فوتو: olympic.kz
حالىقارالىق بوكس فەدەراتسياسىنىڭ پرەزيدەنتى لاۋازىمىنا كىمنىڭ سايلاناتىنى 23 قاراشادا يتاليانىڭ ريم قالاسىندا World Boxing كونگرەسىندە بەلگىلى بولماق. مارتەبەلى لاۋازىمنان ءۇمىتتى ەكىنشى ادام – گرەك ماريوليس حاريلاوس. گرەكيا بوكس فەدەراتسياسىنىڭ پرەزيدەنتى دە بەلىن بەكەم بۋىپ, الەمدىك ۇيىمنىڭ باسشىسى اتانۋعا بەكىنىپ وتىر.
كونگرەستىڭ باتالاسۋ وتىرىسىندا حالىقارالىق بوكس فەدەراتسياسىنىڭ اتقارۋشى كوميتەتىنە كىمدەردىڭ مۇشە اتاناتىنى دا انىقتالماق. 2023 جىلدىڭ ءساۋىر ايىندا ىرگەسىن بەكىتىپ, ۋىعىن قاداپ ءوز الدىنا دەربەس وتاۋ تىككەن World Boxing ۇيىمىنا بۇگىندە 125 ەلدىڭ اۋەسقوي بوكس فەدەراتسيالارى قارايدى. وسى ەلدەردىڭ وكىلدەرى داۋىس بەرۋ ارقىلى پرەزيدەنت سايلانادى. گەننادي گولوۆكين بىلتىر قىركۇيەك ايىنان بەرى World Boxing ۇيىمىنىڭ وليمپيادالىق كوميسسيا توراعاسى بولىپ تاعايىندالىپ, ەڭبەك ەتىپ كەلەدى. جۇكتەلگەن مىندەت تە ءزىلماۋىر – بوكستىڭ وليمپيادا باعدارلاماسىنا سىزىلىپ كەتپەۋىنە كۇش سالۋ. ەتەك-جەڭىن ەندى قىمتاعان جاڭا ۇيىمنىڭ حالىقارالىق وليمپيادالىق كوميتەتى تاراپىنان رەسمي مويىندالۋىنا ۇلەس قوسۋ. بيىلعى جىلدىڭ اقپان ايىندا حالىقارالىق وليمپيادالىق كوميتەت World Boxing ۇيىمىن ۋاقىتشا مويىندادى. بۇل شەشىم ۇيىمعا الەمدىك دەڭگەيدە بوكستى باسقارۋعا قۇزىرەتتىلىك بەردى. ال ناۋرىز ايىندا حوك بوكستى 2028 جىلى لوس-اندجەلەستە وتەتىن وليمپيادا ويىندارىنىڭ باعدارلاماسىنا رەسمي تۇردە ەنگىزۋگە شەشىم شىعاردى.
گەننادي گولوۆكين بوكستىڭ ەكى ارناسىندا دا شىڭداۋدان وتكەن تۇلعا. عۇمىرىنىڭ 30 جىلعا جۋىق ۋاقىتىن بەكزادا سپورتقا ارناعان بوكسشى اۋەسقويلار اراسىندا الەم چەمپيونى اتاندى. جازعى وليمپيا ويىندارىنىڭ فينالىندا جۇدىرىقتاستى. كاسىپقوي بوكسقا اۋىسقان سوڭ ءبىر ەمەس ءۇش بىردەي تۇجىرىمنىڭ چەمپيوندىق بەلبەۋىن يەلەندى. كاسىپقوي بوكستا 45 جەكپە-جەك وتكىزىپ, 42-سىندە (37 قارسىلاسىن نوكاۋتپەن ۇتتى) جەڭىسكە جەتتى. تەك مەكسيكالىق ساۋل الۆارەس كانەلومەن عانا ءۇش رەت جۇدىرىقتاسىپ, ەكى مارتە جەڭىلدى, ءبىر رەت تەڭ ءتۇستى. جۋىردا فرانتسيانىڭ «Francs Jeux» پورتالىنا سۇحبات بەرىپ, بوكستى دامىتۋعا قاتىستى كەلەلى ويلارىن ورتاعا سالعان گەننادي گولوۆكين اتاق ءۇشىن اتقا قونبايتىنىن مالىمدەدى.
– بوكس وليمپيادا باعدارلاماسىنان سىزىلىپ قالا جازدادى.ءالى دە تاعدىرى قىل ۇستىندە تۇر. سپورتتاعى باعىمدى اشىپ, نامىسىمدى قايراعان بوكستىڭ كەلەشەگىن قاۋىپ بۇلتى تورلاعاندا تىنىش وتىرا المادىم. بۇدان بىلاي بوكستىڭ وركەندەپ دامۋى ءۇشىن نەندەي قارەكەت جاسايمىز, قايتپەك كەرەك دەگەن ساۋال مازالادى. بۋىنىم بەكىپ, بۇعانام قاتپاعان جەتكىنشەك شاعىمنان بوكسپەن شۇعىلداندىم, شاعىن عانا زالدا جاتتىعىپ, وراسان جەڭىستەرگە جول اشىلدى. بوكسشىلاردىڭ قالاي وت پەن سۋدان وتەتىنىن جۇرەگىممەن سەزىنە الامىن, ويتكەنى ءوزىم سول جولدا كەلەمىن. ەندىگى ماقسات – بوكستىڭ قارقىندى دامۋىنا جول اشۋ. اينالاسىنداعى داۋ-شاردىڭ ءورتىن ءسوندىرىپ, ءادىل, انىق, ايقىن جولمەن قادام باسۋ. زامان تالابىنا ساي يننوۆاتسيالىق جاڭاشىلدىقتى ەنگىزۋگە كۇش سالامىز, – دەدى گ.گولوۆكين فرانتسۋز باسپاسوزىنە بەرگەن سۇحباتىندا.
بوكسشىلاردىڭ الەۋەتىن ارتتىرىپ, باپكەرلەردىڭ بىلىكتىلىگىن كۇشەيتىپ, تورەشىلەردىڭ ءبىلىمىن شىڭداۋدا تەحنولوگيانىڭ تيگىزەر پايداسى وراسان. بوكس سپورتىنىڭ باسىنان باعىن تايدىرا جازداعان جايتتىڭ ءبىرى – جەمقورلىق. جازعى وليمپيادا دودالارىندا, الەم چەمپيوناتتارىندا «ماتا داڭقىمەن ءبوزىن وتكىزگەندەر» ساۋدا الاڭىنا دا اينالدىردى. جازعى وليمپيادانىڭ الاۋى العاش تۇتانعان شاقتان بەرى باعدارلاماسىنا بەرىك ورنىققان بوكس سپورتىن ءوز بيىگىنە قايتا كوتەرۋ جولىندا قىرۋار شارۋا تۇر.
حالىقارالىق بوكس فەدەراتسياسىنىڭ پرەزيدەنتى لاۋازىمىنان ۇمىتكەرلەردىڭ قاتارىندا ۋكراينالىق ۆلاديمير كليچكو دا سايلاۋعا ءتۇسۋدى كوزدەيتىنىن اڭعارتىپ, ارتىنشا رايىنان قايتتى. گەننادي گولوۆكين World Boxing فەدەراتسياسىنىڭ پرەزيدەنتى لاۋازىمىنا ءوز كانديداتۋراسىن ۇسىنعاندا ەڭ الدىمەن بوكستىڭ وليمپيا ويىندارىنداعى بولاشاعىن كۇشەيتۋگە بارىن سالاتىنىن ايتتى.
– مەنىڭ ميسسيام – بوكستىڭ وليمپيادالىق بولاشاعىن ساقتاۋ, وسى سپورت تۇرىنە سەنىمدى نىعايتۋ. سپورتشىلاردىڭ, جاتتىقتىرۋشىلاردىڭ بوكس فەدەراتسيالارىنىڭ دامۋىنا سەرپىن بەرىپ, تالپىنىستارىن قولداۋ – باستى مۇراتىمىز. حالىقارالىق وليمپيادا كوميتەتىنىڭ تولىققاندى مويىنداۋىنا قول جەتكىزىپ, 2028 جىلى وتەتىن لوس-اندجەلەس, ودان كەيىن 2032 جىلى بريسبەندە جالاۋى جەلبىرەيتىن جازعى وليمپيادا دودالارىنداعى ورنىن نىعايتۋدى ماقسات ەتەمىز, – دەدى گ.گولوۆكين.
وتانداسىمىز World Boxing فەدەراتسياسىنىڭ پرەزيدەنتى بولىپ سايلانسا, حالىقارالىق سپورتتىق ۇيىمدى باسقارعان ەلىمىزدەگى تۇڭعىش ادام بولماق. قازاق سپورتىنا ولشەۋسىز ۇلەس قوسقان بەكەت ماحمۇدوۆ حالىقارالىق بوكس اسسوتسياتسياسىنىڭ (ايبا) ۆيتسە-پرەزيدەنتى قىزمەتىن 10 جىلعا جۋىق مەرزىم اتقاردى. 1996 جىلدان 2006 جىلعا دەيىن حالىقارالىق قاۋىمداستىق پرەزيدەنتىنىڭ ورىنباسارى لاۋازىمىن ارقالاعاندا قازاق بوكسىنىڭ قارقىن الۋىنا كوپ ەڭبەك ءسىڭىرىپ, جول اشتى. وسى ۇيىمنىڭ قارجىلىق كوميسسياسىنىڭ توراعاسى, ايبا-نىڭ ازيا كونتينەنتتىك بيۋروسىنىڭ پرەزيدەنتى قىزمەتى جۇكتەلگەندە دە ابىرويلى ەڭبەك ەتتى. بەكەت ساپاربەك ۇلى بەدەلدى ۇيىمدا باسشى بولعان جىلدارى ەلىمىزدىڭ تورەشىلەرى حالىقارالىق دودالاردا قازىلىق ەتتى. 1996 جىلى اتلانتا جازعى وليمپياداسىندا بوكستان ساڭلاقتارىمىز 1 التىن (ۆاسيلي جيروۆ), 1 كۇمىس (بولات ءجۇمادىلوۆ), 2 قولا (بولات نيازىمبەتوۆ, ەرماحان ىبرايىموۆ) مەدال ولجالادى. 2000 جىلى سيدنەي ءتورىن دۇبىرگە بولەگەن جازعى وليمپيادا الامانىنا 10 سالماقتا تەك 7 بوكسشىمىز جولداما الىپ باردى. باردى دا, تورتەۋى فينالعا ءبىر-اق شىقتى. بەكزات ساتتارحانوۆ, ەرماحان ىبرايىموۆ ەل مەرەيىن ۇستەم ەتىپ, مەيمانامىزدى تاسىتا كوك تۋىمىزدى جەلبىرەتىپ التىن مەدال الدى. بولات ءجۇمادىلوۆ, مۇحتارحان دىلدابەكوۆ كۇمىس مەدال ولجالادى. 2004 جىلى افينا جازعى وليمپيا ويىندارىندا باقتيار ارتاەۆ – التىن, گەننادي گولوۆكين – كۇمىس, سەرىك ەلەۋوۆ قولا جۇلدەنى قانجىعاسىنا بايلادى. بەكەت ساپاربەك ۇلى بەدەلدى ۇيىمنىڭ باسشىلىق قۇرامىندا بولعاندا قازاق بوكسى جازعى وليمپيادا دوداسىندا ۇزدىك ۇشتىكتەن تومەندەگەن ەمەس. ال بۇگىندە ءبىر ەمەس, ەكى وليمپيادالىق تسيكلدە بوكسشىلارىمىزعا التىن مەدال بۇيىرمادى.
World Boxing ۇيىمىنىڭ پرەزيدەنتتىگىنەن ۇمىتكەر گەنناديدىڭ ۇلىنا جۇكتەلەر جاۋاپكەرشىلىك جوعارى بولماق. ازىرگە باستى مەجە – نەگىزگى باسەكەلەسىنەن باسىم داۋىس جيناۋ. ۇيىمنىڭ قازىرگى پرەزيدەنتى بوريس ۆان دەر ۆورست سايلاۋعا كانديداتۋراسىن ۇسىنبايتىنىن ءمالىم ەتتى. دەمەك وتانداسىمىزدىڭ گرەك باسەكەلەسىنەن وق بويى وزىق شىعىپ, وراسان داۋىسپەن قارا ۇزۋىنە مۇمكىندىك مول. لايىم سولاي بولعاي.
