فورۋمعا قاتىسۋشىلار الدىمەن «MetalFormer» جشس ءوندىرىس الاڭىنا باردى. ولار زاماناۋي جابدىقتالعان جەلىلەردىڭ جۇمىسىمەن تانىسىپ, ءوندىرىس بارىسىنىڭ ءار كەزەڭىن باقىلاپ, شاتىر مەن قاپتاما ماتەريالدارىنىڭ جاسالۋ تەحنولوگياسىن, بولشەكتەردى دايىنداۋ مەن وڭدەۋ قادامدارىن قاداعالاپ كوردى. سونىمەن قاتار ستۋدەنتتەر ءوندىرىس ورىندارىندا قاۋىپسىزدىك تالاپتارى, ەڭبەك مادەنيەتى, كاسىبي داعدىلاردىڭ ماڭىزى تۋرالى اقپارات الدى. قاتىسۋشىلار اسىرەسە «Knauf», «TP-Link», «GROHE» سياقتى حالىقارالىق برەندتەردىڭ رەسۋرس ورتالىقتارىنا قىزىعۋشىلىق تانىتتى. وندا مەحاترونيكا, جەلىلىك اكىمشىلەندىرۋ, تەلەكوممۋنيكاتسيالار, «اقىلدى ءۇي» تەحنولوگيالارى بويىنشا وقۋ زەرتحانالارى تانىستىرىلدى. «FESTO» ايماقتىق ورتالىعى ستۋدەنتتەرگە ونەركاسىپتىك اۆتوماتيكا جۇمىسىن كورسەتۋ ارقىلى تسيفرلىق ءوندىرىس داۋىرىندە بىلىكتى مامان قالىپتاستىرۋدىڭ ماڭىزدى داعدىلارىن ۇيرەتتى. بۇل تاجىريبە ولارعا تەك ءوندىرىس بارىسىن عانا ەمەس, بولاشاقتا كاسىبي تەحنيكالىق مامان رەتىندە قالىپتاسۋدىڭ ماڭىزىن ءتۇسىندىردى.
ەكسكۋرسيادان كەيىن پوليتەحنيكالىق كوللەدجدە ديالوگ الاڭى ۇيىمداستىرىلدى. ءىس-شاراعا مەملەكەتتىك ورگانداردىڭ, ءىرى كومپانيالاردىڭ, جاستار ۇيىمدارىنىڭ وكىلدەرى قاتىستى. قاتىسۋشىلار تاجىريبەلى ماماندارمەن تىكەلەي سويلەسىپ, ينجەنەرلىك جانە وندىرىستىك باعىتتارداعى مانساپ مۇمكىندىگى تۋرالى جان-جاقتى سۇراپ ءبىلدى. سونىمەن قاتار ستۋدەنتتەر قازىرگى ەڭبەك نارىعىنداعى تالاپتار, كومپانيالاردا بولىپ جاتقان تەحنولوگيالىق جاڭالىقتار مەن جاس ماماندار ءۇشىن ماڭىزدى كاسىبي داعدىلار تۋرالى سۇراقتارىنا جاۋاپ الدى. اتاپ ايتساق, «جاستار رۋحى» جاستار قاناتىنىڭ توراعاسى اقەركە ەسكەندىروۆا, «BI Group» دامۋ ديرەكتورى بەكسۇلتان ولجاباي, «QazaqGaz» ۇلتتىق كومپانياسىنىڭ تەحنيكالىق ديرەكتورى ءۋاليحان قىمباتوۆ, استانا قالاسى ەنەرگەتيكا باسقارماسىنىڭ ورىنباسارى ماقسات ەسماعۇلوۆ ءسوز سويلەدى.
«جاستار رۋحى» جاستار قاناتىنىڭ توراعاسى اقەركە ەسكەندىروۆا جۇمىسشى ماماندىقتارىن دامىتۋ ۇلتتىق دەڭگەيدەگى باسىم باعىت ەكەنىن اتاپ ءوتتى. ول جاستاردىڭ تەحنيكالىق جانە وندىرىستىك سالالاردا ساپالى ءبىلىم الۋىنا مەملەكەت تاراپىنان جاسالىپ جاتقان ناقتى مۇمكىندىگىنە توقتالدى.
«مەملەكەت باسشىسى قاسىم-جومارت توقاەۆ 2025 جىلدى جۇمىسشى ماماندىقتارى جىلى دەپ جاريالادى. بۇل ەلىمىزدىڭ تۇراقتى دامۋى ءۇشىن بىلىكتى كادرلاردى دايارلاۋدىڭ ماڭىزىن كورسەتەدى. بۇگىندە جاستاردىڭ تەحنيكالىق داعدىلاردى مەڭگەرىپ, ەڭبەك نارىعىنا سەنىمدى كىرۋى ءۇشىن كوپ مۇمكىندىك جاسالىپ جاتىر. مۇنداي باستامالار كاسىبي بىلىكتىلىكتى ارتتىرۋمەن عانا شەكتەلمەي, جاستاردىڭ شىعارماشىلىق ويلاۋ قابىلەتىن, جاۋاپكەرشىلىك سەزىمىن جانە پراكتيكالىق داعدىلارىن قالىپتاستىرۋعا سەپتىگىن تيگىزەدى. سونىمەن قاتار جاستاردىڭ ءوندىرىس ورىندارىندا تاجىريبە جيناۋى, ءىرى كومپانيالارمەن تىكەلەي بايلانىس ورناتۋى ولاردىڭ مانسابىن وسىرەدى», دەدى ول.
پىكىرتالاس بارىسىندا «BI Group» كومپانياسىنىڭ دامۋ جونىندەگى ديرەكتورى بەكسۇلتان ولجاباي ءسوز الىپ, قۇرىلىس سالاسىنداعى جاس تەحنيكالىق ماماندارعا دەگەن سۇرانىستىڭ ارتقانىن ايتتى.
«قازىرگى تاڭدا قۇرىلىس يندۋسترياسىندا بىلىكتى جاس كادرلارعا قاجەتتىلىك كۇننەن-كۇنگە ارتىپ كەلەدى. كومپانيالار تەوريالىق بىلىمگە عانا ەمەس, ناقتى وندىرىستىك تاجىريبەسى بار ماماندارعا باسىمدىق بەرەدى. سوندىقتان جاستاردىڭ وقۋ بارىسىندا پراكتيكالىق داعدىلارىن جەتىلدىرۋى وتە ماڭىزدى. جاستار ۇيىمدارىمەن بىرلەسكەن جوبالار ارقىلى ستۋدەنتتەر ءوندىرىس بارىسىن ءوز كوزىمەن كورىپ, تاجىريبە جيناي الادى. بۇل بولاشاقتا ولاردىڭ كاسىبي مانسابىن جىلدام باستاۋعا مۇمكىندىك بەرەدى. ءبىز جاس كادرلاردى وقىتىپ قانا قويماي, ولاردى ناقتى جوبالارعا تارتۋ ارقىلى دا قولداۋدى ماقسات ەتەمىز», دەدى ول.
ەنەرگەتيكا ماماندىعىنىڭ ەكىنشى كۋرس ستۋدەنتى جاس مامانداردىڭ جۇمىسقا ورنالاسۋ جانە تاجىريبە جيناقتاۋ مۇمكىندىگى تۋرالى سۇراق قويدى: «مەن ەنەرگەتيكا فاكۋلتەتىنىڭ 2-كۋرس ستۋدەنتىمىن. بولاشاقتا ءوز ماماندىعىم بويىنشا جۇمىس ىستەگىم كەلەدى. بۇگىندە جاس ماماندار ءۇشىن قانداي مۇمكىندىك بار جانە وقۋ كەزىندە مانساپتى باستاۋعا بولا ما؟» دەپ سۇرادى فورۋمعا قاتىسۋشى. بۇل سۇراققا استانا قالاسى ەنەرگەتيكا باسقارماسى باسشىسىنىڭ ورىنباسارى ماقسات قايىركەش ۇلى جاۋاپ بەردى. ول الدىمەن ەلوردادا ەنەرگەتيكالىق ينفراقۇرىلىمدى جاڭعىرتۋعا باعىتتالعان ءىرى جوبالاردىڭ جۇزەگە اسىرىلىپ جاتقانىن اتاپ ءوتتى.
«بۇل جوبالار جاس ينجەنەرلەرگە سۇرانىستىڭ جوعارى ەكەنىن كورسەتەدى. ەلورداداعى ەنەرگەتيكالىق سەكتوردا ماماندارعا دەگەن قاجەتتىلىك ارتىپ وتىر. قازىرگى كەزدە ستۋدەنتتەرگە وندىرىستىك تاجىريبەدەن ءوتۋ, سالالىق جوبالارعا قاتىسۋ, ماماندىق بويىنشا جۇمىسقا ورنالاسۋ مۇمكىندىگى قاراستىرىلعان. بەلسەندىلىك تانىتقان ستۋدەنتتەر وقىپ ءجۇرىپ-اق كاسىبي جولىن باستاي الادى. تاجىريبەدەن وتكەن جاستار ەڭبەك نارىعىندا باسەكەگە قابىلەتتى مامان رەتىندە قالىپتاسادى», دەدى ول.
قالالىق ءماسليحات دەپۋتاتى, «جاستار رۋحى» استانا قالالىق فيليالىنىڭ توراعاسى ارسلانبەك ماعزۇم فورۋمنىڭ ماڭىزىن اتاپ ءوتىپ, مۇنداي الاڭداردىڭ جاستارعا بىلىممەن شەكتەلمەي, ەڭبەك نارىعىنداعى وزگەرىستەر مەن قازىرگى زامانعى تالاپتاردى تۇسىنۋگە كومەكتەسەتىنىن ايتتى.
ء«بىز جاستارعا ءوندىرىستى ءوز كوزدەرىمەن كورسەتۋگە تىرىسامىز. قالاي ۇيىمداستىرىلعانىن, قانداي جۇمىستار جۇرەتىنىن, دامۋدىڭ قانداي كەلەشەگى بار ەكەنىن كورسەتۋ ماڭىزدى. بۇگىنگى ستۋدەنتتەر ەرتەڭ ۇلتتىق جانە جەكە كومپانيالاردا جۇمىس ىستەيتىن بولادى. جاستار ءوز قابىلەتىن كورسەتە وتىرىپ, كاسىبي وسۋگە, مانساپ جولىن سەنىمدى باستاۋعا مۇمكىندىك الادى. مۇنداي تاجىريبەلەر ولارعا تەوريالىق بىلىممەن شەكتەلمەي, ءوندىرىستى تۇسىنۋگە, زاماناۋي تەحنولوگيالارمەن تانىسۋعا, بولاشاق مامان رەتىندە قاجەتتى داعدىلاردى قالىپتاستىرۋعا كومەكتەسەدى. فورۋمعا قاتىسقان جاس باسشىلار ەلىمىزدە تالانتتى بولساڭ, كەز كەلگەن سالادا جوعارى ساتىعا كوتەرىلۋگە بولاتىنىن دالەلدەپ وتىر. بۇل جاستارعا سەنىم بەرەدى دەپ ويلايمىن», دەدى دەپۋتات.
ۇيىمداستىرۋشىلاردىڭ ايتۋىنشا, مۇنداي كەزدەسۋلەر الداعى ۋاقىتتا تۇراقتى وتكىزىلىپ, جاستاردىڭ جۇمىس بەرۋشىلەرمەن تىكەلەي بايلانىس ورناتۋىنا, ءوندىرىس ورىندارىن ارالاۋىنا, ماماندىق تاڭداۋ بويىنشا ناقتى كەڭەس الۋىنا مۇمكىندىك جاسالاتىن بولادى. فورۋم جاستاردىڭ جۇمىسشى ماماندىقتارىنا دەگەن قىزىعۋشىلىعىن ارتتىرىپ, بۇل باعىتتىڭ تۇراقتىلىقتى قامتاماسىز ەتەتىن عانا ەمەس, سونىمەن قاتار ناقتى كاسىبي ورلەۋگە مۇمكىندىك بەرەتىنىن كورسەتتى. سونداي-اق ءىس-شارا ستۋدەنتتەرگە ينجەنەرلىك جانە تەحنيكالىق سالالارداعى بىلىكتى مامان بولۋعا باعىت سىلتەپ, جاستاردى قولداۋعا دايىن ءىرى كومپانيالارمەن بايلانىس ورناتۋعا سەپتىگىن تيگىزدى.
