فوتو: اشىق دەرەككوز
رەسەي قازاقستانعا ءتورت امۋر جولبارىسىن (ەكى اتالىق جانە ەكى انالىق) وتەۋسىز بەرەدى. جانۋارلار «ىلە-بالقاش» مەملەكەتتىك تابيعي رەزەرۆاتىنا جەتكىزىلەدى.
ايتا كەتەلىك, 2018 جىلى قۇرىلعان «ىلە-بالقاش» مەملەكەتتىك تابيعي رەزەرۆاتىندا قازاقستانعا العاش نيدەرلاندىدان اكەلىنگەن امۋر جولبارىستارى مەكەندەيدى.
ەكولوگيا جانە تابيعي رەسۋرستار مينيسترلىگىنىڭ مالىمەتىنشە, جولبارىستى قازاقستانعا قايتا ەنگىزۋ يدەياسىنىڭ عىلىمي جانە تاريحي نەگىزى بار. 2009 جىلى حالىقارالىق بيولوگتار توبى (Driscoll جانە باسقالار, 2009) جۇرگىزگەن گەنەتيكالىق زەرتتەۋلەر ناتيجەسىندە جويىلىپ كەتكەن تۇران جولبارىسى مەن قازىرگى امۋر جولبارىسىنىڭ دنق ۇقساستىعى دالەلدەندى. بۇل جاڭالىق جوعالعان پوپۋلياتسيانى قالپىنا كەلتىرۋ جۇمىستارىنا باستاۋ بولۋعا مۇمكىندىك بەردى.
رەسەي تاراپى ۆەتەريناريالىق دايىندىق پەن تاسىمالداۋدى قامتاماسىز ەتسە, قازاقستان تاراپى قارسى الۋ, ورنالاستىرۋ جانە مونيتورينگ جۇرگىزۋ جۇمىستارىن اتقارادى. جوبا WWF جانە بۇۇ دامۋ باعدارلاماسىنىڭ قولداۋىمەن جۇزەگە اسىرىلادى.
باعدارلامانىڭ تابىستى ىسكە اسىرىلۋى قازاقستاندى جولبارىس جويىلىپ كەتكەن وڭىرگە ونى قايتا ەنگىزە العان العاشقى ەلدەردىڭ بىرىنە اينالدىرادى.
