جۇقپالى اۋرۋلاردىڭ بەلەڭ الۋى, كادر تاپشىلىعى اسەر ەتسە كەرەك, مەدبيكەلەر كۋرسىن اشۋ جونىندەگى العاشقى ۇسىنىستى كوتەرگەن جانە مەكەمەنىڭ نەگىزىن قالاعان سول كەزدەگى اۋدانارالىق اۋرۋحانانىڭ باس دارىگەرى ن.ي.جەلۆاكوۆ بولىپتى. ونىڭ باسقارۋىنداعى اتالعان مەديتسينالىق كۋرس 1940 جىلى مەكتەپ دارەجەسىنە دەيىن كوتەرىلگەن. ن.ي.جەلۆاكوۆ 1941 جىلى مايدانعا شاقىرىلۋىنا بايلانىستى مەكتەپ جۇمىسىن, ونىڭ ارىپتەسى, قازاق كسر-نىڭ ۆ.م. مولوتوۆ اتىنداعى (قازىرگى س.اسفەندياروۆ) مەديتسينالىق ينستيتۋتىن بىتىرگەن ل.ب.كروۆياكوۆسكايا جالعاستىرعان. سۇراپىل سوعىس جىلدارى جوعارى جاقتىڭ نۇسقاۋىمەن تالدىقورعانداعى مەديتسينالىق مەكتەپتە جەدەلدەتىلگەن باعدارلامامەن جۇزدەگەن مەديتسينا مامانى دايارلانىپ, مايدان دالاسىنا اتتاندىرىلعان.
ءبىر قىزىعى, شاقىرساڭ كەلتىرە المايتىن, تاريح بەتتەرىندە تانىمال بوگوياۆلەنسكي, اۆتونوموۆ سياقتى مەديتسينا عىلىمدارىنىڭ مايتالمان عالىم-پروفەسسورلارى, بەلگىلى بيولوگ ۆ.ت.كاجەرين, اسكەري جەتەكشى ي.ەسينوۆ, الەكساندروۆسكايا, باۆەمارلار سياقتى تۇلعالارى سوعىس جىلدارى رەسەيدەن جەر اۋدارىلىپ كەلگەن ەكەن. ولار تالدىقورعانداعى قاراپايىم شاعىن مەكتەپتە كەروسين شامنىڭ جارىعىمەن ءدارىس بەرگەنى ارحيۆ قۇجاتتارىندا ايتىلادى. ول كەزدە مەديتسينالىق وقۋ قۇرالدارى جەتكىلىكسىز, ارنايى زەرتحانالار دا بولماعان.
ەكىنشى دۇنيەجۇزىلىك سوعىس اياقتالعاننان كەيىن مەكتەپ اتاۋى مەديتسينالىق ۋچيليششە بولىپ اۋىسىپ, وندا الماتى مەملەكەتتىك مەديتسينا ينستيتۋتىنىڭ تۇلەگى ف.م.ۋپير 24 جىل بويى ديرەكتورلىق قىزمەت ىستەدى.
سوعىس جىلدارى پولكوۆنيك دارەجەسىنە دەيىن كوتەرىلگەن بىلىكتى دارىگەر فيليپپ ماكسيموۆيچ تالدىقورعان مەديتسينالىق ۋچيليششەسىنىڭ وركەندەۋىنە قوماقتى ۇلەس قوستى. ول وقۋ ورنىن باسقارعان جىلدارى سوعىستان العان جاراقاتتارىنا قاراماي, جۇك ماشيناسىمەن الىس اۋىلدارعا شىعىپ, جەرگىلىكتى ۇلت وكىلدەرىن جيناپ, جۇمىسقا تارتىپ, جاتاقحانا تاۋىپ بەرگەن.
مىنە, وسىنداي تاريحى باي وقۋ ورنى 1994 جىلى دەنساۋلىق ساقتاۋ ءمينيسترىنىڭ بۇيرىعىمەن تالدىقورعان مەديتسينالىق كوللەدجى بولىپ وزگەردى.
كوللەدجدىڭ نەگىزگى دامۋ كەزەڭى 1997 جىلى اتالعان ءبىلىم ورداسىنا وبلىسىمىزدىڭ قۇرمەتتى ازاماتى – مەديتسينا عىلىمدارىنىڭ كانديداتى سەرىك ماكسيم ۇلى جانسەڭگىروۆ باسشىلىعىنا كەلگەننەن باستاۋ الدى دەسەم, ارتىق ايتپايمىن. قازىرگى وقۋ ورداسىن بۇرىنعى مەكتەپ تۇرماق, وسىدان جيىرما جىلعى كوللەدجبەن سالىستىرا المايسىز.
«مەن جۇمىسقا العاش كەلگەنىمدە, مەكتەپتىڭ قارىزى تىم كوپ ەكەن. بيۋدجەت تاپشىلىعىنان مۇعالىمدەر جالاقىسىن ايلاپ الا الماعان. مەكەمەنىڭ قىسقى جىلۋىنا, ەلەكتر جارىعىنا, باسقا دا كوممۋنالدىق شىعىندار تولەنبەگەن, ەكونوميكالىق تۇرعىدان قيىن كەزدەر ەدى», دەيدى وتكەندى ەسكە العان سەرىك ماكسيم ۇلى.
بۇگىندە كوللەدج – ەلىمىزدەگى ۇلگىلى وقۋ ورنى عانا ەمەس, وزىق تاجىريبە مەكتەبى. اتاق-داڭقى ەل اۋماعىنان اسىپ, شەت مەملەكەتتەر تاني باستادى. قازىر شەتەلدىكتەر دە قىزىعىپ, تاجىريبە الماسۋعا ءجيى كەلەتىن وزىق وقۋ ورنىنا اينالعان. ءار ءپاننىڭ وزىندىك ناقىشىنا نەگىزدەلگەن وقۋ كابينەتى بار. اسىرەسە نەگىزگى ءپان سانالاتىن اناتوميا كابينەتتەرى جابدىقتالۋ جاعىنان جوعارى مەديتسينالىق ۋنيۆەرسيتەت بازاسىنان بىردە-ءبىر كەم ەمەس. وقۋ ۇدەرىستەرى, ارنايى دايىندالعان مۇردە سۇيەكتەرىنەن, مۋلياجداردان بولەك, جاساندى ينتەللەكتىگە نەگىزدەلگەن ۇلكەن ەكران قوندىرعىلارمەن جۇرگىزىلەدى. ستۋدەنتتەرگە بارلىق جاعداي جاسالعان. ەمتيحاندار ۆيدەو جانە اۋديو فيكساتسيالى جۇيەسى بار ارنايى كابينەتتەردە وتەدى. بولاشاق مامان بەلگىلى ءبىر ۋاقىت ارالىعىندا ناۋقاستى تولىعىمەن تەكسەرىپ, وعان قاجەتتى كومەك كورسەتۋىن ارنايى كومپيۋتەرلىك ۆيرتۋالدى كلينيكا ارقىلى جۇزەگە اسىرۋعا ءتيىس. سىناقتان ءوتۋشى ترەناجەرگە بەكىتىلگەن ولشەۋ-باقىلاۋ بلوگىنەن ءوز ارەكەتىن كورىپ وتىرادى. بلوكتاعى مالىمەتتەر Wi-Fi جەلىسى ارقىلى تەلەديدارعا جەتىپ, ۇدەرىستى باقىلاپ وتىرعان نۇسقاۋشى سىناقتان ءوتۋشىنىڭ ءىس-ارەكەتىنىڭ قاتە, نە دۇرىس ەكەنىن تەكسەرەدى.
كوللەدجدە جاساندى ينتەللەكتىگە نەگىزدەلگەن ۆيرتۋالدى كلينيكا نەمەسە سيمۋلياتسيالىق ورتالىق 2014 جىلدان بەرى جۇمىس ىستەيدى. بۇل ورتالىق كوللەدجدىڭ بىلىمگەرلەرى مەن بىلىكتىلىكتى كوتەرۋ جانە قايتا دايارلاۋ بولىمىندە وقيتىن ورتا بۋىندى مەديتسينا قىزمەتكەرلەرىنىڭ ارنايى پاندەردەن العان تەوريالىق ءبىلىمىن ءىس جۇزىندە جەتىلدىرىپ, تاجىريبەمەن ۇشتاستىرۋعا ارنالعان زاماناۋي تەحنولوگياعا نەگىزدەلگەن. مۇندا ناۋقاستىڭ ورنىنا پايدالاناتىن جاساندى مانەكەندەر مەن فانتومدار كادىمگى اۋرۋ ادامنان اۋمايدى, ءتۇرلى اۋىرسىنعان دىبىس شىعارىپ, العاشقى مەديتسينالىق كومەكتىڭ ساپالى كورسەتىلۋىن بىلىمگەردەن تالاپ ەتەدى, قاتەسىن انىقتايدى, قىسقاسى وقۋ ۇدەرىسىنىڭ ساپالى وتۋىنە جول اشادى.
قازىر تالدىقورعان جوعارى مەديتسينالىق كوللەدجى – ەلىمىزدەگى كوللەدجدەر اراسىنداعى سايىستاردىڭ بىرنەشە دۇركىن جەڭىمپازى. وقۋ ورداسى 2015 جىلى قىتاي حالىق رەسپۋبليكاسىنىڭ ءۇرىمشى قالاسىنداعى شينجيان مەديتسينالىق ۋنيۆەرسيتەتىمەن حالىقارالىق بايلانىس ورناتىپ, ەكىجاقتى بىرلەسكەن جوبالاردى (وقىتۋشىلاردىڭ ءبىلىم جەتىلدىرۋ كۋرستارىن ۇيىمداستىرۋ, بىرىككەن شەبەرلىك دارىستەر, سەمينارلار, ت.ب) ىسكە اسىرۋدى قولعا العان. تاعى ءبىر جاڭالىق, وقۋ ورنىندا مۇمكىندىگى شەكتەۋلى, ەستۋ قابىلەتىنەن ايىرىلعان جاندارعا ارنالعان ءتىس ەمدەيتىن دارىگەرلەردى دايارلايتىن جاڭا ءبولىم اشىلعان.
مەديتسينا كوللەدجىنىڭ نەگىزگى مىندەتى – وقۋ-تاربيە ۇردىسىندە وقىتۋدىڭ ساپاسى مەن تيىمدىلىگىن كوتەرۋ, ساباقتىڭ عىلىمي-ادىستەمەلىك دەڭگەيىن جاقسارتۋ, ستۋدەنتتەردىڭ كاسىبي شەبەرلىگىن تاجىريبە نەگىزىندە ۇيرەتۋ ەكەنىن ەسكەرسەك, ءسوز ەتىپ وتىرعان كوللەدج ۇجىمى وسى سىناقتاردان سۇرىنبەي, ابىرويمەن ءوتىپ كەلە جاتقان ەلىمىزدەگى ماقتاۋلى وقۋ ورىندارىنىڭ بىرەگەيى ەكەنىنە كۇمان جوق.
مىرزاحمەت ەرەجەپوۆ,
دەنساۋلىق ساقتاۋ ءىسىنىڭ ۇزدىگى
تالدىقورعان
