ءابىلاحات ەسپاەۆ – قازاق ءان ونەرىن جاڭا بيىككە كوتەرگەن ساناۋلى كومپوزيتوردىڭ ءبىرى. ول 200-دەن استام مۋزىكانىڭ ءتۇرلى جانرىنا شىعارما جازعان. ايتالىق, ونىڭ «مارجان قىز», «شوفەر كەلدى قىرمانعا», «ۇستازىم مەنىڭ, ۇستازىم», «اق ساۋلە», «ساعىنىش ەكەن بالا كەز», «جايىق قىزى», اتتى اندەرىن ەل ءالى كۇنگە دەيىن ءسۇيىپ تىڭدايدى.
كەش بارىسىندا بىرەگەي ونەرپازدىڭ ءومىرى مەن شىعارماشىلىعى تۋرالى جىلى ەستەلىكتەر ايتىلدى. ماسەلەن, كومپوزيتور, قازاقستاننىڭ ەڭبەك سىڭىرگەن قايراتكەرى جولامان تۇرسىنباەۆ تۇلعانىڭ ومىربايانىنداعى كوپشىلىككە بەيمالىم دەرەكتەردى اڭگىمەلەدى.
ء«بىز ول كىسىنى «احات اعا» دەۋشى ەدىك. بىرگە قىزمەت ىستەدىك. تۋىندىلارى ەل اراسىنا كەڭ تاراعان ونداي كومپوزيتور سيرەك. بىراق سولاي بولسا دا كەڭەس وكىمەتى ونىڭ ونەرىن مويىندادى دەپ ايتا المايمىن. سەبەبى بار. ءابىلاحات اعا – قوستاناي وڭىرىندە تۋعان. ۇلى اعارتۋشى ى.ءالتىنساريننىڭ اتالاس تۋىسى. اشتىق جىلدارى اناسى ءتورت بالاسىمەن قايتىس بولادى. جالعىز ءابىلاحات قانا ءتىرى قالعان. ال اكەسى الاش قايراتكەرلەرىمەن جاقىن ارالاسقاندىقتان قۋعىندالىپ, جامبىل وبلىسىنا قونىس اۋدارعان. مىنە, وسىنداي تاعدىردىڭ تاۋقىمەتىن تارتسا دا احات اعا مويىعان ەمەس. ول كىسىنىڭ بارلىق ءانى ەلگە بىردەن تانىلدى. ءبىز بالا كۇنىمىزدە ماحاببات قۇپياسىن ء«الى ەسىمدە» اتتى ءانى ارقىلى بىلدىك», دەدى ول.
ال بەلگىلى كومپوزيتور, قازاقستاننىڭ ەڭبەك سىڭىرگەن قايراتكەرى سەرىك ەركىمبەكوۆ مايدانگەر كومپوزيتور اسەم اۋەزدى اندەر عانا ەمەس, بىرقاتار ساحنالىق قويىلىمداردىڭ مۋزىكاسىن جازعانىن جەتكىزدى.
«انىعىندا, بۇل – كۇردەلى جۇمىس. سوعان قاراماستان قازاق ۇلت اسپاپتارى وركەسترى مەن سيمفونيالىق وركەسترگە ارناپ, تاماشا تۋىندىلار جازدى. ونىڭ نازىك سەزىمدى قوزعايتىن رومانستارى دا ەرەكشە ەدى. ول كىسىنىڭ ونەرى ءوز ۋاقىتىندا باعالانبادى. الايدا ۋاقىت بارلىعىنا تورەشى. قازىر ءابىلاحات اعانىڭ اندەرى ەلدىڭ اۋزىنان تۇسپەيدى», دەدى سەرىك جەكسەمبەك ۇلى.
كەشكە كومپوزيتوردىڭ قىزدارى گۇلميرا مەن گۇلسىم ونلاين قاتىسىپ, اكەسى تۋرالى ەستەلىكتەرىمەن ءبولىستى. ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ اعا وقىتۋشىسى, ونەرتانۋ عىلىمدارىنىڭ ماگيسترى ديليا دۇيەسىنوۆا ونەر يەسىنىڭ شىعارماشىلىعىنا جان-جاقتى تالداۋ جاسادى. سازگەر دامۋ ورالعازى ۇلى مەن تانىمال اكتەر سىرىم قاشقاباەۆ تالانتتى تۇلعانىڭ جۇرەككە جىلى, سىرلى اندەرىن ءسوز ەتتى. ءىس-شارا سوڭىندا قوناقتار ۇلتتىق اكادەميالىق كىتاپحانا ۇيىمداستىرعان ء«ان الەمىنىڭ ءابىلاحاتى» اتتى كورمەنى تاماشالادى.
