فوتو: Pixabay.com
كەلىسسوز بارىسىندا تاراپتار ەلەكتر كولىكتەرى, زاريادتاۋ ينفراقۇرىلىمى جانە تۇراقتى موبيلدىك سالاسىنداعى جوبالاردى قازاقستاندا ىسكە اسىرۋ پەرسپەكتيۆالارىن, سونداي-اق GSM كومپانياسىنىڭ ايماقتىق وكىلدىگىن الماتى قالاسىندا اشۋ مۇمكىندىگىن تالقىلادى. اتالعان وكىلدىك كومپانيانىڭ تمد كەڭىستىگىندەگى قىزمەتىن ۇيلەستىرۋ ورتالىعى بولماق.
VinGroup قۇرامىنداعى GSM كومپانياسى وڭتۇستىك-شىعىس ازياداعى ەڭ ءىرى ەلەكتر كولىگى پلاتفورماسى. Xanh SM برەندىمەن ول 12 ميلليوننان استام كليەنتكە قىزمەت كورسەتەدى, شامامەن 100 مىڭ ەلەكتر كولىگىن پايدالانادى, ۆەتنام تاكسي نارىعىنىڭ 40% ۇلەسىنە يە جانە ايماق ەلدەرىندە ءوز قاتىسۋىن كەڭەيتىپ جاتىر.
Invest.gov.kz مالىمەتىنشە قازاقستاندا VinGroup VinFast ەلەكتر كولىكتەرىن پايدالانۋ ارقىلى جولاۋشىلار تاسىمالى قىزمەتىن ىسكە قوسۋ, ەلەكتر كولىكتەرىنە ارنالعان زاريادتاۋ ستانتسيالارىنىڭ جەلىسىن قۇرۋ, سونداي-اق سەرۆيستىك جانە وندىرىستىك قۋاتتاردى جەرگىلىكتەندىرۋ مۇمكىندىكتەرىن قاراستىرىپ جاتىر. بۇدان بولەك, كومپانيا ءبىلىم بەرۋ, مەديتسينا, دەۆەلوپمەنت جانە سمارت-قالالار ينفراقۇرىلىمىن دامىتۋ سالالارىنداعى جوبالارعا قاتىسۋعا مۇددەلىلىك ءبىلدىردى.
ماديار سۇلتانبەك VinGroup باستاماسى قازاقستاننىڭ «جاسىل» ەكونوميكا مەن ەكولوگيالىق كولىك ينفراقۇرىلىمىن دامىتۋ ستراتەگياسىنا سايكەس كەلەتىنىن اتاپ ءوتىپ, «Kazakh invest» كومپانياسىنىڭ جوبالاردى جۇزەگە اسىرۋدىڭ بارلىق كەزەڭدەرىندە كەشەندى قولداۋ كورسەتۋگە دايىن ەكەنىن جەتكىزدى:
«ەلەكتر كولىكتەرى مەن زاريادتاۋ ينفراقۇرىلىمىن دامىتۋ – ەكونوميكانى ەكولوگيالىق جاڭعىرتۋدىڭ باستى باعىتتارىنىڭ ءبىرى. ءبىز VinGroup كومپانياسىنىڭ تەحنولوگيالاردى جەرگىلىكتەندىرۋگە دەگەن قىزىعۋشىلىعىن جوعارى باعالايمىز جانە جوبانى ىسكە قوسۋ ماسەلەلەرىن جان-جاقتى پىسىقتاۋعا دايىنبىز», دەدى ول.
كەزدەسۋ قورىتىندىسىندا تاراپتار جوبالىق باستامالاردى بىرلەسىپ ازىرلەۋدى جالعاستىرۋعا جانە ەلەكترلىك موبيلدىك, تسيفرلىق تەحنولوگيالار مەن تۇراقتى دامۋ سالالارىنداعى ناقتى ىنتىماقتاستىق باعىتتارىن ايقىنداۋعا ۋاعدالاستى.
