جاپون جەرىندە سۋردو دزيۋدوشىلارىمىز جۇلدەدەن تاۋ تۇرعىزىپ, بۇرىن-سوڭدى بۇيىرماعان جەتىستىككە كەنەلدى. بۇعان دەيىن وسى سپورت تۇرىنەن حامزا عۇلاما (66 كگ), شاديار قۋاندىق (-73 كگ), ەركەبۇلان قانافيننىڭ (81 كگ) توپ جارىپ, ءانۇرانىمىزدى شىرقاتقانىن سۇيىنشىلەگەن ەدىك. ايەلدەر اراسىنداعى تارتىستا ءامينا فايزۋلينا (70 كگ) سۋردليمپيادا چەمپيونى اتاندى. ەرلەر سايىسىندا ايداربەك توقتاربەك (100 كگ) كۇمىس جۇلدەنى مىسە تۇتتى. ال سابىرجان حاپيزوۆ (+100 كگ), التىنبەك كاكىتاەۆ (60 كگ), ايىم جەتپىسباەۆا (48 كگ) مەن اننا كارموروۆا (78 كگ) قولا مەدال يەلەندى. بالۋاندارىمىز كوماندالىق تارتىستا دا تاباندىلىق تانىتتى. ەلىمىزدىڭ ەرلەر كومانداسى دزيۋدودان كوماندالىق جارىستا جەڭىمپاز اتانسا, ايەلدەر قۇراماسىنا كۇمىس جۇلدە بۇيىردى. سۋردو جەڭىل اتلەتيكادان دا 1 التىن, 1 قولا جۇلدەمىز بار. جەڭىستى ساپار ءالى دە جالعاسارى ءسوزسىز. سۋردليمپيادا باسەكەسى 26 قاراشادا مارەسىنە جەتەدى.
ەستۋ قابىلەتىنە زاقىم كەلگەن سپورتشىلاردىڭ ەڭ بەدەلدى باسەكەسى سانالاتىن سۋردليمپيادا سايىسىنا 81 ەلدەن 3 مىڭعا تارتا سپورتشى قاتىسىپ, 21 سپورت تۇرىنەن مەدالدار جيىنتىعى ءۇشىن باعىن سىناپ جاتىر. ۇلتتىق سۋردليمپيادا كوميتەتىنىڭ پرەزيدەنتى سەرىك ساپيەۆ سپورتشىلاردىڭ وراسان جەتىستىگى تىنىمسىز جاتتىعۋ مەن ەرەن ەڭبەكتىڭ جەڭىسى ەكەنىنە توقتالدى.
– سىزدەر سەنىمدى اقتاپ, جانكۇيەرلەردى قۋانتىپ, ەرەن تابىسقا جەتتىڭىزدەر. بۇل – ۇجىمنىڭ ورتاق جەڭىسى. ەلىمىزدە سۋردو سپورت تۇرلەرىمەن شۇعىلدانۋشىلار ءۇشىن ينفراقۇرىلىمدى جاقسارتۋعا ايرىقشا كوڭىل ءبولىنىپ, كەشەندەر بوي كوتەردى. ءالى دە سالىنىپ جاتىر. مۇنىڭ بارلىعى دا سپورتتى دامىتۋعا تىڭ سەرپىن بەرەدى, – دەدى س.ساپيەۆ.
2022 جىلى برازيليادا وتكەن XXIV جازعى سۋردليمپيادا ويىندارىندا سپورتشىلارىمىز 29 مەدال (ونىڭ تورتەۋى التىن) ەنشىلەپ, رەكوردتىق ناتيجەمەن ورالعان ەدى. ال توكيو ءتورىن ۇسىنعان تورتجىلدىق الامانىنىڭ العاشقى كۇندەرىندە-اق 13 مەدال (التاۋى التىن) ولجالاۋى ەل سپورتىن وركەندەتۋگە ايرىقشا كوڭىل بولىنگەنىن اڭعارتسا كەرەك. دودانىڭ كورىگى ەندى قىزىپ كەلەدى, قانجىعامىز ءالى دە مايلانا تۇسەتىنى انىق.
