اشىلۋ سالتاناتىندا قۇتتىقتاۋ ءسوز العان زايسان ءبىلىم ءبولىمىنىڭ باسشىسى مەرۋەرت مۇراتقىزى كونفەرەنتسيا قوناقتارىن قۇتتىقتاپ, ابايدىڭ 180 جىلدىعى اياسىنداعى يگى شارالاردىڭ ماڭىزىن اتاپ ءوتتى. «شاكىرتسىز ۇستاز – تۇل» دەگەن اباي سوزىنە توقتالعان سپيكەر, گۇلزيفا يسرايلقىزىنىڭ شاكىرتتەرى وسى مەكتەپتە ارنايى كابينەت اشۋعا ۇيىتقى بولعانىن جەتكىزدى. ول كونفەرەنتسيانىڭ مۇعالىمدەر ءۇشىن پايدالى عىلىمي الاڭعا اينالارىنا سەنىم ءبىلدىردى.
وسىنداي تىلەكتەستىكتى زايسان اۋدانى اكىمىنىڭ ورىنباسارى نۇرعايني نۇرلىبەكقىزى دا ايتىپ, اۋدان كولەمىندە ءوتىپ جاتقان اباي جىلىنا ارنالعان شارانىڭ تاريحي ماڭىزىن اتاپ ءوتتى. كەلەسى ءسوز العان «اتامۇرا» باسپاسىنىڭ جەتەكشى رەداكتورى كۇلزادا بازىلبەكقىزى «اتامۇرا» كورپوراتسياسىنىڭ پرەزيدەنتى راقىمعالي ابرار ۇلىنىڭ قولداۋىمەن گۇلزيفا يسرايلقىزىنا ارنالعان سىنىپقا اباي شىعارمالارىنان 100 كىتاپ تارتۋ ەتىلگەنىن جەتكىزدى. سونىمەن بىرگە ابايدىڭ 180 جىلدىعىنا وراي مەكتەپتەرگە 1000 كىتاپ تاراتىلعانىن ايتتى.
سالتاناتتى ءراسىمدى م. اۋەزوۆ مەكتەبىنىڭ باسشىسى باقىتگۇل قيزاتقىزى قورىتىندىلاپ, مەكتەپ ۇجىمىنىڭ كونفەرەنتسيانى ۇيىمداستىرۋعا بەلسەندى اتسالىسقانىن ايتتى. ۇيىمداستىرۋشىلارعا العىس ءبىلدىرىپ, كونفەرەنتسيانىڭ اشىق ەكەنىن جاريالادى.
كونفەرەنتسيا ەكى بولىمنەن تۇردى. ءبىرىنشى ءبولىم – ۇلى ابايدىڭ 180 جىلدىعىنا ارنالدى. «اتامۇرا» باسپاسىنىڭ اۆتورى, ل.ن. گۋميلەۆ اتىنداعى ەۇۋ-ءدىڭ اباي اكادەمياسىنىڭ باس عىلىمي قىزمەتكەرى, ف.ع.ك ايمان سوۆەتقىزى اقتانوۆا «اباي شىعارمالارىنداعى ۇلتتىق قۇندىلىقتاردى تانىتۋ جولدارى» اتتى ءدارىس وقىدى. ول ساباق ماقساتتارىن قۇرۋ, ادەبيەتتى وقىتۋ تاسىلدەرى جونىندە ماڭىزدى ادىستەمەلىك ويلارىمەن ءبولىستى. ەكىنشى دوكلادتى اباي اتىنداعى قازۇپۋ-ءدىڭ دوتسەنتى, پ.ع.ك. بيدانا قاباتاي «ورتا مەكتەپتە اباي شىعارمالارىن وقىتۋ ماسەلەلەرى» تاقىرىبىندا جۇرگىزدى. ءۇشىنشى ءسوزدى گۇلزيفا يسرايلقىزىنىڭ شاكىرتى, تاريحشى ادىلبەك ارتىقباەۆ الىپ, «سەگىز اياق» ءانىنىڭ شىعۋ تاريحىن بايانداپ, ءاندى دومبىرادا ورىنداپ بەردى. سونداي-اق اقجول قادىلبەك ۇلى «ابايتانۋشى عالىمداردىڭ ەڭبەكتەرىنىڭ ماڭىزى» جايىندا مازمۇندى ءدارىس وقىدى.
ەكىنشى ءبولىم گۇلزيفا يسرايلقىزىنىڭ ءومىر جولىنا ارنالدى. العاشقى ءسوزدى شاكىرتى كۇلزادا بازىلبەكقىزى « ۇلى ابايدىڭ ۇرپاقتارى» اتتى بەينەشولۋمەن باستاپ, ۇستازىنىڭ ادەبيەت ءپانىن وقىتۋداعى ادىستەمەلىك ەڭبەكتەرىن تانىستىردى. زۋحرا داۋىتوۆا «اسىلدىڭ سىنىعى – گۇلزيفا يسرايلقىزىنىڭ ونەگەلى ءومىرى» تاقىرىبىندا ۇستاز ومىرىنە شولۋ جاسادى.
كەلەسى ماڭىزدى ءسات – گۇلزيفا يسرايلقىزىنىڭ كابينەتىن اشۋ ءراسىمى بولدى. لەنتانى ايمان اقتانوۆا مەن اۋدان ءتىل ءبولىمىنىڭ باسشىسى رايسا شوتاەۆا قيىپ, شاشۋدى قىزى روزا اپاي شاشتى. كابينەتكە كىرگەن ساتتە ينتەراكتيۆتى تاقتادان اقىن سەرىك قۇسانباەۆتىڭ «ۇشقان ۇيام» ولەڭى وقىلىپ تۇردى. بۇل كورىنىس ۇستاز شاكىرتتەرى مەن قوناقتارعا ەرەكشە اسەر قالدىردى.
گۇلزيفا يسرايىلقىزى – سانالى عۇمىرىن ۇستازدىققا ارناعان تۇلعا. ول سارىجال مەكتەبىن بىتىرگەن سوڭ, ەڭبەك جولىن سول مەكتەپتە باستاعان. سوعىس جىلدارى اۋىلشارۋاشىلىق جۇمىسىنا ارالاسىپ, مايدانعا قاجەت ونىمدەر دايىنداۋعا ۇلەس قوسقان. 1945 جىلى اباي مەكتەبىنە اۋىسىپ, قازاق ءتىلى مەن ادەبيەتىنەن ساباق بەردى. «اباي ۇرپاقتارى» جۋرنالىن شىعارۋعا باسشىلىق ەتتى. 1965 جىلى ن. كرۋپسكايا اتىنداعى پەدينستيتۋتتى ءتامامدادى. 2003 جىلى وبلىس اكىمىنىڭ «قۇرمەت گراموتاسىمەن» ماراپاتتالىپ, «زايسان اۋدانىنىڭ قۇرمەتتى ازاماتى» اتاندى.
گۇلزيفا يسرايلقىزى – اقىن. ولەڭ جازۋدى 14 جاسىندا باستاعان. شىعارمالارى «دوستىق», «كوممۋنيزم تۋى» گازەتتەرىندە جاريالانعان. 2010 جىلى زايسان اكىمدىگىنىڭ قولداۋىمەن ولەڭدەرى مەن ءومىربايانى «تالانت» باسپاسىنان كىتاپ بولىپ شىقتى. «ۇرپاق ءسوزى», «ەسكەرتكىشى اتامنىڭ», « ۇلىلىق ماڭگى ولمەيدى», «مۇحتار اعاعا» اتتى 50-دەن اسا ولەڭى جيناققا ەنگەن.
گۇلزيفا يسرايلقىزىنىڭ ونەگەلى ەڭبەگىن جالعاستىرىپ جۇرگەن شاكىرتتەرى بۇگىندە ءتۇرلى سالادا ەلگە تانىمال ماماندار اتاندى. اراسىندا اقىن, عالىم, ۇستاز, كاسىپكەر, باسشىلىق قىزمەتكەرلەر بار: سەرىك قۇسانباەۆ, زۋحرا داۋىتوۆا, كۇلزادا يسكاكوۆا, تولەۋبەك يسكاكوۆ, تۇرسىنبەك مۇساحانوۆ, ادىلبەك ارتىقباەۆ, نۇرلىبەك كەگەنوۆ, گۇلسارا تلەۋبەردينا جانە باسقالار.
وسىنداي تابيعاتى دا, تۇلعالارى دا باي زايسان وڭىرىندە گۇلزيفا يسرايلقىزى سەكىلدى ءبىرتۋار ۇستازدىڭ ەڭبەگى – ءوسىپ كەلە جاتقان ۇرپاق ءۇشىن تاعىلىم مەن ونەگەنىڭ وشپەس مەكتەبى.
گۇلجانات قوقانوۆا,
ى. التىنسارين توسبەلگىسىنىڭ يەگەرى
