كەڭ ءارى جارىق عيماراتتا سپورت پەن سالاۋاتتى ءومىر سالتىن سۇيەتىندەر ءۇشىن بارلىق جاعداي جاسالعان – باسسەين, ترەناجەر زالى, بوكس جانە ۇستەل تەننيسى زالدارى, جەكپە-جەك زالدارى جانە ويىن سپورت تۇرلەرىنە ارنالعان امبەباپ الاڭ بار.
ء«بىزدىڭ وبلىس اۋماعىندا تاعى ءبىر سپورت نىسانىن اشۋ مەن ءۇشىن ۇلكەن مارتەبە. بۇل جوبا مەملەكەت باسشىسى جۇكتەگەن بۇقارالىق جانە بالالار سپورتىن دامىتۋ تاپسىرماسى اياسىندا جۇزەگە اسىرىلۋدا. الداعى ۋاقىتتا بۇل نىسان اۋداننىڭ عانا ەمەس, بۇكىل ءوڭىردىڭ سپورتتىق جانە مادەني ءىس-شارالارى وتەتىن ورتالىعىنا, ۇلكەن جەڭىستەر مەن رەكوردتار ورداسىنا اينالادى دەپ سەنەمىن», – دەدى مارات احمەتجانوۆ.
ءوڭىر باسشىسى اقمولالىق سپورتشىلاردىڭ ءاردايىم جەتىستىكتەرىمەن تانىلعانىن اتاپ ءوتتى. بۇل قاتاردا بۋراباي اۋدانى سپورتشىلارىنىڭ ورنى ەرەكشە. ولاردىڭ اراسىندا – تاۋەلسىز قازاقستاننىڭ العاشقى وليمپيادا چەمپيونى, ءتورت دۇركىن شاڭعى جارىسى بويىنشا الەم چەمپيونى ۆلاديمير سميرنوۆ, شاڭعى جارىسى بويىنشا الەم چەمپيوناتىنىڭ قولا جۇلدەگەرى نيكولاي چەبوتكو, سونداي-اق شاڭعىشىلار, بياتلونشىلار, بوكسشىلار, ەركىن كۇرەس شەبەرلەرى بار. ولار جوعارى ناتيجەلەرگە قول جەتكىزىپ, ءوڭىر مەن ەلدىڭ اتىن حالىقارالىق ارەنالاردا اسقاقتاتتى.
سپورت سارايىندا قازىردىڭ وزىندە جاتتىعۋ پروتسەسى ءجۇرىپ جاتىر. بالالار ءجۇزۋ, كۇرەس, گيمناستيكا, بوكس سەكتسيالارىندا دايىندالۋدا. مەرەيلى كۇنى جاس سپورتشىلارعا وليمپيادا ويىندارىنىڭ چەمپيوندارى مەن جۇلدەگەرلەرى — دميتري بالاندين, سەرگەي كوتەنكو جانە يۋري مەلنيچەنكو سىندى قوناقتارمەن قول الىسىپ, تىلدەسۋدىڭ قۇرمەتى بۇيىردى. ەڭ باتىلدارى قازاقستاندىق سپورت اڭىزىنىڭ اۆتوگرافىن الدى.
ايتا كەتەيىك, بۇگىندە وڭىردە 1 124 سپورت نىسانى بار, ولاردىڭ جارتىسىنان استامى اۋىلدىق جەرلەردە ورنالاسقان.
