سۋرەت: ernur.kz
جۇزدەسۋدە ەلىمىزدە مەملەكەتتىك باسقارۋدىڭ تيىمدىلىگى مەن ەسەپتىلىگىن نىعايتۋ, پاراسات مادەنيەتىن دامىتۋ جانە مەملەكەتتىك قىزمەتتىڭ كاسىبيلىگىن ارتتىرۋ باعىتىندا كەشەندى شارالار جۇزەگە اسىرىلىپ جاتقانى ايتىلدى. اگەنتتىك توراعاسى مەملەكەتتىك باسقارۋ رەفورمالارى پرەزيدەنت قاسىم-جومارت توقاەۆ ايقىنداعان «زاڭ مەن ءتارتىپ» جانە «ادال ازامات» قاعيداتتارىنا سۇيەنەتىنىن اتاپ ءوتتى.
تاراپتار سەرىكتەستىكتىڭ الداعى جوسپارلارىن, اتاپ ايتقاندا, ەلىمىزدىڭ ەىدۇ كەڭەسىنىڭ قوعامدىق پاراساتتىلىق جانە تاجىريبە الماسۋدى كەڭەيتۋ جونىندەگى ۇسىنىمى اينالاسىندا بىرقاتار ماسەلە تالقىلادى.
سونىمەن قاتار دارحان جازىقباي مەن فرانتسۋز ۇلتتىق مەملەكەتتىك قىزمەت ينستيتۋتى (INSP) ديرەكتورى ماريۆون لە برينونەن مەملەكەتتىك قىزمەت, باسقارۋشىلىق كادرلاردى دايارلاۋ جانە عىلىمي زەرتتەۋ قىزمەتى سالاسىنداعى ىنتىماقتاستىقتى دامىتۋعا باعىتتالعان نيەت دەكلاراتسياسىنا قول قويدى.
دەكلاراتسيا مەملەكەتتىك قىزمەت ىستەرى اگەنتتىگى مەن فرانتسۋز ۇلتتىق مەملەكەتتىك قىزمەت ينستيتۋتىنىڭ مەملەكەتتىك قىزمەت جۇيەسىن جەتىلدىرۋ, مەملەكەتتىك قىزمەتشىلەردىڭ قۇزىرەتىن ارتتىرۋ جانە مەملەكەتتىك ساياسات سالاسىندا زاماناۋي تاسىلدەردى ەنگىزۋدى, ارىپتەستىك پەن تاجىريبە الماسۋدى كوزدەيدى.
ىنتىماقتاستىقتىڭ نەگىزگى باعىتتارىندا مەملەكەتتىك قىزمەتشىلەر مەن مامانداردىڭ وقۋ باعدارلامالارى جانە قۇزىرەتتەرىن دامىتۋ, بىرلەسكەن زەرتتەۋ جوبالارى, سونداي-اق فورۋمدار, سيمپوزيۋمدار, كونفەرەنتسيالار, ساراپتامالىق كەزدەسۋلەر سياقتى عىلىمي جانە ساراپتامالىق ءىس-شارالاردى وتكىزۋ قاراستىرىلعان. وعان قوسا وزىق تاجىريبە مەن بىلىكتىلىكتى ارتتىرۋ باعدارلامالارىمەن الماسۋ, ونىڭ ىشىندە مەملەكەتتىك قىزمەتشىلەرگە ارنالعان تاعىلىمدامالار كىرەدى.
– قازاقستان پرەزيدەنتىنىڭ ۇستانىمى – ادامعا باعدارلانعان جانە سەرۆيستىك مەملەكەتتىك قىزمەتتى قالىپتاستىرۋ. وسى باعىتتا ءبىز حالىقارالىق ىنتىماقتاستىقتى, ونىڭ ىشىندە فرانتسۋز ارىپتەستەرىمىزبەن دە ديالوگتى كەڭەيتىپ كەلەمىز. ءبىزدىڭ ماقساتىمىز – ناقتى ناتيجەسىن بەرەتىن ءارى مەملەكەتتىك اپپاراتتىڭ تيىمدىلىگىن ارتتىرۋعا كومەكتەسەتىن شەشىمدەر ەنگىزۋ, – دەدى مەملەكەتتىك قىزمەت ىستەرى اگەنتتىگىنىڭ توراعاسى.
قول قويىلعان قۇجات مەملەكەتتىك قىزمەت سالاسىنداعى كاسىبي ىنتىماقتاستىقتى نىعايتا وتىرىپ, ءبىلىم, ءادىسناما جانە ۇزدىك تاجىريبە الماسۋدىڭ جاڭا مۇمكىندىكتەرىن اشادى دەپ كۇتىلەدى.
