سۋرەتتى تۇسىرگەن – ەرلان ومار, «EQ»
ينۆاتاكسي قىزمەتىن ءبىرىنشى توپتاعى مۇمكىندىگى شەكتەۋلى جاندار, تىرەك-قوزعالىسى قيىن ناۋقاستار, جەكە كومەكشىنىڭ سۇيەۋىمەن جۇرەتىن نە بولماسا مۇگەدەكتەر ارباسىنا تاڭىلعاندار قولدانا الادى. سونىمەن بىرگە «اۋتيزم سپەكترىنىڭ بۇزىلۋى», «اقىل-وي كەمىستىگى» دياگنوزى تاڭىلعاندار, پسيحيكالىق مىنەز-قۇلقىنىڭ تۇراقتىلىعى بۇزىلعاندار, داۋن سيندرومىنا شالدىققان سىرقاتتار دا ينۆاتاكسيدى تەگىن شاقىرتا الادى. دەگەنمەن تاپسىرىس قابىلداۋشىلار كوبىنەسە جۇمىس ىستەپ جۇرگەندەر مەن ءبىلىم الۋشىلارعا كوبىرەك باسىمدىق بەرەدى.
ەڭبەك جانە حالىقتى الەۋمەتتىك قورعاۋ مينيسترلىگى بيىل ەرەكشە قاجەتتىلىكتەرى بار ازاماتتارعا ينۆاتاكسي قىزمەتىنىڭ اگرەگاتورلارىن پايدالانۋداعى قاناتقاقتى جوبانى ىسكە قوستى. يگى باستامانى جۇزەگە اسىرۋ شەڭبەرىندە قاڭتار ايىنان بەرى استانا, الماتى قالالارىندا 401,9 مىڭ تاپسىرىس قابىلدانعان. بىلتىر مۇگەدەكتىگى بار ادامدارعا ينۆاتاكسي قىزمەتى 207,2 مىڭ رەت كورسەتىلىپتى. قىزمەتتىڭ جىلدامدىعى مەن ساپاسىن ارتتىرۋ ماقساتىندا مينيسترلىك اكىمدىكتەرمەن بىرلەسىپ وزگەرىس ەنگىزدى. ايتالىق, ينۆاتاكسي قىزمەتىنە ازاماتتار ءبىر كۇن بۇرىن تەلەفون ارقىلى جازىلۋى قاجەت بولاتىن. ءوز ساپارلارىن الدىن الا جوسپارلاۋعا, ينۆاتاكسيگە ءبىر كۇن بۇرىن تاپسىرىس بەرىپ, كۇتۋگە تۋرا كەلەتىن. سونداي-اق قىزمەتتى ۇسىنۋشى مەكەمەلەردە كولىك قۇرالدارىنىڭ جەتىسپەۋشىلىگى دە قولبايلاۋ ەدى. وسى جاعدايلاردى جەڭىلدەتۋ ماقساتىندا قىزمەت كورسەتۋگە تاكسي اگرەگاتورلارىن تارتۋ باعىتىندا قاناتقاقتى جوبا قولعا الىندى.
مۇنداعى باستى ارتىقشىلىق – ساپارلاردىڭ اقىسىنان پايىز ەسەلەنبەيدى. بۇعان دەيىن پايىزدىق ۇستەمە اگرەگاتور پلاتفورمالارىنىڭ پايداسىنا اۋدارىلاتىن. ياندەكس كومپانياسى قاناتقاقتى جوباعا وتەۋسىز نەگىزدە قاتىسۋعا نيەت ءبىلدىردى. وسىلايشا, يگى ءىس شەڭبەرىندە ازاماتتار ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانۋعا مۇمكىندىك الدى. ينۆاتاكسيگە جۇگىنگەن جاندار كولىكتى قىسقا ۋاقىتتا تاڭدايدى, ونلاين رەجىمدە تاپسىرىس مارتەبەسىن قاداعالايدى ءارى كولىكپەن قانشا رەت جۇرگەنىن سارالاپ, مونيتورينگ جاساي الادى. قوسىمشادا مۇگەدەكتىگى بار ادامداردىڭ جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋىنە ارنالعان ەكران ىسكە قوسىلدى. جۇرگىزۋشىلەر ادامدى كولىككە وتىرعىزىپ, دىتتەگەن جەرگە جەتكىزگەن سوڭ, تۇسىرەر كەزدە قالاي كومەك كورسەتۋ كەرەكتىگىن ارنايى نۇسقاۋلىق ارقىلى تانىپ بىلەدى.
جاقىندا ەڭبەك جانە حالىقتى الەۋمەتتىك قورعاۋ مينيسترلىگىندە ينۆاتاكسي قىزمەتىنە قاتىستى كەڭەس ءوتىپ, سول جوبانى ءالى دە جانداندىرا ءتۇسۋ جايى تالقىلاندى. مۇگەدەكتىگى بار ادامداردى الەۋمەتتىك قورعاۋ سالاسىنداعى رەسپۋبليكالىق ۇيلەستىرۋ كەڭەسىنىڭ «قولجەتىمدى كولىك» كىشى توبىنىڭ وتىرىسىندا ينۆاتاكسي شاقىرتۋ الەۋمەتتىك قىزمەتتەر پورتالى ارقىلى جۇزەگە اسىرىلاتىنى ايتىلدى. ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ۆيكتوريا شەگاي ينۆاتاكسي قىزمەتىن جانداندىرىپ, ساپاسىن جاقسارتىپ, اشىقتىعىن ارتتىرۋ قاناتقاقتى جوبانىڭ باستى ماقساتى ەكەنىن اتاپ ءوتتى.
– مينيسترلىكتە وتكەن كەڭەستە ينۆاتاكسي قىزمەتىنىڭ جاڭا فورماتى ەگجەي-تەگجەيلى ءتۇسىندىرىلىپ, قاعيدالارى قابىلداندى. ينۆاتاكسيگە تاپسىرىس بەرۋدى الەۋمەتتىك قىزمەتتەر پورتالىنا كوشىرۋدىڭ تيىمدىلىگى مول. مۇگەدەكتىگى بار جانداردىڭ ءوز بەتىنشە تاڭداۋ جاساۋىنا, قاجەتتىلىكتەرىن ەسكەرە وتىرىپ كولىك شاقىرتۋعا ءارى كۇتۋ ۋاقىتىن قىسقارتۋعا مۇمكىندىك بەرەدى. سونداي-اق ۇدەرىستەردىڭ اشىقتىعىن قامتاماسىز ەتىپ, ينۆاتاكسي سانىن ارتتىرىپ, ساپاعا وڭ اسەر ەتەدى, – دەدى ۆ.شەگاي.
سونىمەن قاتار ينۆاتاكسي قىزمەتىن ۇسىنۋشىلارعا تالاپ كۇشەيەتىنىن دە ەسكەرتتى. جولاۋشىلاردى مىندەتتى ساقتاندىرۋ, ارنايى جابدىقتالعان اۆتوكولىكتەردىڭ سانىن ارتتىرىپ, ولاردى تىزگىندەۋشى جۇرگىزۋشىلەردىڭ تاجىريبەسىنە, بىلىكتىلىگىنە باسا نازار اۋدارۋ جۇكتەلەدى.
استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى الەۋمەتتىك جوبالار مەن وبەكتىلەرگە قولجەتىمدىلىك ءبولىمىنىڭ باسشىسى اينۇر اۋباكىروۆا ەلوردادا قىزمەت كورسەتەتىن 134 ينۆاتاكسي كولىگى بار ەكەنىن, ولاردىڭ ىشىندە 26-سى ارنايى جابدىقتالعانىن جەتكىزدى. ينۆاتاكسي شاقىرۋعا وتىنىشتەردى قابىلداۋ جوسپارلانعان ءىس-شاراعا دەيىن ءبىر تاۋلىك بۇرىن ديسپەتچەرلىك قىزمەتكە تەلەفونمەن حابارلاسىپ جازىلاتىنىن ەسكەرتتى.
– ينۆاتاكسي قىزمەتتەرىن كورسەتۋدى جاقسارتۋ, ءوتىنىم بەرۋ تەتىگىن جەتىلدىرۋ ماقساتىندا 2023 جىلدان باستاپ «ينۆاتاكسي قىزمەتتەرىن ياندەكس تاكسي اگرەگاتورى ارقىلى كورسەتۋ» جوباسى ىسكە قوسىلدى. جوباعا بيىل 1129 مۇگەدەكتىگى بار ادامدار مەن بالالار قاتىسىپ, 340 مىڭنان استام ساپار جۇزەگە اسىرىلدى. جوبانى ىسكە اسىرۋ بارىسىندا قىزمەت الۋشىلار موبيلدىك قوسىمشانى پايدالانا الادى. وندا تاۋلىك بويى كەز كەلگەن ۋاقىتتا كولىككە تاپسىرىس بەرىپ, ونىڭ قوزعالىسىن ونلاين باقىلاۋعا مۇمكىندىك بار. سونداي-اق ياندەكس موبيلدىك قوسىمشاسىندا تەحنيكالىق قولداۋ جۇيەسى قاراستىرىلعان. جوبا وڭ ناتيجە بەرىپ, قىزمەت الۋشىلاردىڭ كوڭىلىنەن شىقتى. سەبەبى بۇگىندە ينۆاتاكسي قىزمەتىنە بىردەن تاپسىرىس بەرۋ مۇمكىندىگى جوعارى. ىڭعايلى موبيلدىك قوسىمشا كىدىرىسسىز ىستەيدى, تاۋلىك بويى ديسپەتچەردىڭ جاۋابىن كۇتپەي-اق كولىك شاقىرتىپ, ءجۇرۋ باعىتىن دا قاداعالاي الادى, – دەيدى مامان.
ەلوردادا ينۆاتاكسي قىزمەتىن ۇسىنۋشى ۇيىمنىڭ ءبىرى – «قازاق زاعيپتار قوعامى» قوعامدىق بىرلەستىگىنىڭ «استانا» كورپوراتيۆتىك قورى.
– ءبىزدىڭ ۇجىم ينۆاتاكسي تاسىمالىمەن قاتار جەكە كومەكشى قىزمەتىن دە كورسەتەدى. بۇرىن بۇل قىزمەتكە جۇگىنۋشى ازاماتتار كۇنىنە ەكى مارتە عانا تاپسىرىس بەرە السا, بۇگىندە بىرنەشە رەت ساپارلاۋىنا مۇمكىندىگى بار. قىزمەتتى پايدالانۋشىلاردىڭ قاسىندا جەكە كومەكشىسى جۇرەدى. ول ءوزىنىڭ تۋىسى, اعايىنى, ءتىپتى بالاسى دا بولۋى مۇمكىن. جەكە كومەكشىسى بولماعان جاعدايدا ءبىزدىڭ كولىك جۇرگىزۋشىلەر ينۆاتاكسي شاقىرعان ادامدى ءوزى كولىگىنە وتىرعىزىپ, دىتتەگەن جەرىنە بارعان سوڭ جاۋاپتى ادامدارعا تابىستايدى. استانا قالاسىندا قىزمەت كورسەتەتىن 25 اۆتوكولىگىمىز بار, – دەيدى قوردىڭ جەتەكشىسى ومار بايماقاشەۆ.
ينۆاتاكسي قىزمەتىن كورسەتۋدىڭ جاڭا تەتىگىنىڭ ىسكە قوسىلۋىن قامتاماسىز ەتۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى دە ءتيىستى دايىندىق جۇمىستارىن جۇيەلى جۇرگىزىپ كەلەدى. الەۋمەتتىك قىزمەتتەر پورتالىنىڭ جۇمىسىن رەتتەيتىن قولدانىستاعى نورماتيۆتىك قۇقىقتىق اكتىلەرگە, سونىڭ ىشىندە كەپىلدەندىرىلگەن سومانى ايقىنداۋ, قىزمەت كورسەتۋشىلەردى تىركەۋ قاعيدالارىنا بىرقاتار وزگەرىس ەنگىزىلدى. ينۆاتاكسي تۇتىنۋشىلاردىڭ يگىلىگىنە اينالۋعا ءتيىس.
