ەلدىڭ بارلىق وڭىرىندە تۇراقتى نەگىزدە جۇمىس ىستەيتىن وڭىرلىك كوميسسيالار دەلدالدىق تىزبەكتەردى زەردەلەپ, باعا قالىپتاستىرۋ ۇدەرىسىن كەشەندى تۇردە تالدايدى. مۇنداي ءتاسىل ءتيىمسىز دەلدالداردى جانە تاۋار باعاسىنىڭ نەگىزسىز قىمباتتاۋ فاكتىلەرىن دەر كەزىندە انىقتاۋعا مۇمكىندىك بەرەدى.
جىل باسىنان بەرى جەرگىلىكتى اتقارۋشى ورگاندار وڭىرلىك كوميسسيالاردىڭ 960 وتىرىسىن وتكىزدى. ناتيجەسىندە 2727 ءتيىمسىز دەلدال جانە ساۋدا ۇستەمەسىن زاڭسىز كوتەرۋ فاكتىلەرى انىقتالدى. 2342 جاعداي بويىنشا اكىمشىلىك قۇقىق بۇزۋشىلىق تۋرالى حاتتامالار تولتىرىلىپ, 385 دەلدال جەتكىزۋ تىزبەگىنەن شىعارىلدى. كوميسسيالار جۇمىسىنىڭ تيىمدىلىگى قما, بقدا, مكد جانە باسقا دا مەملەكەتتىك ورگاندار وكىلدەرىنىڭ قاتىسۋى ەسەبىنەن ارتتى. وتىرىستارعا وندىرۋشىلەر مەن كاسىپكەرلەر شاقىرىلىپ, قولدانىستاعى زاڭناما تالاپتارى, سونىڭ ىشىندە ساۋدا ۇستەمەسىنىڭ شەكتى مولشەرى تۇسىندىرىلەدى.
سونىمەن قاتار الەۋمەتتىك ماڭىزى بار تاۋارلاردىڭ قوزعالىسىن باقىلاۋعا باعىتتالعان پيلوتتىق جوبانىڭ اياسىندا ەلەكتروندىق شوت-فاكتۋرالاردى بىرلەسىپ تالداۋ جۇرگىزىلۋدە. بۇل قۇرال باعانىڭ نەگىزسىز وسۋىنە جانە ارتىق دەلدالدىق بۋىنداردىڭ پايدا بولۋىنا جول بەرەتىن تاۋەكەلدەردى جەدەل انىقتاۋعا مۇمكىندىك بەرەدى. جىل باسىنان بەرى 10 ميلليوننان استام جەتكىزۋ تىزبەگى تالدانىپ, ساۋدا زاڭناماسىن بۇزۋ قاۋپىنىڭ 914 بەلگىسى انىقتالدى.
جۇرگىزىلگەن تالداۋ مەن كوميسسيالاردىڭ جۇمىسى ناتيجەسىندە اۋماقتىق دەپارتامەنتتەر اقبتك-ءنىڭ 204-4-بابى بويىنشا ساۋدا ۇستەمەسىن 15 پايىزدان جوعارى قولدانعانى ءۇشىن 2438 اكىمشىلىك قاۋلى قابىلدادى. ونىڭ ىشىندە 1267 ايىپپۇلدىڭ جالپى سوماسى 50,8 ميلليون تەڭگەدەن استى, سونداي-اق 1171 ەسكەرتۋ بەرىلدى. ەلەكتروندىق شوت-فاكتۋرالاردى تالداۋ الەۋمەتتىك ماڭىزى بار تاۋارلارعا باعانى نەگىزسىز كوتەرۋدىڭ ناقتى جاعدايلارىن انىقتاۋعا مۇمكىندىك بەردى.
ماسەلەن, باتىس قازاقستان وبلىسىندا «جۇلدىز» جەكە كاسىپكەرلىگى «يلەتسكايا» تۇزىن كيلوگرامىن 55 تەڭگەدەن ساتىپ الىپ, 90 تەڭگەدەن ساتقان. ساۋدا ۇستەمەسى 63,6 پايىزدى قۇرادى. ۇلىتاۋ وبلىسىندا جەكە كاسىپكەر بايكەنجينوۆا ز.م. «Eurasian Foods Corporation» اق-نان «شەدەۆر» كۇنباعىس مايىن (1 ل) ساتىپ الىپ, 1100 تەڭگەدەن ساتقان, ساۋدا ۇستەمەسى 22,22 پايىزعا جەتكەن. قوستاناي وبلىسىندا جەكە كاسىپكەر كاششەنكو ي.ل. پيازدى ساتىپ الىپ, كيلوگرامىن 150 تەڭگەدەن ساتقان, ساۋدا ۇستەمەسى 50 پايىزدى قۇراعان.
اتالعان فاكتىلەر بويىنشا كاسىپكەرلەرگە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 204-4-بابىنا سايكەس اكىمشىلىك شارالار قولدانىلدى.
