعدارلاماسى اياسىندا «قازاقستان حالىق بانكى» اق ارقىلى قارجىلاندىرۋ الىپ, ءوندىرىسىن كەڭەيتۋگە تاعى ءبىر قادام جاسادى.
«اگروحيمسەرۆيس-س» جشس شىعاراتىن امموني سۋلفاتى اۋىل شارۋاشىلىعىندا قاجەتتى تىڭايتقىش سانالادى. شارۋاعا امموني سۋلفاتىنىڭ تۇيىرشىكتەلگەن قالپى وتە ءتيىمدى. تاپتالمايتىن, تۇيدەكتەلىپ قالمايتىن تۇيىرشىكتەر ۇنتاقتان اۋىر بولعاندىقتان جەلگە ۇشىپ, ىسىراپ تا بولمايدى.
امموني سۋلفاتىن شىعاراتىن «اگروحيمسەرۆيس-س» جشس-ءنىڭ نارىقتا جۇرگەنىنە 25 جىلدان اسىپ بارادى. شيرەك عاسىردان بەرى جالاعاش اۋدانىنان اشىلعان كومپانيا كۇرىش وسىرۋمەن اينالىساتىن شارۋاشىلىقتارعا تىڭايتقىش جەتكىزىپ كەلەدى.
العاشقى جىلدارى تىڭايتقىشتى شەتتەن تاسىپ كەلدى. اۋىل شارۋاشىلىعىنا اسا قاجەتتى ءونىمدى وزىمىزدە شىعارۋعا تىڭعىلىقتى دايىندالدى. «بيزنەستىڭ جول كارتاسى – 2020» باعدارلاماسى كومەگىمەن ءىس باستاعان كاسىپ يەسىنە بانكتىڭ سىياقى مولشەرلەمەسىن سۋبسيديالاپ, نەسيە سوماسىنىڭ 50 پايىزى مولشەرىندە كەپىلدىك بەرگەن «دامۋ» قورى كومەككە كەلدى.
«نىسان قۇرىلىسى باستالعاندا پاندەميا كيلىگىپ, ءبىراز كىدىرىستەپ قالدىق. كەرەكتى جابدىقتاردىڭ ءبارىن ماماندارىمىز قۇراستىرىپ, ءىس باستاپ كەتتىك. مۇنداي زاۋىت باسقا ايماقتا جوق. دەر كەزىندە دەمەۋ بەرىپ, العاشقى قادامنان باستاپ قولداۋ تانىتقان «دامۋ» قورىنا العىس ايتامىز», دەيدى كومپانيانىڭ قارجى ديرەكتورى ۆالەنتينا كيم.
قازىر جالاعاش كەنتىندەگى كاسىپورىننىڭ وندىرىستىك بازاسىندا 20 مىڭ تونناعا دەيىن ءونىم ساقتاۋعا ارنالعان قويمالار, ۇزىندىعى 180 مەتر بولاتىن ەكى تەمىرجول تۇيىعى, تيەۋ-ءتۇسىرۋ تەحنيكاسى مەن تەمىرجول تارازىسى بار.
كاسىپورىن وندىرەتىن تىڭايتقىش باقشا ونىمدەرىنە دە ءتيىمدى. دەگەنمەن قازىرگى تۇتىنۋشىلارى نەگىزىنەن كۇرىششىلەر. بىلتىر قوستاناي, الماتى وبلىستارىنان سۇرانىس ءتۇستى. «دامۋ» قورىنىڭ قولداۋى ارقاسىندا جاڭا وندىرىسكە جول اشقان كاسىپورىن بيىل العاش رەت استانا قالاسىنداعى كورمەگە قاتىسىپ, ونىمدەرىن وزگە وڭىرلەر وكىلدەرىنە تانىستىردى. بىرنەشە ايماقپەن الدىن الا كەلىسىم جاساستى. كاسىپ يەسى ەندى ەۋروپا نارىعىنا شىعۋدى جوسپارلاپ وتىر. بيىل كومپانيا «دامۋ» قورىنىڭ «ورلەۋ» جەڭىلدىكپەن نەسيەلەۋ باعدارلاماسى اياسىندا «قازاقستان حالىق بانكى» اق-نان 12,6%-بەن ءتيىمدى نەسيە الدى.
تەمىرجول ۆاگوندارى ساپالى جوندەلەدى
وبلىستا تەمىرجولداعى جولاۋشىلار تاسىمالىمەن اينالىساتىن «مارال-نۇر» جشس جولاۋشىلار ۆاگوندارىن جوندەۋ جانە تەحنيكالىق قىزمەت كورسەتۋ كەشەنى – «تسيفرلىق دەپو» ينۆەستيتسيالىق جوباسىن جۇزەگە اسىرىپ وتىر. جالپى قۇنى
5,4 ملرد تەڭگە بولاتىن جوباعا جۇمسالاتىن 2,2 ملرد تەڭگە «دامۋ» قورىنىڭ «بىرىڭعاي كەشەندى باعدارلاما» اياسىنداعى پايىزدىق مولشەرلەمەنى سۋبسيديالاۋ ارقىلى «قازاقستان حالىق بانكى» اق تاراپىنان قارجىلاندىرىلدى. مەملەكەتتىك قولداۋ ناتيجەسىندە نەسيە مولشەرلەمەسى جىلدىق 8%-عا دەيىن تومەندەدى.
«قىزىلوردا – پاۆلودار», «جەزقازعان – استانا» باعىتتارىندا تۇراقتى جولاۋشى تاسىمالىن جولعا قويعان كومپانيانىڭ بۇل جوباسى جولاۋشىلار ۆاگوندارىن جوندەۋ مەن تەحنيكالىق قىزمەت كورسەتۋدى جاڭا دەڭگەيگە كوتەرەتىن ماڭىزدى باستاما. مۇنداعى جوندەۋ ۇدەرىسىنىڭ بارلىعى تسيفرلىق باسقارۋ جۇيەسى ارقىلى جۇزەگە اسىرىلادى. بۇل قىزمەت ساپاسىن ارتتىرۋمەن قاتار, ۋاقىت پەن شىعىندى ۇنەمدەۋگە مۇمكىندىك بەرەدى.
ء«بىزدىڭ سەرىكتەستىك بۇل سالادا كوپ جىل تاجىريبە جيناعان كومپانيا قاتارىندا تۇر. ايماقارالىق ەكى باعىتتا 59 ۆاگونىمىز بار. وسىعان دەيىن ۆاگوندارىمىزدى ەلىمىزدەگى, وزبەكستان مەن بەلارۋستاعى ۆاگون دەپولارىنا اپارىپ جوندەتىپ جۇردىك. دەگەنمەن ۋاقىت شىعىنىنان بۇرىن جوندەۋدەن شىققان ۆاگوندار ساپاسىنا كوڭىلىمىز تولماعان كەزىمىز كوپ. سوندىقتان دا بەس جىل بۇرىن وسى ينۆەستيتسيالىق جوبانى قولعا الىپ, بۇيىرسا الدا جىلىنا 500-دەن استام جولاۋشىلار ۆاگونىنا تەحنيكالىق قىزمەت كورسەتىپ, جوندەۋ جۇمىستارىن جۇرگىزەمىز. وسى ارقىلى قالادا جاڭادان 100-دەن استام جۇمىس ورنى اشىلىپ, جاستاردى تۇراقتى تابىسى بار سالاعا بەيىمدەگىمىز كەلەدى. وسى كۇنى جولاۋشىلار تالابى دا ءوسىپ وتىر. ۆاگوننىڭ قىستا جىلى, جازدا سالقىن بولعانىن, بار جاعدايدىڭ جاسالعانىن قالايدى. ءبىز جاڭا تەحنولوگيا ارقاسىندا سول ۇدەدەن شىعامىز دەپ وتىرمىز», دەيدى «مارال-نۇر» جشس ديرەكتورىنىڭ كەڭەسشىسى ابدىماۋلەن الىشەۆ.
14 جىلدا – 11 مىڭنان استام جۇمىس ورنى
2010–2024 جىلدار ارالىعىندا مەملەكەتتەن قولداۋ العان ءوڭىر كاسىپكەرلەرى 11,3 مىڭ جاڭا جۇمىس ورنىن اشىپ, بيۋدجەتكە 537 ملرد تەڭگە سالىق تولەپتى. جۋرناليستەرمەن جۇزدەسۋدە «دامۋ» قورىنىڭ قىزىلوردا وبلىسى بويىنشا وڭىرلىك فيليال ديرەكتورى ايدوس جىلقايداروۆ وسىنداي دەرەك ايتتى.
جەڭىلدىكپەن قارجىلاندىرۋ, كەپىل جەتكىلىكسىز كەزدە كەپىلدىك بەرۋ, پايىزدىق مولشەرلەمەنىڭ ءبىر بولىگىن سۋبسيديالاۋ ارقىلى قولداۋ تانىتاتىن قور كومەگى ارقاسىندا كوپتەگەن كاسىپكەر شاعىن ءىسىن ۇلكەن بيزنەسكە اينالدىرىپ وتىر.
– «دامۋ» قورى ۇلتتىق دامۋ ينستيتۋتى بولعاندىقتان, ەلىمىزدىڭ بارلىق وڭىرىندەگى شاعىن جانە ورتا بيزنەستىڭ دامۋىنا جاردەمدەسىپ, ەكونوميكاعا ايتارلىقتاي سەرپىن بەرەدى. نەگىزىنەن وڭدەۋ ونەركاسىبى, كولىك جانە لوگيستيكا, تۋريزم, دەنساۋلىق ساقتاۋ مەن ءبىلىم سالالارىنا باسىمدىق بەرىپ وتىرمىز. بيىل ماۋسىم ايىندا پايىزدىق مولشەرلەمەلەردى سۋبسيديالاۋ قۇرالىنا بالاما بولىپ, كاسىپكەرلەردىڭ قارجىنى كىدىرىسسىز الۋىنا مۇمكىندىك بەرەتىن «ورلەۋ» باعدارلاماسى ىسكە قوسىلدى. وبلىستا وسى باعدارلاما باستالعان ۋاقىتتان بەرى 19 جوبا جالپى سوماسى 1,9 ملرد تەڭگەگە قولداۋ الدى», دەيدى فيليال ديرەكتورى.
قىزىلوردا
