2025 جىلى ىسكە قوسىلعان «اقتوبە» ارنايى ەكونوميكالىق ايماعى - ءوڭىردىڭ جاڭا يندۋستريالىق درايۆەرى, سىرتقى جانە ىشكى ينۆەستورلاردىڭ نازارىن اۋدارۋدا. اۋماعى 570 گەكتاردى قامتيتىن اەا حالىقارالىق اۋەجايدىڭ اۋماعىندا ورنالاسقان, بۇل وندىرىستىك جانە لوگيستيكالىق جوبالاردى ورنالاستىرۋعا ايتارلىقتاي مۇمكىندىك بەرەدى. ايماق قاتىسۋشىلارىنا سالىقتىق جانە كەدەندىك جەڭىلدىكتەر پاكەتى ۇسىنىلادى, سونداي-اق قاجەتتى ينفراقۇرىلىم كەزەڭ-كەزەڭىمەن جەتكىزىلىپ جاتىر.
سونىمەن قاتار وڭىردەگى «حرومتاۋ» يندۋستريالدىق ايماعىندا دا جاڭا جوبالارعا ارنالعان دايىن الاڭدار قۇرىلۋدا. 150 گەكتار اۋماقتا جول, ەلەكتر, سۋ جانە گاز جەلىلەرى تولىق قامتاماسىز ەتىلىپ, ينۆەستورلاردىڭ ءوندىرىستى قىسقا مەرزىمدە ىسكە قوسىلۋىنا مۇمكىندىك بار.
اقتوبەنىڭ گەوگرافيالىق ورنالاسۋى دا ءوڭىردىڭ تارتىمدىلىعىن كۇشەيتەدى. باتىس ەۋروپا – باتىس قىتاي كولىك ءدالىزى, رەسەي جانە ورتالىق ازيا باعىتتارىنا شىعاتىن تەمىرجول تورابى, سونداي-اق حالىقارالىق اۋەجاي لوگيستيكانىڭ دامۋىنا سەرپىن بەرەدى.
مامانداردىڭ ايتۋىنشا, بۇگىندە ينۆەستورلار تەك ينفراقۇرىلىمعا عانا ەمەس, ءوڭىردىڭ سالالىق احۋالى تۋرالى كاسىبي, دالەلدى جانە جۇيەلى اقپاراتقا مۇقتاج. وسىعان بايلانىستى وڭىرلەرگە ءار توقسان سايىن تالدامالىق شولۋلار مەن ينۆەستيتسيالىق ماتەريالدار دايىنداۋ مىندەتى قويىلعان. بۇل باعىتتا جەتەكشى كونسالتينگتىك كومپانيالار تارتىلادى.
ءوڭىردىڭ كادرلىق الەۋەتى دە ماڭىزدى فاكتورلاردىڭ ءبىرى. اقتوبەدەگى جوعارى وقۋ ورىندارى مەن كوللەدجدەر ينجەنەرلىك جانە تەحنيكالىق ماماندىقتار بويىنشا ماماندار دايارلاپ, وڭدەۋ سالاسىنىڭ كادر تاپشىلىعىن وتەۋگە ۇلەس قوسىپ كەلەدى.
ينۆەستورلار ءۇشىن مەملەكەتتىك قولداۋدىڭ دا كەڭ سپەكترى ۇسىنىلادى: ينۆەستيتسيالىق كەلىسىمشارتتار, سۋبسيديالار, ينفراقۇرىلىم جەتكىزۋ, سالىقتىق جەڭىلدىكتەر, سونداي-اق «Kazakh Invest» پەن وڭىرلىك ينستيتۋتتاردىڭ تولىق سۇيەمەلدەۋى قاراستىرىلعان.
ساراپشىلاردىڭ پىكىرىنشە, ءوڭىردىڭ ستراتەگيالىق جوسپارىندا ەكسپورتتىق الەۋەتتى ارتتىرۋ, جاڭا وندىرىستەردى ىسكە قوسۋ جانە ەكونوميكانى تەرەڭ ءارتاراپتاندىرۋ ماقساتى تۇر.
وسىلايشا اقتوبە وبلىسى – وڭدەۋشى ونەركاسىپ جوبالارىن جۇزەگە اسىرۋ ءۇشىن ينفراقۇرىلىمدىق, ينستيتۋتسيونالدىق جانە ەكونوميكالىق تۇرعىدا قولايلى جاعداي جاساي العان ءوڭىر رەتىندە ەرەكشەلەنىپ وتىر.
