اقتوبەدە جاس ماماندار انت قابىلدادى

اقتوبە. 24 ماۋسىم. اقتوبە قالالىق اكىمدىگىندە ءبىر توپ جاس مەملەكەتتىك قىزمەتكەردىڭ انت قابىلداۋ ءراسىمى بولىپ ءوتتى. بۇل تۋرالى egemen.kz ءتىلشىسى حابارلادى. «بۇگىن انت قابىلداعان جاس مامانداردىڭ بارلىعى مەملەكەتتىك قىزمەتكە قولدانىستاعى زاڭناماعا سايكەس كونكۋرستىق نەگىزدە قابىلداندى. ولار جۇرگىزىلگەن اڭگىمەلەسۋ ناتيجەسى بويىنشا كونكۋرستىق كوميسسيانىڭ وڭ شەشىمىن العان قىزمەتكەرلەر, – دەيدى قالا اكىمى اپپاراتى پەرسونالدى باسقارۋ بىرىڭعاي قىزمەتىنىڭ باسشىسى سالتانات باەكەنوۆا. انت قابىلداۋشىلاردىڭ اراسىندا 2010 جىلى ەكونوميست-بۋحگالتەر ماماندىعى بويىنشا ديپلوم العان ايگەرىم بيسەمبينا دا بار. ول ەندى قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باس مامانى. ايگەرىم بەيسەمبينامەن قاتار, قالالىق ىشكى ساياسات جانە ساۋلەت, قالا قۇرىلىسى بولىمدەرى مەن بلاگودار اۋىلدىق وكرۋگى اكىمى اپپاراتىنىڭ باس ماماندارى دا انت قابىلدادى. شارا بارىسىندا قالا اكىمى اپپاراتىنىڭ باسشىسى جولداس ورازاەۆ جاس مەملەكەتتىك قىزمەتكەرلەردى قۇتتىقتاپ, ولارعا ەڭبەكتەرىندە كاسىبي بىلىكتىلىك پەن تابىستار تىلەدى. ساتىبالدى ءساۋىرباي. دەرەك: egemen.kz. سۋرەت: aktobegazeti.kz.