فوتو: istockphoto.com
بالالار نەگە كوپ اۋىرىپ جاتىر؟
وبلىستىڭ سانيتاريالىق-ەپيدەميولوگيالىق باقىلاۋ دەپارتامەنتى 1 قازاننان بەرى 63 مىڭنان استام جەدەل رەسپيراتورلىق ۆيرۋستىق ينفەكتسيا جاعدايىن تىركەگەن. ناۋقاستاردىڭ 56 پايىزى – 14 جاسقا دەيىنگى بالالار. لابوراتوريالىق تالداۋلار دا بالالار اراسىندا ۆيرۋستاردىڭ بەلسەندى اينالىمدا ەكەنىن راستايدى.
وڭىردە تۇماۋدىڭ ا (H3N2) شتاممى انىقتالعان 35 ناۋقاستىڭ 80 پايىزدان استامى – ەكپە الماعان بالالار. دارىگەرلەر بۇل شتامم جاڭا ۆيرۋس ەمەس ەكەنىن, بەلگىلەرى كلاسسيكالىق تۇماۋمەن سايكەس كەلەتىنىن ايتادى.
قانداي ۆيرۋستار كوپ تارالىپ جاتىر؟
تۇماۋدان بولەك, رەسپيراتورلىق ينفەكتسيالاردىڭ وزگە تۇرلەرى دە بيىل جوعارى دەڭگەيدە تىركەلىپ وتىر. زەرتتەلگەن ۇلگىلەردىڭ 59 پايىزى وڭ ناتيجە بەرگەن. ونىڭ ىشىندە:
- رينوۆيرۋس – 40%,
- پاراگريپپ – 19%,
- بوكوۆيرۋس – 11%,
- ادەنوۆيرۋس – 8%,
- رس-ۆيرۋس – 1,2%.
ددسۇ بولجامى بويىنشا بيىل A (H1N1), A (H3N2) جانە B شتاممدارى نەگىزگى اينالىمدا بولۋى ءتيىس. بۇل شتاممداردىڭ بارلىعى قازىرگى ۆاكتسينالار قۇرامىندا بار, سوندىقتان دارىگەرلەر ەكپە الۋدىڭ ماڭىزدى ەكەنىن ايتىپ وتىر.
مەكتەپتەر قاشىقتىقتان وقىتۋ فورماتىنا كوشىرىلە مە؟
ءبىلىم بەرۋ ۇيىمدارىندا كۇندەلىكتى مونيتورينگ جۇرگىزىلىپ وتىر. ءبىر سىنىپتاعى اۋرۋشاڭدىق 10%-دان اسپايتىندىقتان, مەكتەپتەردى جاپپاي قاشىقتان وقىتۋ فورماتىنا كوشىرۋ ماسەلەسى قاراستىرىلماعان. مەكتەپتەر مەن بالالار مەكەمەلەرىندە سۇزگىلەر كۇشەيتىلىپ, بەلگىلەرى بار ادامدار دارىگەرگە جىبەرىلىپ جاتىر.
بۇگىندە وبلىستا 143 مىڭنان استام تۇرعىن تۇماۋعا قارسى ۆاكتسينا العان. ۆاكتسيناتسيالاۋ ناۋقانى جالعاسىپ جاتىر.
الدىن الۋ شارالارى قانداي؟
سانيتاريالىق قىزمەت ماماندارى تۇرعىندارعا ادام كوپ جينالاتىن ورىنداردى شەكتەۋگە, ءۇي-جايدى جەلدەتۋگە, قول گيگيەناسىن قاتاڭ ساقتاۋعا جانە اۋرۋ بەلگىلەرى بايقالعاندا ءوزىن-ءوزى ەمدەمەي, دارىگەرگە كورىنۋگە كەڭەس بەرەدى.
ايتا كەتەيىك, دەنساۋلىق ساقتاۋ مينيسترلىگى ەلدە تۇماۋدىڭ جاڭا ءتۇرى انىقتالماعانىن, سونداي-اق ەپيدەميولوگيالىق جاعداي باقىلاۋدا ەكەنىن مالىمدەگەن بولاتىن.
