قازاقستان سۋرەتشىلەر وداعىنىڭ مۇشەلەرى قۇرالاي امانجولوۆا, ۆيكتوريا تسوي, سۆەتلانا تسوي سىندى تالانتتى قىلقالام شەبەرلەرىنىڭ قولتاڭبالارىن بىرىكتىرگەن "الماتىداعى سەرۋەن" اتتى ونەر جارمەڭكەسىنە 80-گە جۋىق كەسكىندەمەلىك تۋىندىلار قويىلعان.
سۋرەتشىلەر پلەنەرلىك تۋىندىلارىندا الماتى قالاسىنىڭ سۇلۋ كەلبەتىن بەينەلەي وتىرىپ, كۇندەلىكتى ۋاقىت تىنىسىن ءبىر ءسات توقتاتىپ, قاس-قاعىم ءساتتى ماڭگىلىككە اينالدىرعانداي اسەر قالدىرادى. سيۋجەتتىك كومپوزيتسيالارداعى ەرەكشە پاليترا ارقىلى ۋاقىت كەڭىستىگىنىڭ ديناميكالىق ىرعاعىن سەزىنۋگە جانە سول اتموسفەرانى ەركىن قابىلداۋعا مۇمكىندىك بەرەدى. اسىرەسە, جارىق پەن ءتۇستىڭ قاتىناسى ارقىلى سۋرەتشىلەر قالانىڭ تاڭعى سەرگەكتىگىن, تۇسكى قاربالاسىن, كەشكى تىنىشتىعىن ءبىر مەزەتتە كورسەتىپ, كورەرمەندەر سيۋجەتپەن تىكەلەي بايلانىس ورناتا الاتىنداي اسەر تۋعىزعان.
"كورمەنىڭ ەرەكشەلىگى – ءار اۆتوردىڭ قالاعا دەگەن وزىندىك كوزقاراسى مەن سۋرەتتەۋ مانەرىن كورسەتە بىلۋىندە. سۋرەتشىلەردىڭ قىلقالام ىزىنەن – قالانىڭ وتكەنى مەن بۇگىنى, تابيعاتى مەن تىلسىم بولمىسى, زامان اعىمىنداعى حالىقتىڭ ءومىر تىرشىلىگى تۋرالى اڭگىمە ورۋگە بولادى. قالا كورىنىستەرىنىڭ استارىندا ادامداردىڭ رۋحاني الەمى, ولاردىڭ ومىرگە دەگەن كوزقاراسى, تابيعات پەن قوعام اراسىنداعى نازىك بايلانىس قىلاڭ بەرەدى.
نەگىزىندە پلەنەرلىك جۇمىستاردىڭ تاعى ءبىر ەرەكشەلىگى – ولاردىڭ شىنايىلىعى مەن ەنەرگياسى. مۇندا ءاربىر جۇمىس – قالاعا ارنالعان ماحاببات حاتى, ءاربىر بوياۋ – ۋاقىتتىڭ كۋاسى",- دەيدى ونەرتانۋشى گۇلنار جۋۆانيازوۆا.
