اگەنتتىك توراعاسى ءوز بايانداماسىندا ەىدۇ-عا 17 جىلدىق ىنتىماقتاستىعى ءۇشىن العىسىن بىلدىرە وتىرىپ, «ەىدۇ-نىڭ قازاقستانداعى قوعامدىق ادالدىق جونىندەگى شولۋى» جاريالانۋىن وسى ىنتىماقتاستىقتىڭ ماڭىزدى ناتيجەسى دەدى. بۇل قۇجات سىبايلاس جەمقورلىققا قارسى تەتىكتەردىڭ تۇراقتىلىعىن باعالايدى جانە 2022-2026 جىلدارعا ارنالعان سىبايلاس جەمقورلىققا قارسى ساياسات تۇجىرىمداماسىن ىسكە اسىرۋداعى ماڭىزدى كەزەڭ بولىپ تابىلادى.
ء«بىز قۇندىلىقتار جۇيەسىن فورمالدى ورىنداۋشىلىقتان سانالى قىزمەت ەتۋگە كوشىرىپ جاتىرمىز», – دەدى دارحان جازىقباي.
ءوز سوزىندە اگەنتتىك توراعاسى پرەزيدەنت قاسىم-جومارت توقاەۆتىڭ مەملەكەتتىك باسقارۋ مادەنيەتىن وزگەرتۋ باعىتىنا باستاما كوتەرگەنىن اتاپ ايتتى.
بۇل جۇمىستىڭ نەگىزگى ەلەمەنتى – بارلىق دەڭگەيدە ادالدىق جۇيەسىن قالىپتاستىرۋ. مەكتەپتەردە «ادال ازامات» باعدارلاماسى ەنگىزىلۋدە, جوعارى وقۋ ورىندارىندا اكادەميالىق ادالدىق مودۋلدەرى وقىتىلۋدا, ال مەملەكەتتىك قىزمەتشىلەر ءۇشىن ادەپ جانە سىبايلاس جەمقورلىققا قارسى ءىس-قيمىل بويىنشا ۇزدىكسىز وقىتۋ مىندەتتى نەگىزدە جۇزەگە اسىرىلۋدا.
ادالدىق قاعيداتتارىن دامىتۋ مەملەكەتتىك باسقارۋدىڭ تەحنولوگيالىق جاڭعىرۋىمەن قاتار جۇرۋدە. پرەزيدەنت قاسىم-جومارت توقاەۆ قازاقستان حالقىنا جولداۋىندا تسيفرلىق پروگرەستىڭ جاڭا كەزەڭىنە كوشۋدى ايقىندادى. الداعى ءۇش جىلدا ەل ينتەللەكتۋالدىق, تەحنولوگيالىق جانە ينستيتۋتسيونالدىق تۇرعىدان بارلىق سالالاردا جاڭعىرۋدى قامتاماسىز ەتىپ, تسيفرلىق ترانسفورماتسيانىڭ جاڭا ساپالى دەڭگەيىنە شىعۋى ءتيىس. بۇل باعىت مەملەكەتتىك باسقارۋدىڭ اشىقتىعىن ارتتىرۋمەن جانە سىبايلاس جەمقورلىق تاۋەكەلدەرىن تومەندەتۋمەن تىكەلەي بايلانىستى.
تسيفرلاندىرۋ ادامي فاكتوردى بولدىرماۋعا جانە سىبايلاس جەمقورلىق تاۋەكەلدەرىن بارىنشا ازايتۋعا مۇمكىندىك بەرەتىن ماڭىزدى قۇرالعا اينالدى. بۇگىندە مەملەكەتتىك قىزمەتكە قابىلداۋ پروتسەسىندە تسيفرلىق ىرىكتەۋ جۇيەسى جۇمىس ىستەپ جاتىر, ول ۇمىتكەرلەرگە تەڭ مۇمكىندىك بەرەدى. مىڭداعان ۆەدومستۆولىق ۇيىمدار مەن ءبىلىم بەرۋ مەكەمەلەرىن قامتيتىن بىرىڭعاي كادر جۇيەسى قۇرىلىپ, اۆتوماتتاندىرىلعان. بۇل ەڭبەككە قابىلداۋ كەزىندە مۇددەلەر قاقتىعىسىن ەڭسەرۋ مەن تاۋەكەلدەردى ازايتۋدىڭ ماڭىزدى تەتىگى بولىپ تابىلادى.
سونداي-اق, ورتالىق ازيادا العاش رەت مەملەكەتتىك قىزمەتشىلەردى جاساندى ينتەللەكت داعدىلارىنا وقىتۋعا ارنالعان AI Qyzmet باعدارلاماسى ىسكە قوسىلدى.
اگەنتتىك 2025 جىلعى جەلتوقساندا پارلامەنتكە ەنگىزىلەتىن «مەملەكەتتىك قىزمەت تۋرالى» جاڭا زاڭ جوباسىن دايىندادى. زاڭدا ادامعا باعدارلانۋ جانە مەملەكەتتىك قىزمەتشىنىڭ ءمىنسىز بەدەلى قاعيداتتارى بەكىتىلەدى.
«قازاقستان سىبايلاس جەمقورلىقتىڭ سالدارىمەن كۇرەسۋدەن ونىڭ سەبەپتەرىن الدىن الۋعا باعىتتالعان جۇيەلى ترانسفورماتسيا جولىنا ءتۇستى», – دەپ اتاپ ءوتتى اگەنتتىك توراعاسى.
باياندامادا اتاپ وتىلگەندەي, قازاقستان ەىدۇ كەڭەسىنىڭ قوعامدىق ادالدىق جونىندەگى ۇسىنىمىنا قوسىلۋعا مۇددەلىلىك تانىتىپ وتىر. بۇل ءبىزدىڭ رەسپۋبليكامىزدىڭ بۇۇ, ەىدۇ جانە گرەكو ۇستانىمدارى مەن حالىقارالىق ستاندارتتارىن قولدايتىنىن ايعاقتايدى.
«قازاقستان مەن ەىدۇ اراسىنداعى ىنتىماقتاستىق ادىلدىك پەن سەنىم سياقتى ورتاق قۇندىلىقتاردى ىلگەرىلەتۋدىڭ بەرىك نەگىزى بولىپ قالا بەرمەك», – دەپ تۇيىندەدى دارحان جازىقباي.
