مەملەكەت باسشىسى قوناقجايلىعى ءۇشىن پرەزيدەنت شاۆكات ميرزيوەۆكە ريزاشىلىعىن ءبىلدىرىپ, ساپارىنىڭ باستى ماقساتى – قوس حالىقتىڭ دوستىعىن نىعايتىپ, تاتۋ كورشىلىك بايلانىستارىن كۇشەيتۋ, سونداي-اق ءتۇرلى سالاداعى ءوزارا ءتيىمدى ىقپالداستىقتى دامىتۋ ەكەنىنە نازار اۋداردى.
– قۇرمەتتى شاۆكات ميرومونوۆيچ, ءوزىڭىزدىڭ قاجىرلى ەڭبەگىڭىزدىڭ ارقاسىندا ەلىڭىزدە كوپتەگەن وڭ وزگەرىس بولىپ جاتىر. حالىقتىڭ ءال-اۋقاتىن جاقسارتۋدى كوزدەيتىن ماڭىزدى باستامالار قولعا الىندى. وزبەكستان – ءبىز ءۇشىن تۋىستاس, اعايىن ەل, تاتۋ كورشى ءارى سەنىمدى سەرىكتەس. قوس ەل اراسىنداعى دوستىقتىڭ تامىرى تەرەڭ, حالىقتارىمىزدىڭ رۋحاني قۇندىلىقتارى ورتاق دەۋگە بولادى. قازاق-وزبەك قارىم-قاتىناسى ستراتەگيالىق سەرىكتەستىك جانە وداقتاستىق رۋحىندا قارقىندى دامىپ كەلە جاتىر, – دەدى مەملەكەت باسشىسى.
قاسىم-جومارت توقاەۆ حالىقارالىق احۋال اۋمالى-توكپەلى كەزەڭدە سان قىرلى ىقپالداستىقتىڭ دامۋ قارقىنىن ارتتىرۋ قاجەت ەكەنىن اتاپ ءوتتى.
مەملەكەت باسشىسى وزبەكستان پرەزيدەنتىمەن كەلىسسوز بارىسىندا ساياسي جانە ەكونوميكالىق بايلانىستاردى جانداندىرا تۇسەتىن جاڭا باعىتتار ايقىندالعانىن جەتكىزدى.
– ءوزارا ىنتىماقتاستىق الەۋەتىن تولىق پايدالانۋدى قۇپتايمىز. سوندىقتان وسى باعىتتا تاباندى ەڭبەك ەتۋگە دايىن ەكەنىمىزدى ايتتىق. ەڭ اۋەلى, ساۋدا-ەكونوميكا سالاسىنا ەرەكشە ءمان بەرۋ كەرەك. ساۋدا-ساتتىقتى دامىتۋ ءۇشىن ءوسىمنىڭ تىڭ مۇمكىندىكتەرىن ىزدەۋ, تاۋارلار نومەنكلاتۋراسىن كەڭەيتۋ جانە شيكىزاتتىق ەمەس ەكسپورتتى ىنتالاندىرۋ شارالارىن قابىلداۋ قاجەت. وسى ورايدا ءوزارا تاۋار اينالىمىن ارتتىرۋ باعدارلاماسىن ساپالى جۇزەگە اسىرۋ ماڭىزدى. بۇگىن قۇرىلاتىن ءوڭىر باسشىلارى كەڭەسىن, سونداي-اق ىسكەرلىك كەڭەس پەن «UzKazTrade» بىرلەسكەن ساۋدا كومپانياسى سەكىلدى باسقا دا ەكىجاقتى مەحانيزمدەردىڭ جۇمىسىنان ناقتى ناتيجە كۇتەمىز, – دەدى قازاقستان پرەزيدەنتى.
مەملەكەت باسشىسىنىڭ ايتۋىنشا, اۋىل شارۋاشىلىعى سالاسىنداعى ىنتىماقتاستىقتىڭ الەۋەتى زور.
قاسىم-جومارت توقاەۆ قاراپايىم ساۋدادان گورى ەت, بيداي, مايلى داقىلداردى وڭدەۋدىڭ تولىق وندىرىستىك تىزبەسىن قالىپتاستىرۋدى, مال شارۋاشىلىعى مەن ورگانيكالىق ەگىن شارۋاشىلىعىن بىرگە دامىتۋدى ۇسىندى.
بۇعان قوسا پرەزيدەنت ونەركاسىپ كووپەراتسياسىنا ۇلكەن ءۇمىت ارتادى.
– قازىرگى كەزدە جالپى سوماسى ءبىر جارىم ميلليارد دوللاردان (1,7 ملرد دوللار) اساتىن 78 بىرلەسكەن جوبامىز بار. ونىڭ اياسىندا 15 مىڭنان استام جۇمىس ورنىن اشۋ كوزدەلگەن. اتالعان جوبالار تولىق ىسكە اسسا, ەكونوميكالىق جانە ينۆەستيتسيالىق ىقپالداستىعىمىز ايتارلىقتاي كۇشەيەدى. بۇگىن ءبىز ولاردىڭ ءبىر پاراسىن ىسكە قوسامىز. قازاقستاننىڭ وزبەكستانعا سالاتىن ينۆەستيتسياسىن ودان ءارى ىنتالاندىرۋعا نيەتتىمىز. بۇل رەتتە وزبەك دوستارىمىزدان ادەتتەگىدەي قولداۋ كۇتەمىز. قۇرىلىسى ءجۇرىپ جاتقان «ورتالىق ازيا» حالىقارالىق ونەركاسىپ كووپەراتسياسى ورتالىعى يندۋستريالدىق قۋاتىمىزدى ودان ءارى ارتتىرۋدا ماڭىزدى ءرول اتقارادى, – دەدى قاسىم-جومارت توقاەۆ.
پرەزيدەنتتىڭ پىكىرىنشە, سيرەك كەزدەسەتىن مەتالداردى ءوندىرۋ جانە وڭدەۋ سالاسىنداعى سەرىكتەستىك پەرسپەكتيۆتى باعىتتىڭ ءبىرى سانالادى.
قاسىم-جومارت توقاەۆ جاڭادان قۇرىلاتىن جۇمىس توبىنان بارلىق اسپەكتىنى مۇقيات زەردەلەپ, ءوزارا ءتيىمدى ىنتىماقتاستىقتى جولعا قويۋعا قاتىستى ۇسىنىس بەرۋدى سۇرادى.
سونىمەن قاتار مەملەكەت باسشىسى كولىك-ترانزيت سالاسىنداعى ىقپالداستىقتى كەڭەيتۋدىڭ ستراتەگيالىق سيپاتىنا توقتالدى. اتاپ ايتقاندا, تاريفتەردى وڭتايلاندىرۋ, اكىمشىلىك كەدەرگىلەردى ازايتۋ شارالارى قابىلدانىپ, شەكارا ماڭى ينفراقۇرىلىمىن دامىتۋ جانە وتكىزۋ بەكەتتەرىن جاڭعىرتۋ جۇمىستارى قولعا الىندى.
قاسىم-جومارت توقاەۆ ەكى ەل ۇكىمەتتەرى لوگيستيكالىق تىزبەكتىڭ بارلىق قاتىسۋشىسىنا وڭتايلى جاعداي تۋعىزىپ, ينفراقۇرىلىمدىق, نورماتيۆتىك جانە ينستيتۋتسيونالدىق مىندەتتەردى شەشۋى قاجەت دەپ سانايدى.
بۇدان بولەك, مەملەكەت باسشىسى ترانسكاسپي حالىقارالىق كولىك باعدارىن, سولتۇستىك – وڭتۇستىك ءدالىزىن, سونداي-اق اۋعانستان ارقىلى تەمىرجول باعىتىن دامىتۋ اياسىنداعى ءتيىمدى ىقپالداستىقتى جالعاستىرۋ وزەكتى ەكەنىن ايتتى.
قاسىم-جومارت توقاەۆ وزبەك تاراپىن ترانسكاسپي حالىقارالىق كولىك باعىتىن بىرگە وركەندەتۋ ءۇشىن اقتاۋ جانە قۇرىق پورتتارى بويىنشا سەرىكتەستىك قۇرىپ, لوگيستيكالىق جوبالاردى جۇزەگە اسىرۋعا شاقىردى.
قازاقستان پرەزيدەنتى سۋ-ەنەرگەتيكا سالاسىنداعى كونسترۋكتيۆتى ىنتىماقتاستىق اسا ماڭىزدى ەكەنىن جەتكىزدى. ويتكەنى ترانسشەكارالىق وزەندەردىڭ سۋ رەسۋرسىن راتسيونالدى پايدالانۋ – ەكى ەلدىڭ تۇراقتى پروگرەسىنە ىقپال ەتەتىن باستى فاكتورلاردىڭ ءبىرى.
بۇل ورايدا قاسىم-جومارت توقاەۆ قازاقستان مەن وزبەكستان ۇكىمەتتەرىنە سۋ شارۋاشىلىعى ساياساتىنداعى تاسىلدەردى ۇيلەستىرۋ ءۇشىن جۇيەلى شارالار ازىرلەۋدى ۇسىندى.
مەملەكەت باسشىسى جاساندى ينتەللەكتىنى دامىتۋ ماسەلەسىنە ايرىقشا نازار اۋداردى.
– قازاقستاندا مەملەكەتتىك باسقارۋدىڭ تيىمدىلىگىن جانە ازاماتتاردىڭ تۇرمىس ساپاسىن جاقسارتۋ ماقساتىندا مەملەكەتتىك قىزمەتتەردى تسيفرلاندىرۋعا جانە IT تەحنولوگيالاردى دامىتۋعا باسا ءمان بەرىلەدى. Alem.ai حالىقارالىق جاساندى ينتەللەكت ورتالىعى اشىلدى, وسى سالاداعى زەرتتەۋ ۋنيۆەرسيتەتىنىڭ نەگىزى قالانۋدا, ۇلتتىق سۋپەركومپيۋتەر ىسكە قوسىلدى. جالپى, قازاقستاندى تسيفرلىق ەلگە اينالدىرۋ مىندەتى قويىلدى. وزبەكستان دا تسيفرلاندىرۋعا جانە جاساندى ينتەللەكت تەحنولوگياسىن دامىتۋعا باعىت العانىن بىلەمىز. اتالعان سالادا بىرقاتار جەتىستىككە قول جەتكىزدى. وزبەك كومپانيالارىن تىعىز ىنتىماقتاستىق ورناتىپ, وسىناۋ كەلەشەگى زور سالادا بىرلەسكەن جوبالاردى جۇزەگە اسىرۋعا شاقىرامىز. Astana Hub پەن IT Park Uzbekistan اراسىنداعى ىنتىماقتاستىق وسىنداي تابىستى سينەرگياعا مىسال بولا الادى, – دەدى پرەزيدەنت.
مەملەكەت باسشىسىنىڭ ايتۋىنشا, مادەني-گۋمانيتارلىق بايلانىستاردىڭ ءورىسى كەڭەيە باستادى. بۇل رەتتە پرەزيدەنت مادەنيەت كۇندەرىن وتكىزۋ, شىعارماشىلىق ينتەلليگەنتسيا, جاستار اراسىندا بەلسەندى ديالوگ قالىپتاستىرۋ, كورنەكتى تۇلعالارعا ەسكەرتكىش ورناتۋ, سونداي-اق وزبەكستان مەن قازاقستان جوعارى وقۋ ورىندارىنىڭ فيليالدارىن اشۋ ماسەلەلەرىن قوزعادى.
قاسىم-جومارت توقاەۆ قول جەتكىزىلگەن ۋاعدالاستىقتار قوس حالىقتىڭ يگىلىگى جولىندا سان قىرلى بايلانىستاردى ودان ءارى تەرەڭدەتۋگە سەپتىگىن تيگىزەتىنىنە سەنىم ءبىلدىردى.
وزبەكستان پرەزيدەنتى ەكىجاقتى ىنتىماقتاستىقتى كەڭەيتۋدە جوعارى مەملەكەتارالىق كەڭەس ماڭىزدى ءرول اتقاراتىنىن جەتكىزدى
– ءبىزدىڭ قارىم-قاتىناستارىمىز ستراتەگيالىق سەرىكتەستىك پەن وداقتاستىقتىڭ جوعارى دەڭگەيىنە كوتەرىلدى. ونىڭ نەگىزىندە بەرىك سەنىم, باۋىرلاس حالىقتارىمىزدىڭ اراسىنداعى تاتۋ كورشىلىك جانە شىنايى دوستىق جاتىر. بىلتىر قۇرىلعان جوعارى مەملەكەتارالىق كەڭەس وزەكتىلىگى مەن تيىمدىلىگىن كورسەتتى. بۇگىن ەكىنشى وتىرىستا ءبىز ءوزارا ىقپالداستىقتىڭ جاڭا باعىتتارىن جانە زور الەۋەتىمىزدىڭ تىڭ مۇمكىندەرىن تانىتۋدىڭ جولدارىن جان-جاقتى تالقىلايمىز. سان قىرلى سەرىكتەستىگىمىزدى كەڭەيتۋگە ايتارلىقتاي سەرپىن بەرەتىن شەشىمدەر قابىلدايمىز. قازىرگى الماعايىپ كەزەڭدە ەلدەرىمىزدىڭ جانە تۇتاس ايماقتىڭ ەكونوميكالىق كونيۋنكتۋراسىنا وڭ اسەر ەتەتىن تىعىز جانە پرواكتيۆتى ىقپالداستىق ەرەكشە مانگە يە, – دەدى شاۆكات ميرزيوەۆ.
