تاراپتار ەكىجاقتى ءوزارا ءىس-قيمىلدى كەڭەيتۋ, ونىڭ ىشىندە مەديتسينا سالاسىنا تسيفرلىق شەشىمدەر مەن جاساندى ينتەللەكت تەحنولوگيالارىن ەنگىزۋ بويىنشا تاجىريبە الماسۋ ماسەلەلەرىن تالقىلادى.
تۇرىك ارىپتەستەرى مەديتسينالىق كومەكتى ۇيىمداستىرۋدى, قارجىلاندىرۋ قاعيداتتارىن, تسيفرلاندىرۋ دارەجەسىن جانە نەگىزگى سالالىق كورسەتكىشتەردى قوسا العاندا, ۇلتتىق دەنساۋلىق ساقتاۋ جۇيەسىنىڭ جۇمىس ىستەۋى تۋرالى بايانداما جاسادى.
جەكە بلوك حالىقارالىق مەديتسينالىق قىزمەتتەر مەن مەديتسينالىق ءتۋريزمدى دامىتۋدى ۇيلەستىرەتىن ۇلتتىق قۇرىلىم – USHAŞ جۇمىسىنا ارنالدى.
E-Nabız ۇلتتىق تسيفرلىق پلاتفورماسىنىڭ ارحيتەكتۋراسىنا جانە تۇركيانىڭ باسقا دا مەديتسينالىق اقپاراتتىق جۇيەلەرىنە ەرەكشە نازار اۋدارىلادى. ۇسىنىلعان شەشىمدەر مەديتسينالىق دەرەكتەردى بىرىكتىرۋدى, قىزمەت ساپاسىن ارتتىرۋدى جانە پاتسيەنتتەر ءۇشىن تسيفرلىق قىزمەتتەردىڭ ىڭعايلىلىعىن قامتاماسىز ەتەدى.
تاراپتار قازاقستاندا وسىنداي شەشىمدەردى بەيىمدەۋ – مەديتسينالىق دەرەكتەردىڭ بىرىڭعاي بازاسىن قۇرۋ, ەلەكتروندىق دەنساۋلىق پاسپورتتارىن دامىتۋ جانە پايدالانۋشى سەرۆيستەرىن جەتىلدىرۋ مۇمكىندىگىن قاراستىردى.
بۇدان باسقا, ەربول وسپانوۆ پەن شۋايپ بيريندجي كاسىبي ءوزارا ءىس-قيمىلدى نىعايتۋ جانە وزىق ادىستەمەلەرمەن الماسۋ ءۇشىن قازاقستاندا تۇرىك مەديتسيناسى كۇندەرىن وتكىزۋ باستاماسىن تالقىلادى, سونداي-اق ەكى ەلدىڭ كلينيكالارى مەن ۋنيۆەرسيتەتتەرىنىڭ بازاسىندا مەديتسينالىق كادرلاردىڭ بىلىكتىلىگىن ارتتىرۋ جانە قايتا دايارلاۋ باعدارلامالارىنىڭ پەرسپەكتيۆالارىن قاراستىردى.
كەزدەسۋ قورىتىندىسى بويىنشا تاراپتار تۇرىك تاجىريبەسىن ەسكەرە وتىرىپ, ارىپتەستىكتى ودان ءارى دامىتۋعا جانە تسيفرلىق جوبالاردى بىرلەسىپ ىسكە اسىرۋعا دايىن ەكەندىكتەرىن راستادى. دەنساۋلىق ساقتاۋدى تسيفرلاندىرۋ سالاسىنداعى ىنتىماقتاستىق تۋرالى بىرلەسكەن كەلىسىمدى ازىرلەۋ جانە وعان قول قويۋ جوسپارلانۋدا.
