سالتاناتتى ءىس-شاراعا ەستونيا پرەزيدەنتى الار كاريس پەن ونىڭ جۇبايى سيرە كاريس, مادەنيەت جانە اقپارات ءمينيسترى ايدا بالاەۆا, ەستون دەلەگاتسياسى, ديپلوماتيالىق كورپۋس پەن ەكى ەلدىڭ زيالى قاۋىم وكىلدەرى قاتىستى. س. كاريس قۇتتىقتاۋ سوزىندە ۇيىمداستىرۋشىلارعا العىس ءبىلدىردى.
«سولتۇستىك حالىقتارى ءۇشىن قولعاپ – تۇرمىستىق ومىردە ەڭ قاجەت دۇنيە. بۇل نارسەنى قازاقستانعا قاتىستى ايتۋعا دا بولادى دەپ ويلايمىن. ەستون ۇلتتىق مۋزەيىنىڭ كوشپەلى كورمەسىندە ەستون حالقىنىڭ تاريحى مەن مادەنيەتى كورسەتىلەدى. ءبىزدىڭ ورنەكتەرىمىز, سيمۆولدار, حالقىمىز, انا نەمەسە اجە بەينەسى ۇسىنىلعان. ءيا, مادەنيەتىمىزدىڭ ماڭىزدى بولىگى ايەلدەر ارقىلى بەرىلدى. ولار – وتباسى مەن وشاعىن, حالىق دانالىعىن, سالت-ءداستۇردى, ادەت-عۇرىپتى جانە مادەنيەتتى ساقتاعان جاندار. مادەنيەتىمىز, رۋحىمىز ءاردايىم وسى ايەلدەردىڭ ايالى الاقانىندا بولدى. ءبىز ونى جوعارى باعالايمىز ءارى قۇرمەتتەيمىز. وسى كورمەنى مەيلىنشە كوپ ادام تاماشالاسا دەگەن تىلەك بار. سەبەبى ءبىر-ءبىرىمىزدىڭ مادەنيەتىمىز بەن ومىرگە دەگەن كوزقاراسىمىزعا قىزىعۋشىلىق تانىتۋ ارقىلى ءبىز دانالىققا جانە ادامگەرشىلىككە ءبىر تابان جاقىندايمىز», دەدى ەستونيا رەسپۋبليكاسىنىڭ پرەزيدەنتى.
ءىس-شارا بارىسىندا ايدا بالاەۆا بىرلەسكەن كورمە مادەني ىنتىماقتاستىقتى نىعايتۋعا, قولونەر, مۋزەي ءىسى سالاسىندا جاڭا بىرلەسكەن جوبالارعا جول اشاتىنىنا سەنىم ءبىلدىردى.
«قازاقستان ءۇشىن ەستونيانىڭ مادەني مۇراسىمەن تانىسۋ ەرەكشە ماڭىزدى. وسىنداي كورمەلەر ۇلتتىق بىرەگەيلىكتىڭ جاڭا قىرلارىن اشىپ, شىعارماشىلىق ديالوگقا مۇمكىندىك بەرەدى. «قولمەن ورىلگەن قولعاپ سىرى» اتتى كورمەنىڭ اتاۋى تەرەڭ ماعىناعا تولى. ول تەك قولونەر مەن شەبەرلىكتى ەمەس, ەكى ەل حالقىنا ءتان جىلى دا سەنىمدى قارىم-قاتىناستى بىلدىرەدى. قول مەن قولعاپتىڭ ءبىرىن-ءبىرى تولىقتىرعانى سياقتى, ءبىزدىڭ مادەنيەتتەر دە ءوز بولمىسىن ساقتاي وتىرىپ, ءداستۇردى قورعاۋ مەن ونى زاماناۋي تۇرعىدان دامىتۋ جولىنداعى ورتاق ۇمتىلىستا ۇيلەسىم تابادى», دەدى مينيستر.
ەكسپوزيتسيادا ورتا عاسىرلارداعى ۇلگىلەردەن باستاپ, بۇگىنگى زاماناۋي بۇيىمدار كوشىرمەلەرى قويىلعان. ونداعى ءاربىر ورنەك پەن قولدانىلعان ءتۇس ءوز ءداۋىرى مەن ايماقتىق ەرەكشەلىكتەرىنەن سىر شەرتەدى. كورمە 2025 جىلعى 28 جەلتوقسانعا دەيىن جالعاسادى.
