سايىسقا 300-دەن استام بالۋان قاتىستى. العاشقى اينالىمنان-اق قارسىلاستارىن ايقىن جەڭگەن نۇرجان فينالعا ەركىن جەتتى. التىن مەدال ءۇشىن تارتىستا امەريكالىق بالۋانعا ۇپاي ايىرماسىمەن ەسە جىبەردى. بالۋان بىلتىر دا وسى ءباسى جوعارى تۋرنيردەن جۇلدەلى ورالعان ەدى.
– بۇل كۇمىس مەدال ۇزاق جىلعى توككەن تەرىمىزدىڭ وتەۋى. بىزگە ءاربىر مەدالدىڭ باعاسى قۇندى. نۇرجان وتە ەڭبەكقور, تالاپشىل, بالۋان. بۇل جولى دا رۋحىنىڭ قايسارلىعىن كورسەتتى, – دەيدى جەكە باپكەرى رينات يسمايلوۆ.
نۇرجان گرەك-ريم كۇرەسىمەن 12 جىلدان بەرى تۇراقتى شۇعىلدانادى. 2022 جىلى برازيليادا وتكەن XXIV جازعى سۋردليمپيادا سايىسىندا 77 كگ سالماقتا قولا مەدال ەنشىلەدى. سول جىلى الەم چەمپيونى اتاندى. 2023 جىلى ازيا ويىندارىندا جەڭىسكە جەتتى. بىلتىر ەڭبەك سىڭىرگەن سپورت شەبەرى اتاعىن الدى. بالۋان بۇگىندە اقش ەلىندە شەبەرلىك ساباقتارىن وتكىزىپ, جاس بالۋانداردى كۇرەسكە باۋلىپ ءجۇر.
– قاي قيىردا جۇرسەك تە قازاقتىڭ رۋحى جوعارى ەكەنىن ايگىلەۋگە كۇش سالامىز. ەلىمنىڭ كوك تۋىن جەلبىرەتىپ, ءانۇرانىمىزدى شىرقاتۋ – باستى ماقساتىم. ءتورت جىل بۇرىن سۋردليمپيادا ويىندارىندا قولا مەدال بۇيىردى. اركىمنىڭ دە ارمانى – التىن مەدال. سوعان جەتۋ جولىندا تىنىمسىز تەر توگىپ, تىڭعىلىقتى ازىرلىك جۇرگىزەمىن, – دەيدى تالانتتى سپورتشى.
بالۋان الداعى ۋاقىتتا دا شەبەرلىگىن شىڭداپ, سايىستارعا قاتىسۋعا بەل بۋىپ وتىر.
