فوتو: depositphotos.com
ءمينيستردىڭ ايتۋىنشا, حالىق كوپ جۇرەتىن ورىنداردا تۇماۋ, جرۆي جانە COVID-19-دىڭ الدىن الۋ بويىنشا جادىنامالار, نۇسقاۋلىقتار, پلاكاتتار مەن بەينەماتەريالدار ورنالاستىرىلعان.
ا.ءالنازاروۆا قاراپايىم ساقتىق شارالارىن ساقتاۋ ينفەكتسيا جۇقتىرۋ قاۋپىن ايتارلىقتاي تومەندەتەتىنىن اتاپ ءوتتى:
- ادامدار كوپ جينالاتىن ورىندارعا بارۋدى شەكتەۋ;
- ءۇي-جايدى تۇراقتى تۇردە جەلدەتۋ;
- قولدى وڭدەۋ ءۇشىن انتيسەپتيك نەمەسە دەزينفەكتسيالىق سۋلىقتاردى قولدانۋ;
- جرۆي نەمەسە تۇماۋ بەلگىلەرى بايقالسا, بالالاردى مەكتەپكە نەمەسە بالاباقشاعا جىبەرمەۋ.
ۆاكتسيناتسيا جانە مەديتسينالىق كومەك
«تۇماۋعا قارسى 2,1 ميلليون ادام ەگىلدى. ۆاكتسينا قازىرگى شتامدارعا, ونىڭ ىشىندە A H3N2-گە قارسى قورعايدى. ماۋسىمدىق ورشۋگە وراي باستاپقى مەديتسينالىق-سانيتارلىق ۇيىمداردىڭ جۇمىسى كۇشەيتىلدى. 995 ءموبيلدى بريگادا جانە 1 792 فيلتر-كابينەت جۇمىس ىستەيدى, ونىڭ 1 097-ءسى – بالالار مەن جۇكتى ايەلدەرگە ارنالعان», دەدى مينيستر ۇكىمەت وتىرىسىندا.
شۇعىل مەديتسينالىق كومەك كورسەتۋ ءۇشىن 1 618 جەدەل جاردەم بريگاداسى جۇمىس ىستەپ تۇر.
اۋرۋحانالارداعى جاعداي
ستاتسيونارلىق ەمدەۋگە ارنالعان 10 829 توسەك-ورىن دايىندالعان, ونىڭ ىشىندە ەكى مىڭعا جۋىق رەزەرۆتىك ورىن بار. قازىرگى تاڭدا 8239 پاتسيەنت اۋرۋحاناعا جاتقىزىلعان, ولاردىڭ 6809-ى – بالالار. ەل بويىنشا توسەك-ورىنداردىڭ ورتاشا تولىمدىلىعى 76% قۇرايدى.
زاتتاردىڭ جەتكىلىكتى قورى بار ما؟
دەنساۋلىق ساقتاۋ مينيسترلىگىنىڭ دەرەكتەرىنە سۇيەنسەك, ۆيرۋسقا قارسى جانە قىزۋ تۇسىرەتىن پرەپاراتتار, قورعانىس قۇرالدارى مەن دەزينفەكتسيالىق زاتتاردىڭ جەتكىلىكتى قورى قامتاماسىز ەتىلگەن. مەكتەپتەر مەن بالاباقشالاردا كۇندەلىكتى مونيتورينگ جۇرگىزىلىپ, تاڭعى فيلتر ۇيىمداستىرىلعان, تەمپەراتۋرالىق جانە دەزينفەكتسيالىق رەجيم ساقتالىپ وتىر.
بۇعان دەيىن مينيستر اقمارال ءالنازاروۆا قازاقستانداعى جرۆي مەن تۇماۋ بويىنشا ەپيدەميولوگيالىق جاعداي, ونىڭ ىشىندە گونكونگ تۇماۋىنىڭ اينالىمى تۋرالى ايتقانىء مالىم.
