سۋرەت: damu.kz
«Ala Sintez» باس ديرەكتورى يۋري ءديۋپيننىڭ ايتۋىنشا, ءونىمنىڭ مۇنداي ءتۇرىن قولدانبايتىن كاسىپورىن كەمدە-كەم. ولار ءبىرىنشى كەزەكتە بيزنەس تاريحىنا باسىمدىق بەرەدى.
– بۇل رەتتە, ءبىزدىڭ ىشكى نارىقتان دا, سىرتقى نارىقتان دا جاسىرىپ قالاتىن قۇپيامىز جوق. قارجى اينالىمى تۇگەل اشىق, جاريا تۇردە جۇرەدى. ءبىز سەرىكتەستەرمەن بايلانىسقا شىققانعا دەيىن بيزنەس-ترەنينگتەرىنە قاتىستىق, جۇمىسشىلارىمىزدى تاجىريبە الماسۋعا جىبەردىك. قىسقاسى, ءوزىمىزدى بارلىق جاعىنان بيزنەس-سەرىكتەس بولا الاتىنىمىزدى دالەلدەدىك. ارىپتەستىكتىڭ مۇنداي ءتۇرى ءبىزدى بيزنەس ديپلوماتى رەتىندە قالىپتاستىردى. قازىر الەمنىڭ كەز كەلگەن كومپانياسىمەن ارىپتەستىك بايلانىس ورناتۋعا دايىنبىز, دەيدى ول.
كرونەن-تىعىندى دايىنداۋ مەن توسەمدەردى قالىپتاستىرۋ سوڭعى ۇلگىدەگى يتاليالىق جابدىقتاردا جاسالادى. ساپا مەن تەحنولوگيانىڭ ساقتالۋىن باقىلاۋدى ءوز زەرتحاناسى جۇزەگە اسىرادى. زەرتحانا شيكىزاتتى كىرىس باقىلاۋىنان باستاپ دايىن ونىمگە دەيىن ءوندىرىستىڭ بارلىق كەزەڭدەرىندە تولاسسىز باقىلاۋ جۇرگىزۋگە مۇمكىندىك بەرەتىن جابدىقتارمەن قامتىلعان. قاڭىلتىردى لاكتاۋ جانە ليتوگرافيالاۋ (كرونەن-تىعىن جاسالاتىن نەگىزگى شيكىزات) وسى سالادا 50 جىلدان استام تاجىريبەسى بار, ءوز جابدىقتارىن شىعارۋ كەزىندە زاماناۋي جانە يننوۆاتسيالىق شەشىمدەردى قولداناتىن Crabtree of Gateshead Ltd اعىلشىن كومپانياسىنىڭ قازىرگى زامانعى جابدىقتارىندا جۇزەگە اسىرىلادى.
كومپانيا باسشىسىنىڭ ايتۋىنشا, الەمدىك دەڭگەيدەگى كومپانيالارمەن كەلىسىمشارت حالىقارالىق پلاتفورمالار ارقىلى جاسالادى. قازىرگىدەي ينتەگراتسيانىڭ ءوزى تسيفرلانىپ كەتكەن زاماندا مۇنىڭ تۇك تە قيىندىعى جوق. تەك قانا بيزنەس-رەپۋتاتسياڭ ءمىنسىز بولسا بولعانى. دامىعان ەلدەردە بيزنەس باسەكەلەستىك جاعدايىندا عانا داميدى. «Ala Sintez» بيزنەس ايدىنىنا جەلكەنىن جەلبىرەتكەن كەزدە ىشكى نارىقتا باسەكە از بولدى. قالتالىلار «قاقپاقتان نە پايدا» دەگەن ۇستانىمدا بولسا, قالتاسى كوتەرگەندەر الىپ-ساتۋعا دەن قويدى. ءاۋ باستا پلاستيك قاقپاقتارعا باسىمدىق بەرىلسە, كەيىن تەمىر قاقپاقتىڭ ءوزىن التىن تاجگە ۇقساتىپ شىعارۋدى ۇيعارعان. سىناق ءۇشىن العاشقى پارتياسى يرلاندياعا جونەلتىلگەن. ولار قازاق دالاسىنان جەتكەن قاقپاقتىڭ سۋسىنداعى گازدى قانشا ۋاقىتقا دەيىن ساقتاي الاتىنىن 1 جىل بويى زەرتتەپ بارىپ, كەلىسىمگە كەلدى. سودان كەيىن باسقا كومپانيالاردان دا سۇرانىس تۇسە باستاعان.
ءوندىرىستى كەڭەيتۋ ءۇشىن كومپانياعا «ۇلتتىق جوبا» باعدارلاماسى بويىنشا 893 ملن تەڭگە سۋبسيديا بەرىلگەن, ودان بولەك «وڭدەۋ جانە قىزمەت كورسەتۋ سالالارىندا جۇمىس ىستەيتىن شاعىن جانە ورتا بيزنەستى قولداۋ» باعدارلاماسى اياسىندا 349 ميلليون تەڭگە جەڭىل نەسيە الدى. ال «ورلەۋ» باعدارلاماسىمەن بەرىلگەن جەڭىل نەسيەنىڭ جالپى سوماسى – 130 ملن تەڭگە.
«2019 جىلى ءبىز العاش رەت «دامۋ ءوندىرىس» باعدارلاماسى بويىنشا مەملەكەتتىڭ قولداۋىن پايدالاندىق. «Halyk Bank»-تەن 6%-بەن 349 ملن تەڭگە نەسيە الدىق, قاراجات شيكىزات پەن جابدىق ساتىپ الۋعا باعىتتالدى. سونداي-اق «دامۋ ءوندىرىس» باعدارلاماسى بويىنشا جىلدىق مولشەرلەمەسى 6%-بەن قارىز الدىق, ال جەتىسپەيتىن كەپىل سوماسىنا «دامۋ» قورى تاراپىنان كەپىلدىك تۇرىندە 169,6 ملن تەڭگە كولەمىندە قولداۋ كورسەتىلدى», دەيدى يۋ.ديۋپين.
ساۋداعا سالعان كاپيتالدىڭ قايتارىمى كوپ كۇتتىرمەيدى. ال بيزنەسكە جانكەشتىلىك پەن ءتوزىم كەرەك. كەيىپكەرىمىزدىڭ ايتۋىنشا, وندىرىستە جۇرگەن كاسىپكەرلەردىڭ بارشاسى ءوز ەلىنىڭ ناعىز پاتريوتى.
«كەيىنگى جىلدارى شوب-ءتىڭ ءىجو-دەگى ۇلەسىندە ءوسىم بار. بۇعان مەملەكەتتىك قولداۋدىڭ ناتيجەسىندە قول جەتتى. اتالعان فاكتور ءبىزدىڭ شەتەلدەگى سەرىكتەستەرىمىز ءۇشىن دە ماڭىزدى. ولار ءبىرىنشى كەزەكتە بيزنەس پەن بيلىك اراسىنداعى ارىپتەستىكتىڭ ناتيجەسىنە نازار اۋدارادى. بۇل رەتتە بىزگە ەشكىم سىن ايتا المايدى. ءوندىرىستى العا جىلجىتۋ ءۇشىن بىزگە قولداۋ قاجەت. ازىرگە تەك 21 پايىزدىق نەسيە عانا مۇمكىن بولىپ تۇر. بۇل تاۋار وندىرۋشىلەر ءۇشىن ءتيىمسىز پايىز», دەيدى يۋ.ديۋپين.
الماتى
