قارجى جۇيەسى قىزمەتكەرلەرىنىڭ كاسىبي مەرەكەسى مەن ۇلتتىق ۆاليۋتا كۇنى قارساڭىندا وبلىس ورتالىعىندا وتكەن سالتاناتتى جيىندا وبلىس اكىمىنىڭ ءبىرىنشى ورىنباسارى قانات ەسبولاتوۆ سالا قىزمەتكەرلەرىن قۇتتىقتاپ, مەملەكەتتىك ناگرادالار مەن العىسحاتتاردى تابىستادى.
ءوزىنىڭ قۇتتىقتاۋ سوزىندە قانات بولات ۇلى: – قارجى سالاسى قىزمەتكەرلەرىنىڭ ەڭبەگى مەن كاسىبيلىگىنىڭ ارقاسىندا وبلىس ەكونوميكاسى تۇراقتى ءوسىپ كەلەدى. سوڭعى جىلدارى رەسپۋبليكاداعى پوزيتسيامىزدى نىعايتىپ, العا قاراي قارقىندى ىلگەرىلەپ كەلەمىز, – دەپ ءوڭىردىڭ دامۋىنا قارجى سالاسىنىڭ قوسىپ وتىرعان ۇلەسىن ەرەكشە ايقىنداپ كورسەتتى.
سونىمەن قاتار, وبلىس اكىمىنىڭ ءبىرىنشى ورىنباسارى ءوز سوزىندە بيىل ءتول تەڭگەمىزدىڭ اينالىمعا ەنگىزىلگەنىنە وتىز ەكى جىل تولعانىن دا اتاپ ءوتتى.
- ۇلتتىق ۆاليۋتا – ەكونوميكالىق ەگەمەندىكتىڭ نىشانى, ال قارجىگەرلەر – كۇن سايىن بيۋدجەت ۇدەرىستەرىنىڭ اشىقتىعى مەن تيىمدىلىگىن قامتاماسىز ەتىپ وتىرعان ماماندار, - دەگەن قانات بولات ۇلىنىڭ سوزىنە ناقتى كورسەتكىشتەر دالەل: سوڭعى ەكى جىلدا سالىق تۇسىمدەرى ارتتى, ال جالپى وڭىرلىك ءونىم 4,3 ترلن تەڭگەدەن 6 ترلن تەڭگەگە دەيىن ءوستى. بۇل ناتيجەلەر سالا ماماندارىنىڭ جۇيەلى جۇمىسىنىڭ ايقىن كورىنىسى.
رەسمي بولىمنەن كەيىن ماراپاتتاۋ ءراسىمى وتكىزىلدى. «قارجى سالاسىنىڭ ۇزدىك قىزمەتكەرى» توسبەلگىسى بيبىگۇل ۋزاقوۆا مەن ەرلان شاتانوۆقا تابىستالدى.
قر قارجى مينيسترلىگىنىڭ العىس حاتتارىن التى قىزمەتكەر يەلەندى. جىل قورىتىندىسى بويىنشا جوعارى ناتيجەلەر كورسەتكەن تاعى وسىنشا قىزمەتكەرگە وبلىس اكىمىنىڭ قۇرمەت گراموتالارى تاپسىرىلدى.
- بۇل سالادا مەن جيىرما بەس جىلدان استام ۋاقىت ەڭبەك ەتىپ كەلەمىن. قارجىگەردىڭ جۇمىسى ءاردايىم كوزگە كورىنە بەرمەيدى, بىراق ول وتە ماڭىزدى, تىلداعى جاۋىنگەردىڭ جۇمىسى دەر ەدىم – ءاربىر كورسەتكىش ءدال ءارى تەكسەرىلگەن بولۋى كەرەك. بارلىق ارىپتەستەرىمدى مەرەكەلەرىمەن قۇتتىقتايمىن, مەملەكەتىمىزدىڭ يگىلىگى ءۇشىن ارى قاراي دا تۇراقتى ءارى جەمىستى جۇمىس اتقارۋلارىنا تىلەكتەسپىن, – دەدى شارا سوڭىندا قۇتتىقتاۋ لەبىزىن بىلدىرگەن «قارجى سالاسىنىڭ ۇزدىك قىزمەتكەرى» توسبەلگىسىنىڭ يەگەرى, وبلىستىق قارجى باسقارماسىنىڭ باسشىسى بيبىگۇل ۋزاقوۆا.
الماتى وبلىسى.
