كوللاجدى جاساعان امانگەلدى قياس, «EQ»
«اگروونەركاسىپ كەشەنىن تسيفرلاندىرۋمەن ناقتى اينالىسقان ءجون. وزدەرىڭىزگە ءمالىم, جاپپاي تسيفرلاندىرۋ جانە بارلىق سالاعا جاساندى ينتەللەكت تەحنولوگياسىن ەنگىزۋ جولداۋىمدا باستى مىندەت رەتىندە اتالدى. اۋىل شارۋاشىلىعى ءۇشىن مۇنىڭ ءمانى وتە زور. سەبەبى جاڭا تەحنولوگيالار شىعىندى ايتارلىقتاي ازايتىپ, ونىمدىلىكتى ۇلعايتۋعا مۇمكىندىك بەرەدى», دەدى قاسىم-جومارت توقاەۆ.
پرەزيدەنت اقمولا وبلىسىندا وتكەن كەڭەستە جينالعان ءونىمدى تيىسىنشە ساقتاۋ جانە شىعىندى مەيلىنشە ازايتۋ شارالارىن قامتاماسىز ەتۋدى تاپسىرعان ەدى. ەلىمىزدەگى كوپتەگەن شارۋا قوجالىعىنىڭ قارجىلىق تۇراقتىلىعى وسىعان بايلانىستى.
«الدىمىزدا تسيفرلىق تەحنولوگيالار جانە جاساندى ينتەللەكت ەلەمەنتتەرىنىڭ كومەگىمەن مەملەكەتتىڭ بيداي قورىن ەسەپكە الاتىن جانە باقىلايتىن ءتيىمدى جۇيە قۇرۋ مىندەتى تۇر. ول ءۇشىن قولدانىستاعى استىق قامبالارىن جاڭعىرتىپ, زاماناۋي ەلەۆاتورلار سالۋ قاجەت. بيدايدى قابىلداۋدى جانە جونەلتۋدى ەسەپكە الاتىن ەلەكتروندىق جۇيەنىڭ بولۋى جەكە ەلەۆاتورلار قۇرىلىسىن قارجىلاندىرۋ باعدارلاماسىنىڭ مىندەتتى ءبىر شارتى بولۋعا ءتيىس. بۇگىندە كوپتەگەن شارۋالار تەحنولوگيالىق جاڭاشىلدىقتى (سمارت-فەرما, اگرودرون, جەر سەرىگى تەحنولوگياسى جانە جي) بەلسەندى قولدانا باستادى. بىراق جالپى ەل كولەمىندە قانداي دا ءبىر جۇيەلى وزگەرىستەر بولىپ جاتىر دەپ ايتۋعا ءالى ەرتە», دەدى ەل پرەزيدەنتى.
