فوتو: جوعارعى سوت
اناسى بالانىڭ قولىن بايلاپ, ۇيدە ونى جالعىز قالدىرىپ, ءوزى كەتىپ قالعان. بالانىڭ ۇزاق جىلاپ جاتقانىن ەستىگەن كورشىلەر ەسىكتىڭ ساڭىلاۋى ارقىلى قاراۋسىز قالعان بالانى كورگەن. قولى بايلاۋلى بالا جىلاپ, بولمەنى اينالىپ جۇگىرىپ جۇرگەن. سودان كەيىن كورشىلەر جەدەل جاردەم شاقىرعان.
«ساراپشىلار بالانىڭ كوگەرگەن جەرلەرىن دەنساۋلىققا جەڭىل زيان رەتىندە باعالادى. سونىمەن قاتار بالادا پسيحيكالىق جانە سويلەۋ دامۋىنىڭ تەجەلۋى, جرۆي, سالماق جەتىسپەۋشىلىگى جانە پەداگوگيكالىق قاراۋسىزدىق بەلگىلەرى انىقتالعان», دەپ حابارلادى قاراعاندى وبلىستىق سوتىنىڭ ءباسپاسوز قىزمەتى.
كەيىن كورشىلەردىڭ شاعىمى بويىنشا بالا بالالاردى قولداۋ ورتالىعىنا ورنالاستىرىلدى.
«ايەل اتا-انالىق مىندەتتەرىن ورىنداماعانى جانە كامەلەتكە تولماعان بالاعا قاتىگەزدىك كورسەتكەنى ءۇشىن كىنالى دەپ تانىلدى (قك-ءنىڭ 140-بابىنىڭ 2-بولىگى). قاراعاندى وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى بالانىڭ اۋىر ءحالى اناسىمەن بىرگە تۇرعان كەزىندە پايدا بولعانىن انىقتادى», دەلىنگەن حابارلامادا.
سوتتا اناسى بالاسىن جالعىز قالدىرىپ, ونىڭ قولىن بايلاۋ ارقىلى وعان ناقتى قاۋىپ توندىرگەنىن اتاپ ءوتتى. قورعانشىلىق جانە قامقورشىلىق ورگاندارى بالانىڭ مۇددەلەرىنە سايكەس كەلەتىن قورىتىندى ۇسىندى.
«وسى ءمان-جايلار بويىنشا سوت بالانىڭ اكەسىنىڭ تالاپتارىن تولىعىمەن قاناعاتتاندىردى. بالانىڭ اناسىنىڭ اتا-انا قۇقىقتارى شەكتەلدى. ال بالانىڭ تۇرعىلىقتى جەرى اكەسىمەن بىرگە بولۋى انىقتالدى. اناسىنا اليمەنت تولەۋ مىندەتتەلدى, ال اكەسى ونى تولەۋدەن بوساتىلدى», دەپ جازىلعان سوت حابارلاماسىندا.
كەيىننەن اكەسى ۇلىن ءوزىنىڭ اتا-اناسىمەن بىرگە تۇراتىن التى بولمەلى جايلى جەكە ۇيىنە اپارعان. قازىر بالا اكەسىمەن جانە اتا-اجەسىمەن بىرگە تۇرادى.
