ستاتيستيكالىق دەرەككە سۇيەنسەك, ەلىمىزدە مۇگەدەكتىگى بار 743,9 مىڭ ادام تۇرادى, ياعني حالىقتىڭ 3,7%-ى. ولاردىڭ ىشىندە 375,2 مىڭ ازامات ەڭبەككە قابىلەتتى جاستا. الەۋمەتتىك كودەكسكە سايكەس جەرگىلىكتى اتقارۋشى ورگاندار مۇگەدەكتىگى بار ادامداردى اۋىر جۇمىستارعا, ەڭبەك جاعدايلارى زياندى, قاۋىپتى جۇمىستارداعى جۇمىس ورىندارىنا جىبەرمەيدى. كەرىسىنشە, جۇمىسشىلاردىڭ جالپى سانىنىڭ (جالدامالى جۇمىسكەرلەردىڭ جالپى سانى كەمىندە 50 ادام بولعان كەزدە) 2-4%-ىنا دەيىنگى كولەمدە جۇمىس ورىندارىنا كۆوتا بەلگىلەيدى. بيىلعى ءۇشىنشى توقساندا كۆوتا ءبولۋ ارقىلى مۇگەدەكتىگى بار 7,1 مىڭ ادام جۇمىسقا ورنالاستىرىلدى.
ەرەكشە قاجەتتىلىكتەرى بار ادامدار جۇمىسپەن قامتۋعا جاردەمدەسۋدىڭ بەلسەندى شارالارىنا دا قاتىسادى. بيىلعى 1 قاراشاعا دەيىن تۇراقتى جۇمىسقا – 4,8 مىڭ, جاستار پراكتيكاسىنا – 538, الەۋمەتتىك جۇمىس ورىندارىنا – 538, قوعامدىق جۇمىستارعا – 5,7 مىڭ, «كۇمىس جاس» جوباسىمەن – 758, «العاشقى جۇمىس ورنىنا» – 120, «ۇرپاقتار كەلىسىمشارتى» اياسىندا 9 ادام جۇمىسقا ورنالاستىرىلدى.
قىسقا مەرزىمدى كاسىپتىك وقىتۋمەن 277 ادام ءبىلىمىن شىڭداسا, «باستاۋ بيزنەس» جوباسى اياسىندا كاسىپكەرلىك نەگىزدەرىن 4,5 مىڭ مۇگەدەكتىگى بار ازامات مەڭگەرگەن. حالىقتىڭ الەۋمەتتىك وسال توپتارىنا جاتاتىن ازاماتتارعا ءوز بيزنەسىن اشۋعا 400 اەك-كە دەيىنگى (1,6 ملن تەڭگە) مولشەرىندە مەملەكەتتىك گرانتتار بەرىلەدى. جەكە كاسىبىن اشامىن دەگەن 1,4 مىڭ مۇگەدەكتىگى بار ادام وسىنداي قولداۋعا يە بولدى.
2018 جىلدان باستاپ حالىقارالىق تاجىريبە نەگىزىندە مۇگەدەكتىگى بار ادامداردى جۇمىسقا ورنالاستىرۋ ماقساتىندا ارنايى جۇمىس ورنىن اشۋدىڭ شىعىندارىن سۋبسيديالاۋ ءتارتىبى ەنگىزىلدى. بيىل وسىنداي 87 ارنايى جۇمىس ورنى قۇرىلدى.
