قازالى اۋدانىنا جاڭا اكىم تاعايىندالدى

استانا. 24 ماۋسىم. قىزىلوردا وبلىسىنىڭ اكىمى قىرىمبەك كوشەرباەۆتىڭ وكىمىمەن قارماقشى اۋدانىنىڭ اكىمى ءناجمادين شامۇراتوۆ قىزمەتىنەن بوساتىلىپ, قازالى اۋدانىنىڭ اكىمى لاۋازىمىنا تاعايىندالدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى. قازالى اۋدانىنىڭ تىزگىنىن ۇستاعان جاڭا اكىم بۇعان دەيىن قارماقشى اۋدانىنىڭ باسشىلىق قىزمەتىن اتقارعان. شامۇراتوۆ ءناجمادين شاكيزادا ۇلى 1963 جىلى وڭتۇستىك قازاقستان وبلىسى شىمكەنت قالاسىندا دۇنيەگە كەلگەن. 1986 جىلى جامبىل گيدرومەليوراتيۆتىك-قۇرىلىس ينستيتۋتىن - ينجەنەر-گيدروتەحنيك, ءال-فارابي اتىنداعى قازاق ۇلتتىق ۋنيۆەرسيتەتىن - زاڭگەر, الماتى قالاسىنداعى «قاينار» ۋنيۆەرسيتەتىن - ەكونوميست ماماندىعى بويىنشا بىتىرگەن. ەڭبەك جولىن 1980 جىلى قازالى اۋدانىنداعى № 64 جىلجىمالى مەحانيكالاندىرىلعان كولوننادا جۇمىسشى رەتىندە باستاعان. 2002-2005 جىلدارى قازالى اۋدانى اكىمىنىڭ ورىنباسارى, قازالى اۋدانىنىڭ اكىمى, 2005-2011 جىلدارى وبلىستىق مەملەكەتتىك ساۋلەت-قۇرىلىس باقىلاۋى باسقارماسىن, وبلىستىق قۇرىلىس باسقارماسىن جانە وبلىستىق ساۋلەت جانە قالا قۇرىلىسى باسقارماسىن باسقارعان. 2011-2013 جىلدارى قىزىلوردا وبلىسى بويىنشا مەملەكەتتىك ساۋلەت-قۇرىلىس باقىلاۋ جانە ليتسەنزيالاۋ دەپارتامەنتىنىڭ ديرەكتورى, وبلىستىق قۇرىلىس باسقارماسىنىڭ باسشىسى لاۋازىمدارىندا قىزمەت اتقارعان. 2013 جىلدان وسى كەزگە دەيىن قارماقشى اۋدانىنىڭ اكىمى قىزمەتىن ابرويلى اتقارىپ كەلدى. تالعات رايىمبەك. دەرەك, سۋرەت: وبلىس اكىمدىگىنىڭ ءباسپاسوز قىزمەتى.