كاسىبي كومەك پەن ناقتى دياگنوز
بيىل «سالاماتتى قازاقستان» مەديتسينا پويىزى ون ءۇشىنشى جىل قاتارىنان جولعا شىقتى. وسى ۋاقىت ىشىندە ول 2 130 بەكەتكە توقتاپ, 800 مىڭعا جۋىق تۇرعىننىڭ دەنساۋلىعىن جاقسارتۋعا, الەۋمەتتىك ماسەلەلەرىن شەشۋگە ۇلەس قوستى.
مامىر ايىنان بەرى پويىز ماماندارى مەديتسينالىق قىزمەت كورسەتەتىن مەكەمەلەرى مەن ماماندارى تاپشى ءارى شالعاي ورنالاسقان 104 اۋىلدى ارالاپ ۇلگەردى. پويىز قۇرامىندا جالپى پراكتيكا جانە تار بەيىندى دارىگەرلەردەن تۇراتىن 29 مامان, سونداي-اق مەدياتور مەن زاڭگەر جۇمىس ىستەيدى.
ۋدز, ەكگ, فليۋروگرافيا, گاستروفيبروسكوپيا, قان تالداۋى سياقتى دياگنوستيكالىق تەكسەرۋلەر جۇرگىزىپ, شاعىن حيرۋرگيالىق وپەراتسيالار جاساۋعا دا مۇمكىندىك بار.
التى ايدىڭ ىشىندە 16 وڭىردە 82 977 ادام مەديتسينالىق قىزمەت الدى. ونىڭ ىشىندە 46 848-ءى – ايەلدەر, 13 358-ءى
– بالالار. 244 وپەراتسيا جاسالدى. بۇل كورسەتكىشتەر جوبانىڭ, اسىرەسە وسال ساناتتاعى توپتار – ايەلدەر مەن بالالاردىڭ دەنساۋلىعىن قورعاۋداعى ماڭىزىن ايقىن كورسەتەدى.
«پويىز كەلەتىنىن ەستىگەن سوڭ, كورشى اۋىلدان ارنايى كەلدىك. بۇرىننان مازالاپ جۇرگەن سىرقاتتارىم بار ەدى, بىراق اۋدان ورتالىعىنا بارۋعا ءاردايىم مۇمكىندىك بولا بەرمەيتىن. پويىزداعى ماماندار تولىق قاراپ, ۋدز مەن تالداۋلار جاسادى, دياگنوزىمدى ناقتىلاپ, ەمدەۋ جوسپارىن ءتۇسىندىرىپ بەردى. ويىمدا جۇرگەن كۇماننىڭ ءبارى سەيىلدى», دەيدى اقتوبە وبلىسى شۇبارقۇدىق اۋىلىنىڭ تۇرعىنى گۇلجان قوبلاندينا.
دارىگەرلەردىڭ ۋاقتىلى ارالاسۋىنىڭ ارقاسىندا كوپتەگەن ناۋقاسقا سىرقاتتارى بويىنشا ناقتى دياگنوز قويىلىپ, قاۋىپتى دەرتتەردىڭ الدىن الۋعا قاجەتتى ەم تاعايىندالدى. بۇل – پروفيلاكتيكالىق مەديتسينا مەن ەرتە دياگنوستيكانىڭ اۋىلدىق جەرلەردەگى ماڭىزىن ايقىن كورسەتەدى. مىسالى, مەديتسينالىق تەكسەرۋ بارىسىندا 390 اۋىل تۇرعىنىنان قانت ديابەتى, 700 ادامنان گلاۋكوما, 10 ايەلدەن ءسۇت بەزىنىڭ قاتەرلى ىسىگى, 1 012 پاتسيەنتتەن قاتەرلى بولۋى مۇمكىن وسكىندەر انىقتالدى. وسى ازاماتتاردىڭ بارلىعى ءارى قارايعى ەمدەۋ مەن قوسىمشا تەكسەرۋلەرگە جولداما الىپ, قاجەتتى مەديتسينالىق باقىلاۋعا جىبەرىلدى.
مەدياتورلار كۇردەلى ماسەلەلەردى شەشەدى
اۋىل تۇرعىندارى اراسىندا قۇقىقتىق كەڭەس تە ايرىقشا سۇرانىسقا يە. سەبەبى مەدياتور مەن زاڭگەردىڭ كومەگىمەن ازاماتتاردىڭ جىلدار بويى شەشىلمەي كەلگەن ماسەلەلەرى وڭ شەشىمىن تاۋىپ جاتىر. بيىل ماماندارعا 3 445 ادام جۇگىنگەن, ولاردىڭ 2 323-ءى – ايەلدەر. اسىرەسە كوپبالالى جانە جۇمىسسىز ايەلدەرگە الەۋمەتتىك تولەمدەر, قۇقىقتىق راسىمدەر, قارجىلىق ماسەلەلەر بويىنشا جان-جاقتى قولداۋ كورسەتىلدى.
پويىز زاڭگەرلەرى كوپبالالى انالاردىڭ مەملەكەتتىك ناگرادالارىن راسىمدەۋ جۇمىستارىن دا ءجيى قولعا الادى. مىسالى, قوستاناي وبلىسىندا التى بالانى تاربيەلەپ وتىرعان انا «كۇمىس القا» يەگەرى اتانسا, شىعىس قازاقستان وبلىسىندا جىلدار بويى شەشىلمەگەن جىلجىمايتىن م ۇلىك داۋى ءبىر اپتا ىشىندە وڭ ناتيجەسىن بەردى. ءۇي مەن جەر تەلىمى زاڭدى تۇردە تىركەلىپ, قۇقىقتىق داۋ تولىق توقتاتىلدى.
مەدياتورلار مەن زاڭگەرلەر وتباسىنىڭ اتاۋلى الەۋمەتتىك كومەگىن راسىمدەۋگە, «ۆسەوبۋچ» باعدارلاماسى ارقىلى بالالاردى قارجىلاندىرۋعا, ۇلتتىق مەديتسينالىق ورتالىقتاردا ەمدەلۋ ءۇشىن كۆوتا الۋعا دا جاردەم كورسەتىپ كەلەدى. ماسەلەن, ولاردىڭ ارالاسۋىمەن بىرقاتار ونكولوگيالىق ناۋقاستارعا جەڭىلدەتىلگەن ءدارى-دارمەك بەرۋ ماسەلەسى شەشىلدى, رەسمي سۇراتۋلاردان كەيىن پاتسيەنتتەر قاجەتتى پرەپاراتتارىن العان.
كوپتەگەن ماسەلە ءبىر كۇندە شەشىلمەسە دە, ماماندار مەملەكەتتىك ورگاندارمەن تۇراقتى بايلانىس ورناتىپ, ءاربىر ءوتىنىشتىڭ اياقتالعان ناتيجەسىنە دەيىن باقىلاۋ جۇرگىزەدى.
«كوپ جاعدايدا ادامدار ءوز قۇقىقتارىن تولىق بىلمەيدى. ال ءبىزدىڭ مىندەتىمىز – ولارعا دۇرىس باعىت-باعدار بەرۋ. اۋىلداعى كوپتەگەن ازامات ءۇشىن بۇل جوبا بىلىكتى زاڭگەرلىك كومەككە قول جەتكىزۋدىڭ جالعىز مۇمكىندىگى بولىپ وتىر. باستى ماقساتىمىز – تۇرعىلىقتى جەرىنە قاراماستان, ءاربىر وتانداسىمىزدىڭ ءوز قۇقىعىن قورعاي الۋىنا جاعداي جاساۋ», دەيدى ۇلتتىق كوميسسيا مۇشەسى, «Samruk-Kazyna Trust» قورىنىڭ باس ديرەكتورى الفيا اديەۆا بۇل جۇمىستاردىڭ ماڭىزدىلىعى تۋرالى.
«سالاماتتى قازاقستان» مەديتسينا پويىزى – اۋىل تۇرعىندارى ءۇشىن ۋاقىتشا اكتسيا ەمەس, 13 جىل بويى ۇزىلمەي جۇزەگە اسىپ كەلە جاتقان جۇيەلى قولداۋ تەتىگى. دارىگەرلەر مەن زاڭگەرلەر ەڭبەگىنىڭ ارقاسىندا مىڭداعان ادامنىڭ دەنساۋلىعىنا دەر كەزىندە نازار اۋدارىلىپ, الەۋمەتتىك ماسەلەلەرى شەشىمىن تاپتى. بۇل – شالعايداعى ەلدى مەكەندەرگە كورسەتىلەتىن سەرۆيستىڭ جاڭا دەڭگەيى عانا ەمەس, مەملەكەتتىك سەرىكتەستىك پەن الەۋمەتتىك جاۋاپكەرشىلىكتىڭ ناقتى ۇلگىسى.
بۇگىندە ماماندار جامبىل وبلىسىندا قىزمەت كورسەتىپ ءجۇر. جەلتوقسان ايىندا جەتىسۋ جانە الماتى وبلىستارىنا بارىپ, بيىلعى جۇمىسىن 13 جەلتوقساندا اياقتايدى.
سۇلتان سەرىك ۇلى
